Pork holiday sa 2 palengke sa QC hanggang bukas

ni Mary Gutierrez Almirañez | February 22, 2021

Sarado ang mga bilihan ng baboy at manok sa Murphy Market at Commonwealth Market sa Quezon City ngayong araw, Pebrero 22 dulot ng “pork holiday”.

Ayon sa ulat, nagkasundo ang mga vendor na huwag magtinda hanggang bukas dahil sobrang lugi na sila sa itinakdang price ceiling ng gobyerno kung saan ang puhunan ay umaabot na sa P270 kada kilo ng kasim at pige, habang P300 sa bawat kilo ng liempo, at P160 sa kilo ng manok.

Maraming mamimili ang nagulat na walang mabiling karne kaninang umaga kaya napilitan na lamang silang bumili ng isda.

18 bagong kaso, UK variant ng COVID-19, 62 na!

ni Mary Gutierrez Almirañez | February 21, 2021

Labingwalo ang nadagdag sa UK variant ng COVID-19 ngayong araw, Pebrero 21. Ito ang kinumpirma ng Department of Health (DOH), University of the Philippines-Philippine Genome Center (UP-PGC), at ng UP-National Institutes of Health (UP-NIH).

Tinatayang umabot na sa 62 ang kabuuang bilang ng bagong variant mula sa pang-pitong batch ng 757 samples na inilabas noong ika-18 ng Pebrero.

Labingtatlo sa mga naitala ay balikbayan sa pagitan ng Enero 3 hanggang 27, at ngayon ay magaling na.

Samantala, tatlo sa mga nadagdag ay galing sa Cordillera Administrative Region. Ang dalawa ay parehong 12-anyos na lalaking konektado sa original cluster mula Samoki, Bontoc, Mountain Province.

Ang pangatlo ay 41-anyos na babae na siya namang konektado sa unang cluster ng La Trinidad.

Ang tatlo sa mga nabanggit ay kapwa magagaling na rin.

Sa ngayon ay kasalukuyan nang sumasailalim sa quarantine ang mga close contacts ng 18 nagpositibo sa UK variant ng COVID-19.

Bahay sa Surigao del Sur, tinangay ng baha

ni Mary Gutierrez Almirañez | February 21, 2021

Inaasahang magla-landfall ang Bagyong Auring sa Dinagat Islands, Eastern Samar, Leyte mamayang gabi, Pebrero 21 o bukas nang madaling-araw, Pebrero 22.

Ayon sa PAGASA, huli itong namataan sa layong 320 kilometro sa silangang bahagi ng Hinatuan, Surigao Del Sur na mayroong taglay na lakas ng hanging aabot sa 65 km per hour.

Nakataas ang Signal No. 2 sa mga sumusunod na lugar:

• Katimugang bahagi ng Eastern Samar

• Dinagat Islands

• Hilagang bahagi ng Surigao Del Norte (kabilang ang Siargao at Bucas Grande Islands)

Signal No. 1 naman sa mga sumusunod pang lugar:

• Sorsogon

• Mainland Masbate

• Ticao Island

• Northern Samar

• Nalalabing bahagi ng Eastern Samar

• Samar

• Biliran

• Leyte

• Southern Leyte

• Cebu

• Bohol

• Siquijor

• Negros Oriental

• Hilaga at gitnang bahagi ng Negros Occidental

• Silangang bahagi ng Iloilo

• Silangang bahagi ng Capiz

• Nalalabing bahagi ng Surigao Del Norte

• Surigao Del Sur

• Agusan Del Norte

• Agusan Del Sur

• Davao Oriental

• Davao De Oro

• Davao Del Norte

• Davao City

• Camiguin

• Misamis Oriental

• Bukidnon

Samantala, isang bahay sa Tandag City, Surigao del Sur ang tinangay ng baha kaninang umaga kung saan hanggang dibdib na ang taas.

"Although hindi pa nag-landfall si Auring, grabe talaga ang pagtaas ng water level dito ngayon," paliwanag pa ni Chief of the Provincial Disaster Risk Reduction and Management Office Abel de Guzman.

Noong Biyernes ay ipinag-utos na ang preemptive evacuation at kahapon ipinatupad ang forced evacuation sa mga coastal area. Mahigit 5,052 pamilya o 18,590 indibidwal ang mga inilikas sa evacuation centers.