123 positive sa Covid dahil sa concert sa simbahan

ni Lolet Abania | June 12, 2021

Itinuturong dahilan ng pagtaas ng kaso ng COVID-19 sa lalawigan ng Northern Samar ang naganap kamakailan na konsiyerto sa simbahan sa isa sa mga munisipalidad nito, ayon sa gobernador ng probinsiya.

Sa Laging Handa briefing ngayong Sabado, ayon kay Northern Samar Governor Edwin Ongchuan, nakapagtala ang lalawigan ng pagtaas ng COVID-19 cases noong June 10 na may 123 active cases sa loob lamang ng isang araw sa munisipalidad ng Victoria, kung saan umabot sa kabuuang 218 ang mga aktibong kaso.

Agad isinailalim ang mga bayan sa granular lockdowns, kabilang ang kabisera ng lalawigan na Catarman. Ayon kay Ongchuan, batay sa isinasagawang contact tracing, lumalabas na ang pagtaas ng kaso ng COVID-19 ay dahil sa isang church concert kamakailan.

“May iba pong mga kababayan natin mula sa ibang bayan, dito po nagsipunta sa Victoria at sa kasamaang palad, may naitala pong dalawang nasawi sa COVID,” ani Ongchuan.

Gayunman, inatasan na ni Ongchuan ang mga mayors ng buong lalawigan na ipatigil ang pagsasagawa ng mga mass gatherings, partikular na ang church gatherings.

Mga pabayang opisyal, huhulihin… Mas mabigat na parusa vs. pasaway sa protocols — Roque

ni Lolet Abania | May 27, 2021

Maaaring maaresto nang walang warrant ang mga opisyal ng barangay na makikita sa mga "superspreader gatherings" o pagtitipun-tipon sa gitna ng COVID-19 pandemic, ayon sa Palasyo.

Ito ang ipinahayag ni Presidential Spokesperson Harry Roque isang araw matapos na ipag-utos ni Pangulong Rodrigo Duterte na arestuhin ang mga barangay captains na bigong ipatupad sa kanilang lugar ang health protocols, kabilang na ang pagbabawal sa mass gathering, dahil sa kapabayaan nila sa tungkulin.

“Warrantless arrest can be performed by law enforcers when the law enforcement is personally witnessing the crime. If the barangay captain is at the scene of the superspreader event, knows about it and did nothing, that is dereliction of duty,” ani Roque sa isang interview ngayong Huwebes.

Ginawa ni Pangulong Duterte ang direktiba matapos ang naiulat na mga insidente ng mass gatherings sa swimming pools sa Lungsod ng Caloocan at Quezon City na nagresulta sa mga indibidwal na nagpositibo sa test sa COVID-19.

Ayon pa kay Roque, para naman sa mga walang alam sa nangyayaring superspreader events sa kanilang lugar, maaari pa ring magsampa ng reklamo laban sa mga pabayang barangay captains sa prosecutors’ office at ihain dito ang kanilang mga depensa.

“If the prosecutor finds probable cause, the judge will issue an arrest warrant against the barangay chairman,” sabi ni Roque.

Sinabi rin ni Roque na ang mga sasaling indibidwal at mga organizers ng mga superspreader events ay mananagot din dahil sa paglabag ng mga ito sa mga local ordinances na may kaukulang parusa sa pagsuway sa quarantine protocols.

“If they are complicit, that is conspiracy [to commit a crime] because they allowed the offense to happen,” ani pa ng kalihim.

Gayunman, aniya, ang mga penalties sa ilalim ng mga local ordinances ay hindi sapat para sa indibidwal na lumabag sa ipinatutupad na kautusan.

“We need to have a national quarantine law that will spell out stiffer penalties for breach of quarantine protocol,” saad ni Roque.

Ang mga parusa sa paglabag sa quarantine protocols na itinatakda sa ilalim ng local government ordinances ay pagbabayad ng malaking halaga at administratibo gaya ng pagpapasara ng kanilang establisimyento kapag napatunayang may kasalanan o mayroong paglabag.

Menor-de-edad, puwede na sa Mall

ni Ronalyn Seminiano Reonico | December 1, 2020

Papayagan nang lumabas ng bahay ang mga menor-de-edad upang makapunta sa mga malls sa darating na Kapaskuhan basta’t kasama ang magulang, ayon kay Interior Secretary Eduardo Año. Mahigpit pa ring ipinagbabawal ang Christmas party at mass gatherings.

Aniya, “Ngayon pong darating na Pasko, ang atin pong mga LGUs at lalo na po ang mga NCR mayors ay nagsisipaghanda para sigurado na mabantayan po natin itong COVID-19.

“Wala pong… katulad po ng plano na hindi po papayagan ang Christmas party, hindi rin papayagan ang Christmas caroling, wala pong mass gathering. ‘Yun pong family reunion ay considered as mass gathering katulad po ng sabi ni Sec. Duque, immediate family na lang sana ang mag-celebrate ng Christmas together at kailangan pong ang minimum health standard ay matutupad.

“Para na rin po sa Kapaskuhan, doon po sa ipinag-utos natin na puwede nang gradual expansion ng mga age group para makalabas, ang mga minors po, basta accompanied ng mga magulang ay papayagang makalabas at makapunta sa mga malls at ito po’y pagtitibayin sa mga ordinansa ng ating mga NCR mayors sa lugar po ng GCQ.”