88 pulis, bagong positibo sa COVID-19

ni Mary Gutierrez Almirañez | March 10, 2021

Walumpu’t walong kapulisan ang nadagdag na nagpositibo sa COVID-19, ayon sa Philippine National Police Healthcare Service kaninang umaga, Marso 10.

Batay sa tala ng PNP, umakyat na sa 11,830 ang kabuang bilang ng mga nagpositibo mula noong nakaraang taon, kung saan nananatili sa 633 ang aktibong kaso, habang 11,165 ang mga gumaling at 32 ang pumanaw.

Samantala, 44 naman ang iniulat na bagong gumaling.

Giit pa ni PNP Chief General Debold Sinas, “We cannot afford to lower our guard against the virus, especially at this point when the cure is already within reach.”

Sa ngayon ay patuloy pa rin sa serbisyo ang mga kapulisan sa kabila ng panganib na dala ng COVID-19.

Bulkang Taal, naka-Alert Level 2, mga ililikas, bawal magsiksikan

ni Mary Gutierrez Almirañez | March 10, 2021

Ipinahahanda na ng Batangas City ang masterlist ng mga pamilyang ililikas sa evacuation center bilang preparasyon sa posibleng pagsabog ng Bulkang Taal, ayon sa pahayag ni Disaster Risk Reduction and Management Officer Rod dela Roca kaninang umaga, Marso 10.

Aniya, ang mga bayan ng San Pascual, Bauan at Batangas City ay puwedeng maging takbuhan ng mga residenteng maaapektuhan ng pagsabog, habang ang mga ililikas naman sa eskuwelahan ay 6,500 katao lamang ang maaaring tanggapin para maiwasan ang pagsisiksikan dahil 600 classrooms lamang mayroon ang paaralan.

Iginiit din niyang dadaan muna sa medical ang lahat ng mag-e-evacuate at hindi sila basta magpapapasok sa evacuation center sapagkat kailangan pa ring masunod ang health protocols. Sakaling may makitang sintomas o positibo sa COVID-19 ay kaagad na ididiretso ang indibidwal sa isolation facility.

Sa ngayon ay nananatili sa Alert Level 2 ang Bulkang Taal matapos makapagtala ng 51 na pagyanig kada isa hanggang 4 na minuto sa nakalipas na 24 oras. Mahigpit pa ring ipinagbabawal ang paglapit sa main crater nito.

2 positibo sa bagong variant ng COVID-19 sa Mandaluyong

ni Mary Gutierrez Almirañez | March 10, 2021

Kumpirmadong isa ang positibo sa UK variant, habang isa rin sa South African variant ng COVID-19 sa Mandaluyong City, ayon sa panayam kay Mayor Menchie Abalos kaninang umaga, Marso 10.

Aniya, "Karamihan kasi sa amin na nagkaroon ng COVID, mga condominium. Karamihan d'yan, 1 lang per floor. Ang hirap namin i-lockdown, pero pinapabantayan na lang namin. Kinakausap na lang namin 'yung mga administrator ng condo na kung puwede, higpitan na lang nila 'yung kanilang amenities.”

Hiniling ng alkade na ipasara muna ang bawat gym at swimming pool sa mga condominium. Tiyakin din aniya na nakukuha palagi ang body temperature at siguraduhing may inilaang foot bath para sa mga pumapasok sa bawat establisimyento.

Dagdag niya, dumoble ang bilang ng aktibong kaso sa lungsod mula sa 134 ay naging 276 na ito. Iginiit pa niyang dulot iyon ng pagbabalik sa trabaho ng mga empleyado at ang pagiging kampante ng mga residente.

Sa ngayon ay pinaplano ng alkalde na ipasara ang isang pasilyo mula sa mga block ng Barangay Addition Hills.