Reevaluation sa 83 maritime schools

ni Mylene Alfonso | April 17, 2023

Inatasan ni Pangulong Ferdinand Marcos, Jr., ang Commission on Higher Education na tapusin ang reevaluation ng 83 maritime schools sa bansa sa loob ng dalawang taon.

Ito ang inihayag ni CHED chairman Prospero de Vera III sa isinagawang pulong sa Palasyo noong nakaraang linggo.

Sa panayam ng Super Radyo dzBB, sinabi ni De Vera na nangako ang CHED na muling bubusisiin ang mga maritime schools para suriin ang kanilang standard compliance kaugnay ng patuloy na pagkilala ng European Union (EU) sa mga certificate na iniisyu ng Pilipinas para sa mga maritime.

Aniya, target ng CHED na suriin ang 30 maritime schools kada taon, ngunit nais ng Pangulo na dagdagan ang bilang upang paikliin ang panahon ng pagsusuri.

“Ang timetable na ating ipinangako sa kanila ay makakapag-evaluate tayo ng 30 schools per year. Medyo mabigat na ‘yan… pero ang sabi ng Pangulo, baka pwedeng dagdagan ang ating ma-evaluate na ‘yung 30 ay baka pwedeng 40 per year,” wika ni De Vera.

“Imbes na tatlong taon ‘yung aabutin, baka dalawang taon, pwedeng gawin. ‘Yan ang utos ng Pangulo, na ‘yung ipinangako nating timetable baka pwedeng ma-complete natin nang mas maaga,” pahayag pa niya.

Binangit ni De Vera na 15 maritime programs ang isinara noong nakaraang taon dahil sa hindi pagsunod sa mga pamantayan.

Nauna nang nagpahayag ang CHED ng kahandaang makipag-ugnayan sa mga maritime school at Maritime Industry Authority (MARINA) para ipatupad ang mga repormang iminungkahi ng EU upang matiyak na ang mga Filipino seafarer ay maaaring magpatuloy sa pagtatrabaho sa mga foreign vessels.

Matatandaang nagbabala ang EU na maaaring i-ban ang mga Filipino maritime worker sa mga sasakyang pandagat nito matapos mabigo ang Pilipinas sa pagsusuri ng European Maritime Safety Agency (EMSA) sa nakalipas na 16 na taon.

2 pang Covid positive galing India, isinugod din sa ospital

ni Mary Gutierrez Almirañez | May 10, 2021

Apat na nagpositibo sa COVID-19 mula sa barkong nanggaling sa India ang isinugod na sa ospital, ayon sa Maritime Industry Authority (MARINA) ngayong araw, May 10.

Matatandaang sa 12 na nagpositibo ay 2 lamang sa kanila ang naka-confine sa ospital dahil sa critical conditions, habang naiwan naman sa loob ng MV Athens Bridge ang 10 mild patients upang sa barko muna mag-quarantine.

Subalit ngayong umaga ay napabalitang bigla na lamang nahirapang huminga ang dalawa sa mga naka-quarantine kaya kaagad din silang isinugod sa ospital.

"'Yung 2 sa 10, isinugod sa ospital dahil bumaba ang oxygen level. 'Di naman sila kinonsider na critical pa. Na-stabilize naman po," paliwanag ni MARINA OIC Captain Jeffrey Solon.

Samantala, maayos naman ang kondisyon ng 8 na naiwan sa barko.

Sa ngayon ay sinusuri pa ng Philippine Genome Center ang na-detect na variant ng COVID-19 sa lahat ng nagpositibo.

Barko galing India, 12 positibo sa COVID-19, 2 kritikal

ni Mary Gutierrez Almirañez | May 7, 2021

Dalawa ang kritikal sa 12 na nagpositibo sa COVID-19 na lulan ng barkong MV Athens Bridge galing India noong ika-22 ng Abril, ayon sa kumpirmasyon ng Maritime Industry Authority (MARINA).

Batay sa ulat, dumaong ang barko sa Vietnam nu’ng May 1 upang doon isagawa ang RT-PCR test sa 21 Pinoy crew members. Nasa OSS Port of Manila na ang barko nang lumabas ang resulta, kung saan 12 sa kanila ang nagpositibo.

Nakatanggap naman ng request ang Philippine Coast Guard (PCG) kahapon, May 6, mula sa kapitan ng barko para sa medical assistance at medical supplies. Nakipag-ugnayan na rin sila sa Bureau of Quarantine (BOQ).

Sa ngayon ay nasa medical facility na ang dalawang pasyente na may critical condition, habang ang 10 naman ay naiwan sa loob ng barko upang doon muna mag-quarantine. Tiniyak naman ng mga awtoridad na mababantayan silang mabuti.

Sinigurado rin ng BOQ at Department of Health (DOH) na walang ibang barko o bangka ang makalalapit sa MV Athens Bridge upang hindi kumalat ang virus.