Price ceiling, ayaw sundin ng mga tindero ng baboy

ni Mary Gutierrez Almirañez | February 26, 2021

Labing-pitong pampublikong palengke na sa Maynila ang nagsagawa ng pork holiday o hindi pagtitinda ng karne mula noong ipatupad ng gobyerno ang price ceiling, ayon kay Manila Market Administration Office Director Zenaida Mapoy.

Sa kabila nito, may ilang vendors sa Murphy Market, Cubao, Quezon City ang nagdesisyong hindi na sasama sa panibagong pork holiday na pinaplano ng mga magbababoy. Sa halip ay magtataas na lamang sila ng presyo ng karne para kumita.

Anila, mula sa P180 ay umaabot na sa P220 kada kilo ang buhay na baboy at hindi na nila kakayaning sumunod sa P270 na price cap dahil kulang ang kikitain kung isasama pa sa gastusin ang ibabayad sa puwesto at mga trabahador.

Ngunit sa kabila ng pag-aray ng mga pork vendors ay itinuturing pa rin ng Department of Agriculture (DA) na matagumpay ang pagpapatupad sa price ceiling dahil ayon sa monitoring nila ay marami pa rin ang sumusunod sa P270 hanggang P360 na bentahan ng baboy, taliwas sa dating P400 hanggang P450.

Pinangunahan ng Department of Agriculture at Department of Trade Industry ang Laban Konsumer na hamunin ang Economic Intelligence Group para ilabas ang resulta ng imbestigasyon kung may nagmanipula kaya sumirit ang presyo ng baboy.

Uumpisahan na rin ng ilang vendors mula sa iba’t ibang palengke ang signature campaign para matigil na ang price ceiling.

Lalabag sa social distancing sa EDSA 2021, bantay-sarado sa mga pulis

ni Mary Gutierrez Almirañez | February 25, 2021

Ipinagdiriwang ngayong araw, Pebrero 25, ang ika-35 anibersaryo ng EDSA People Power Revolution sa monumento ng mga bayani sa EDSA White Plains, na may temang “EDSA 2021: Kapayapaan, Paghilom, Pagbangon”.

Labing-limang minuto ang itinagal ng programa na pinangunahan nina Quezon City Mayor Joy Belmonte at Dr. Rene Escalante, Chairman of National Historic Commission of the Philippines. Pinaka-highlight ng programa ay ang pag-aalay ng panalangin at pag-awit ng Bayan ko at Magkaisa.

Habang isinasagawa ang programa ay mahigpit pa ring ipinapatupad ang health protocol dahil sa patuloy na banta ng COVID-19. Kaagad nilalapitan at sinisita ng mga pulis ang mga nakikitang lumalabag sa social distancing, bitbit ang yantok.

Kabilang sa mga nakilahok ay ang mga ordinaryong mamamayan, mga estudyante at mga vloggers.

Matatandaang ginanap ang mapayapang rebolusyon sa Epifanio Delos Santos Avenue (EDSA) noong 1986 upang wakasan ang dalawang dekadang pamumuno ng dating pangulong Ferdinand Marcos sa bansa.

Naka-lockdown na barangay sa Pasay, 55 na

ni Mary Gutierrez Almirañez | February 24, 2021

Limampu't limang barangay na sa Pasay City ang isinasailalim ngayong araw, Pebrero 24, sa mas mahigpit na quarantine status dahil sa mabilis na paglobo ng COVID-19.

Sa huling tala ay umabot na sa 435 ang aktibong kaso kung saan 60% ay mga nakatira sa iisang bahay.

Batay sa pamantayan ng pamahalaang lungsod, kaagad idaragdag sa listahan ng mga isasailalim sa localized enhanced community quarantine ang mga barangay na may tatlong aktibong kaso ng virus. Sa ilalim ng localized ECQ, bawal pumasok ang mga walang ID o quarantine pass. Hindi rin pinapayagang makapasok kapag walang negative swab test ang mga delivery riders at empleyadong hindi residente sa naka-lockdown na lugar. Ayon pa kay Mico Lorca, pinuno ng Pasay City Contact Tracing, hinihintay na lamang ng lungsod ang resulta ng samples na ipinadala nila sa Philippine Genome Center para malaman kung may COVID-19 new variant sa lungsod.