Pa-bigas sa Maynila, umarangkada

ni Mylene Alfonso @News | September 28, 2023

Magkatuwang na nagpamahagi ng bigas sina Pangulong Ferdinand Marcos, Jr. at Manila Mayor Honey Lacuna para sa 'Pantawid Pamilya Households'.

Ginawa nina Marcos at Lacuna ang pamamahagi ng tig-25 kilong bigas mula sa may 1,000 benepisyaryo sa San Andres Sports Complex sa Maynila.

Ang naturang subsidiya ay bilang ayuda sa pamilyang nakapaloob sa nasabing programa.

Dinaluhan din ang naturang pagtitipon nina 5th District Rep. Irwin Tieng, mga opisyal at miyembro ng Department of Social Welfare and Development's Central at NCR Offices pati na ang mga kawani Manila Department of Social Welfare sa ilalim ni Re Fugoso.

Inireklamong nanlimas ng computer shop.. 5 Pulis-Maynila, lumantad

ni Mylene Alfonso @News | July 18, 2023

Itinanggi ng 5 pulis-Maynila ang alegasyon laban sa kanila na pagnanakaw, ng may-ari ng computer shop na si Hermiginildo Dela Cruz, 73, ng Maynila.

Nagbigay ng pahayag sina Staff Sgts. Ryann Tagle Paculan, Jan Erwin Santiago Isaac; Cpl. Jonmark Gonzales Dabucol; at Patrolmans Jeremiah Sesma Pascual, at John Lester Reyes Pagar, pawang mga miyembro ng MPD-DPIOU, kasama ang kanilang mga abogado sa tanggapan ng Manila Prosecutors Office matapos isampa ang kasong paglabag sa Article 295 (Robbery with Intimidation), ng revised penal code.

Iginiit ng mga pulis na wala silang kinuhang P40,000 at P3,500 na kita sa nasabing shop. Si Dela Cruz din umano mismo ang nag-alok ng P4,000 kada linggo pero ito ay hindi nila tinanggap.

Sinabi pa umano ni Dela Cruz na may kamag-anak siyang mataas na opisyal.

Anila, Hulyo 7, nang makatanggap sila ng impormasyon hinggil sa isang computer shop na nagsasagawa umano ng ilegal na online casino kaya pinuntahan ito.

Tumanggi umano si Dela Cruz na buksan ang computer sa shop dahil wala umamo silang search warrant.

Nanindigan naman ang mga pulis na mas gusto nilang lumabas ang CCTV footages sa shop dahil 'yun ang magpapatunay sa kanilang pahayag.

Biyahe ng LRT-2, damay.. Sunog sa Maynila, 1 dedo, 2 nawawala

ni Mylene Alfonso | May 15, 2023

Patay ang isang indibidwal habang dalawa pa ang nawawala kung saan naapektuhan din ang biyahe ng Light Rail Transit Line 2 sa naganap na sunog kahapon ng madaling-araw sa Oroquieta St., Sta. Cruz, Maynila.

Habang isinusulat ang balitang ito, inaalam pa ang pagkakakilanlan ng nasawi sa sunog, gayundin ng mga nawawalang biktima.

Nasa 1,200 pamilya ang nawalan ng bahay sa sunog, na sinasabing nagsimula umano sa isang paupahang gusali na pagmamay-ari ng isang Joker Flores at inookupa ng isang Balong Flores.

Nabatid na umabot sa ikalimang alarma ang sunog, na tumupok sa tinatayang 400 bahay bago naideklarang under control alas-6:43 ng umaga at tuluyang naapula alas-12:04 ng tanghali.

Tinatayang nasa P1.5 milyon ang halaga ng napinsalang ari-arian.

Kaugnay nito, dahil malapit ang sunog sa Recto Station ng LRT-2 naapektuhan din nito ang biyahe ng mga tren ng LRT-2.

Ayon sa abiso ng Light Rail Transit Authority (LRTA), alas-5 ng madaling-araw nang ipatupad ang provisionary service mula Antipolo Station hanggang V. Mapa Station sa Maynila.

Sinabi ng LRTA na napilitan silang magpatupad ng limitadong operasyon dahil naapektuhan ng sunog ang power supply at signaling systems sa Recto Station.

Tumagal ang limitadong train operations hanggang alas-10:56 ng umaga, upang matiyak ang kaligtasan ng riding public.

Dakong 10:57 ng umaga ay pinalawak na ng LRT-2 ang kanilang operasyon mula Antipolo Station hanggang Legarda Station at vice-versa.

Nabatid na napinsala din ng sunog ang elevated connecting bridge, na nagsisilbing link o transfer of passengers mula LRT-2 Recto Station sa LRT-1 Doroteo Jose Station at sa kasalukuyan ay hindi pa maaaring daanan.