300 walang face mask, hinuli sa QC

ni Mary Gutierrez Almirañez | March 12, 2021

Hinuli ang mga hindi sumusunod sa ipinatupad na health protocols kontra COVID-19 partikular na ang mga walang suot na face mask sa Quezon Ave. Memorial Circle, Quezon City ngayong umaga, Marso 12.

Batay sa ulat, patuloy na nagsasagawa ng operasyon sa lungsod ang Department of Public Order and Safety (DPOS), Quezon City Police District (QCPD) at Task-force Disiplina, gayunpaman, ngayong araw ang itinuturing nilang “one time, big time operation” mula noong ika-1 ng Marso kung saan umabot na sa mahigit 4,000 ang mga pasaway na nahuli.

Ayon pa kay DPOS Head Elmo San Diego, “Sobrang higpit natin kaya lang, ayaw makinig ‘yung mga mamamayan natin. Parang dinededma nila. Hindi sila seryoso at hindi nila alam na talagang delikado ang sitwasyon natin ngayon… Kaya ako nalulungkot, hindi nababawasan ‘yung huli. In fact, dumadami pa rin. Dapat ‘pag dumadami itong infection rate sa Quezon City, pababa nang pababa ‘yung mga violators natin.”

Tinatayang P300 ang multa sa mga nahuli sa first offense, habang P500 para sa second offense at P1,000 sa third offense. Aniya, hindi na nila titiketan ang mga aabot sa ika-apat na paglabag, bagkus ay ikukulong na nila ito sa presinto kung saan kailangan nang magpiyansa.

Dagdag pa niya, “After 7 days, idinedemanda na natin sila sa Fiscal’s office. Kaya kailangan ‘yan immediately, mabayaran nila. At eto, magkaka-warrant sila kapag hindi sila tinubos… Kapag may violation ka at hindi mo tinubos, hindi ka na makakakuha ng mga permit dito sa Quezon City. Walang maibibigay na services sa ‘yo dito sa Quezon City, unless mabayaran mo muna.”

Ngayong araw ay umabot na sa 300 katao ang mga nahuling lumabag sa lungsod. Karamihan sa kanila ay lumabas lamang sa bahay para bumili ng kape, shampoo at iba pa sa katabing tindahan nang hindi nakasuot ng face mask.

COVID testing sa mga papasok sa probinsiya, ipinababalik

ni Mary Gutierrez Almirañez | March 11, 2021

Nanawagan ang League of Provinces of the Philippines (LPP) sa Inter-Agency Task Force (IATF) na ibalik ang Negative COVID-19 test result requirement sa mga indibidwal na papasok sa bawat probinsiya, ayon sa panayam kay LPP President Marinduque Governor Presbitero Velasco kaninang umaga, Marso 11.

Aniya, "Ang hinihiling po namin, para mayroon naman po kaming paraan para malaman po kung positive 'yung papasok. Upon arrival du'n sa port of entry na i-allow po ang LGU na mag-prescribe ng PCR test, saliva test or antigen test…

"Marami pong asymptomatic. Kung gagamitin po ang pine-prescribe ng Resolution 101 na clinical exposure assessment, hindi po makikita roon kung positibo ang papasok dahil marami rin po ang asymptomatic na carrier.”

Nilinaw niyang sa ilalim ng Resolution 101 ay PRC test lamang ang inaprubahan ng IATF na puwedeng gamitin.

Ang test ay gagawin umano sa labas ng probinsiya saka dadalhin sa point of entry, ngunit iyon ay depende kung ire-require ng LGU.

Dagdag pa niya, “Very vulnerable po ‘yung mga probinsiya at mga lungsod dahil tinanggal na po ‘yung travel authority, tinanggal po ‘yung medical certificate, wala na pong quarantine kung asymptomatic.”

Bunsod ng pagiging maluwag sa mga probinsiya ay nagdulot iyon aniya ng mataas na bilang ng COVID-19 sa ilang lugar na noo’y COVID-free na.

Sa ngayon ay isinumite na ng LPP sa IATF ang rekomendasyong gawing discretionary ang COVID test sa point of entry.

NUPL, sumaklolo sa mga pamilya ng 9 na aktibistang pinatay

ni Mary Gutierrez Almirañez | March 11, 2021

Kinalampag na ng mga abogado mula sa National Union of People’s Lawyers (NUPL) ang gate ng Antipolo Memorial Homes ngayong umaga, Marso 11, dahil hindi pa rin nito pinapayagang ilabas ang mga bangkay ng apat na aktibistang namatay sa isinagawang raid sa Calabarzon nitong Linggo.

Ayon pa kay NUPL Attorney Kathy Panguban, pinapatagal lamang ng mga awtoridad ang pagsasagawa nila sa independent forensic investigation para mapagtakpan ang mga ebidensiya hinggil sa panlalaban ng mga namatay.

Kaugnay nito, mariin namang pinabulaanan ng mga magulang ng mag-asawang Ariel at Ana Mariz Evangelista ang pagiging komunista ng dalawa at ang paratang na nanlaban umano ang mga ito.

Sagot ni PNP Spokesperson Police Brigadier General Ildebrandi Usana, "Kung meron naman din po silang mga ebidensiya, we are more than willing to accommodate them, they can file actions against our police officers."

Dagdag pa niya, “Sila po ay nagkaroon ng operasyon on the basis of a judicial order. Ito po yung search warrant na in-issue ng mga judge from Batangas, Cavite, Laguna, Rizal at NCR. Hindi ito isang bagay na kukunin mo lang over the counter. Mahigpit po ang mga court pagdating po sa pag-issue ng search warrant.”

Iginiit din niya ang nangyari sa Negros Oriental noong July 2019, kung saan apat na pulis ang pinatay ng New People’s Army (NPA). Aniya, wala silang narinig na pagkondena mula sa grupo o kahit kanino. Samantala, ang ginawa namang operasyon ng Philippine National Police (PNP) sa Calabarzon nitong Linggo ay base lamang sa ibinigay na judicial order mula sa search warrant, gayunpaman ay marami pa rin ang nagkokondena.

Nilinaw naman ng Malacañang na magsasagawa ng imbestigasyon ang Department of Justice hinggil sa pagkamatay ng 9 na aktibista.