Mandatory face mask, 'di ibabalik sa M. Mla.

ni BRT | May 18, 2023

Hindi ibabalik sa ngayon ang mandatoryong pagsusuot ng face mask sa Metro Manila sa gitna ng pagtaas ng kaso ng COVID-19 sa bansa.

Ayon kay Metro Manila Council head San Juan City Mayor Francis Zamora, nananatiling nasa low-risk category ang rehiyon para sa COVID-19 na may 29% hospital utilization rate.

Habang ang positivity rate o porsyento ng nagpopositibo sa virus mula sa nasuring indibidwal ay nasa 25% subalit karamihan ay mild lamang.

Iniugnay naman ng alkalde ang mababang positivity rate at hospitalization rates sa mataas na vaccination rate sa rehiyon.

Sa kabila aniya ng pagpapatupad ng face mask mandate sa ibang lungsod, sa kabuuan sa Metro Manila ay nananatiling nasa Alert Level 1 o low risk category at sa ilalim nito, nananatiling optional ang pagsusuot ng face mask.

Inihayag din ni Zamora na hindi pa natatalakay sa nagdaang pagpupulong ng konseho ang pagpapatupad muli ng mandatoryong pagsusuot ng face mask.

Ipinaliwanag din ng opisyal na mayroong otonomiya ang mga lokal na pamahalaan na nangangahulugan na maaaring magpatupad ang mga ito ng face mask mandate sa pamamagitan ng mga ordinansa o executive orders.

Pagdura at pagbahing, bawal sa San Juan

ni Lolet Abania | September 3, 2020

Inaprubahan na ni Mayor Francis Zamora ang ipinasa ng San Juan City Council na City Ordinance No. 62, series of 2020 o ang "Anti-Spitting Ordinance of 2020", bilang bahagi ng paglaban ng lungsod sa pagkalat ng sakit na COVID-19.

Sa naturang ordinansa, mahigpit na ipinagbabawal ang pagdura at pagsinga sa lahat ng pribado at lalo na sa pampublikong lugar tulad ng bangketa, kalsada, parke, malls, bangko, terminal at iba pa sa San Juan City.

Gayundin, ang pagbahing at ibang kagaya nito nang hindi sadya at walang maayos at sapat na proteksiyon sa mukha ay mahigpit na ipinagbabawal.

Dagdag pa rito, ang pag-ihi, pagdumi, pagsuka at iba pang maruruming gawain sa pampublikong lugar, kung saan magiging panganib ito sa kalusugan ay bawal na rin.

Papatawan ang sinumang lalabag sa ordinansang ito ng parusang 1st offense - multang P500; 2nd offense - multang P2,000; 3rd offense - multang P5,000 at isasailalim sa health seminar na isasagawa ng City Health Office o ng Department of Health (DOH) sa pakikipagtulungan ng local health units.

Samantala, ipapatupad ang "Anti-Spitting Ordinance of 2020" sa San Juan City matapos ang 15 araw na mailathala na ito sa mga diyaryo.