20K Covid cases kada araw, inaasahan sa Abril

ni Mary Gutierrez Almirañez | March 15, 2021

Nagprotesta ang grupo ng kabataan sa Quezon City ngayong umaga, Marso 15 upang gunitain ang anibersaryo ng lockdown sa bansa at para ipanawagan ang palpak na aksiyon ng pamahalaan kontra COVID-19.

Ayon sa pahayag ni UP Diliman University Student Council (UPD USC) Chairperson Froilan Cariaga, "Yung peak ng COVID cases, hindi 'yan dahil sa pagiging pasaway ng mga Pilipino kung ‘di dahil sa kapalpakan ng rehimeng Duterte. Panawagan natin ang medikal at siyentipikong tugon sa pandemya at hindi ang militaristikong lockdown."

Isang taon na ang nakalipas mula noong ipinatupad ni Pangulong Duterte ang lockdown sa bansa matapos itala ang 140 na kaso ng COVID-19. Sa ilalim ng lockdown ay bawal lumabas sa bahay ang mga residente, habang bantay-sarado naman ng mga pulis at sundalo ang bawat lungsod. Ipinasarado rin ang mga mall, hotel, restaurant, resort, salon, paaralan at iba pang establisimyento. Ipinagbawal din ang mga pampublikong transportasyon at mga paliparan na sobrang nagpabagsak sa ekonomiya.

Sa ngayon ay nakikipaglaban pa rin sa COVID-19 at mga bago nitong variant ang ‘Pinas. Bagaman, mayroon nang bakuna ay patuloy lamang dumarami ang mga nagpopositibo sa virus kung saan pumalo na sa 621,498 ang naitalang kaso.

Giit pa ng OCTA Research, posibleng umabot sa 18,000 hanggang 20,000 ang COVID-19 cases kada araw sa pagdating ng Abril, batay sa 1.9% na reproduction rate. Anila, mapipigilan ito kung ipapatupad ang localized lockdown, uniformed curfew at kapag nasunod ang health protocols, taliwas sa ipinaglalaban ni Cariaga.

5,000 kaso ng COVID-19, pinakamataas na naitala sa ‘Pinas sa isang araw

ni Mary Gutierrez Almirañez | March 13, 2021

Umakyat na sa 616,611 ang naitalang kaso ng COVID-19, kung saan 5,000 ang nadagdag sa mga nagpositibo ngayong araw, Marso 13, at tinatayang pinakamataas na ulat mula noong ika-26 ng Agosto, 2020, ayon sa Department of Health.

Samantala, mayroon namang naitalang 281 na gumaling, habang 72 ang pumanaw.

Sa kabuuang bilang, mahigit 88.7% ng 547,166 ang lahat ng gumaling at 2.07% ng 12,766 naman ang namatay.

Sa ngayon ay patuloy ang vaccination rollout sa bansa at ang pakikipagnegosasyon ng pamahalaan sa mga bakuna kontra COVID-19.

3 days lockdown sa ilang lugar sa Makati

ni Mary Gutierrez Almirañez | March 13, 2021

Inumpisahan na ang 3-day localized enhanced community quarantine (LECQ) ng dalawang zones sa Barangay Pio del Pilar, Makati City simula kaninang 12:01 nang madaling-araw at magtatapos sa ika-16 ng Marso hanggang 11:59 nang gabi, dahil sa pagtaas ng kaso ng COVID-19, ayon sa nilagdaang Executive Order No. 6 ni Mayor Abby Binay.

Base sa huling tala, umabot na sa 759 ang aktibong kaso ng COVID-19 sa lungsod. Sa kabuuang bilang ay 12,339 na ang mga naitalang kaso, kung saan 11,140 ang gumaling, habang 440 naman ang namatay.

Batay pa sa ulat, kabilang ang mga sumusunod na zone sa may kritikal na kaso ng COVID-19:

Zone 1

• Mayor St. (mula Cuangco St. hanggang Jerry St.)

• Jerry St. (buong kalsada)

• Cuangco St. (mula Mayor St. hanggang M. Reyes St.)

• M. Reyes St. (mula Cuangco St. hanggang Arguelles St.)

Zone 2

• Arguelles St. (mula Evangelista St. hanggang A. Apolinario St.)

• Apolinario St. (mula Arguelles St. hanggang Calhoun St.)

• Calhoun St. (mula A. Apolinario St. hanggang Evangelista St.)

• Evangelista St. (mula Calhoun St. hanggang Arguelles St.)

Sa ilalim ng LECQ, bantay-sarado ng Makati Public Safety Department (PSD) ang bawat eskinita kung saan bawal lumabas ang mga residente kung walang importanteng dahilan. Inatasan ding magbahay-bahay ang Makati City Epidemiology and Surveillance Unit (CESU) para isagawa ang swab testing. Ang magpopositibo sa test ay kaagad dadalhin sa quarantine facility upang hindi mahawahan ang ibang miyembro ng pamilya.

Sa ngayon ay patuloy ang pamimigay ng ayudang pagkain at gamot sa mga naka-lockdown na lugar mula sa pamahalaang lungsod.