Hinalo sa fried chicken … Bebot, arestado sa droga, marijuana

ni Lolet Abania | March 6, 2021

Isang babae ang nahuli matapos na tangkang ipuslit sa loob ng Davao City Jail ang hinihinalang marijuana at ilegal na droga mula sa dala nitong pritong manok.

Kinilala ang suspek na si Audrey Madelo Millomeda, 37-anyos at residente ng Deca Homes, Barangay Cabantian, Buhangin District, Davao City.

Sa ulat, mahigpit na ipinatutupad ng mga tauhan ng Davao City Jail ang pagsasagawa ng inspeksyon sa mga papasok sa nasabing pasilidad.

Habang ininspeksyon ng jail guard ang mga dalang pagkain ng suspek, napansin nito na may nakahalo sa pritong manok na pakete at lumabas na ang laman ay ilegal na droga at marijuana.

Tumitimbang ng 50 grams ang ilegal na droga na may street value na P800,000. Inihahanda na ang isasampang kaso na paglabag sa Republic Act 9165 o Comprehensive Dangerous Drugs Act of 2002 laban sa suspek.

Matatandaang, maraming beses na ring nakarekober ng malalaking halaga ng ilegal na droga ang nasabing city jail, kung saan nakakuha nito mula sa idinikit sa mga walis na ibinigay umano ng isang religious group.

Shabu sa noodles at ice bag, buking, mga tulak arestado

ni Mary Gutierrez Almirañez | March 2, 2021

Nagsagawa ng magkakahiwalay na buy bust operation ang Philippine Drug Enforcement Agency (PDEA) sa Marikina, Pasay, Zamboanga at Bataan kahapon, Marso 2, Martes nang hapon.

Batay sa ulat, mahigit 600 gramo ng shabu na nakasilid sa tea bag na nagkakahalagang P4,080,000 ang nakuha mula sa 58-anyos na babae at sa dalawang lalaki na may edad 25 at 43 sa isinagawang operasyon sa isang mall sa Barangka, Marikina City.

Inaalam pa kung saan nakuha ng grupo ang nasabat na malaking halaga ng droga at kung sinu-sino ang kanilang mga parokyano.

Dagdag pa ng PDEA, taga-Laguna at Baguio City ang mga naaresto na dumarayo pa sa Maynila para magbenta ng ilegal na droga.

Kaugnay nito, 23-anyos na lalaking may alyas “Jovan” ang nahulihan ng isang caliber .38 na baril at 24 sachet ng hinihinalang shabu na aabot sa 14 gramo o P94,000 na halaga sa ikinasang buy-bust operation sa Bgy. 179 Maricaban District, Pasay City.

Samantala, isang welder ng barko ang nagtangkang magbenta sa pantalan ng mga shabu na nakasilid sa pakete ng instant noodles ang nahuli sa Zamboanga City. Tinatayang 50 gramo o nagkakahalagang P300,000 ang nasabat sa suspek.

Muli ring isinagawa ang operasyon sa Orion, Bataan kung saan P500,000 halaga ng shabu na nakasilid sa ice bag ang nahuli sa 31-anyos na lalaki. Kasong paglabag sa Comprehensive Dangerous Drugs Act of 2002 ang kinakaharap ngayon ng mga tulak.

P18.96 M marijuana nasabat sa Tarlac, 6 arestado

ni Ronalyn Seminiano Reonico | February 18, 2021

Nasabat ang 158 kilograms ng hinihinalang marijuana na tinatayang aabot sa halagang P18.96 million sa isinagawang buy bust operation sa Concepcion, Tarlac ngayong Huwebes.

Ayon sa Philippine National Police (PNP), sa tulong ng Philippine Drug Enforcement Agency – Tarlac, nagsagawa ng operasyon laban sa dalawang suspek na nagbenta ng hinihinalang marijuana na nagkakahalagang P3 million sa nagpanggap na buyer.

Sa naganap na pakikipagtransaksiyon, naaresto ang apat pang suspek. Pahayag ni PNP Chief Police General Debold Sinas, "Further investigation revealed that these suspects are actively engaged in the illegal drug trade activities, specifically marijuana within Region 1 and 3.

"Recent accomplishments against drug syndicates manifest the responsiveness of PNP units to the national government’s campaign against illegal drugs and criminality.”

Kinilala ang mga suspek na sina Marlon Miranda, 34; Joey Palaeyan, 33; Freddie Letta, 35; Carl Andrei Maico, 22; Via Jean Ortiga; at Lorraine Fulgencio, 23. Nasa kustodiya na ng PNP Provincial Drug Enforcement Unit ang mga suspek.