3 farm, nabuking… P21.5 M halaga ng marijuana plants, sinunog sa Kalinga

ni Lolet Abania | July 21, 2021

Umabot sa kabuuang 107,500 marijuana plants na nasa P21.5 milyon halaga ang sinunog matapos ang ikinasang anti-illegal drugs operation ng mga awtoridad sa tatlong lugar sa Kalinga.

Sa isang pahayag ngayong Miyerkules ni Philippine National Police Chief Police General Guillermo Eleazar, ang pagwasak sa tatlong tagong cannabis farms ay isinagawa ng pinagsanib na puwersa ng mga kawani ng PNP at ng Philippine Drug Enforcement Agency (PDEA).

Ayon kay Eleazar, nadiskubre ang tatlong cannabis farms sa Barangay Loccong sa Tinglayan, Kalinga. Subalit, wala silang nahuling cultivator ng marijuana plants nang isagawa ang operasyon.

Sa unang site, tinatayang nasa 2,500 sq. m. ang land area nito, kung saan humigit-kumulang sa 37,500 full grown marijuana plants (FGMP) na nagkakahalaga ng P7.5 milyon ang kanilang binunot saka sinunog.

Ang ikalawang site ay mayroong 1,500 sq. m. area, na humigit-kumulang sa 30,000 FGMP na halagang P6 milyon ang winasak ng mga awtoridad. Habang ang ikatlong site na may 2,000 sq. m. area, humigit-kumulang sa 40,000 FGMJP na nasa P8 milyon halaga ang kanilang sinira.

Tiniyak naman ni Eleazar sa publiko na patuloy ang programa ng PNP na Intensified Cleanliness Policy laban sa mga sangkot sa ilegal na droga. “Ang mga impormasyon na inyong ipinapaabot sa aming tanggapan ay mahalaga at malaking tulong upang mas lalong mapabilis ang ating pagsasagawa ng operasyon ng ating mga operatiba,” ani Eleazar.

P28M marijuana plants, sinunog sa Kalinga

ni Ronalyn Seminiano Reonico | July 11, 2021

Aabot sa P28 milyong halaga ng marijuana plant ang sinunog ng awtoridad sa isinagawang operasyon sa Barangay Loccong, Tinglayan Municipality sa Kalinga Province.

Ayon sa ulat ng Philippine National Police (PNP), ang Provincial Drug Enforcement Unit, Tinglayan Municipal Police Station, Kalinga Provincial Police Office, at Philippine Drug Enforcement Agency-Kalinga ang nagsagawa ng naturang marijuana eradication operation.

Nasa kabuuang 110,000 fully-grown marijuana plants na tinatayang aabot sa halagang P22 million at 50,000 gramo ng marijuana stalks na aabot sa halagang P6 million ang sinunog ng awtoridad sa 5,500 square meters na plantasyon.

Ayon sa PNP, hindi pa tukoy kung sino ang nasa likod ng naturang plantasyon ngunit habang isinasagawa ang operasyon, pinaputukan umano ng hindi pa nakikilalang mga suspek ang awtoridad.

Wala naman umanong nasaktan sa insidente at saad ng PNP, “Investigation is ongoing to identify the suspects who fired shots at the law enforcers and who were the cultivators of the plantation.”

P25.8-M marijuana plants, sinunog sa Kalinga

ni Lolet Abania | June 13, 2021

Aabot sa P25.8 milyong halaga ng marijuana plant ang natagpuan at sinunog ng mga awtoridad sa bayan ng Tinglayan, Kalinga.

Nagkasa ang mga operatiba ng Cordillera region police ng dalawang araw na operasyon, kung saan natagpuan nila ang limang marijuana plantation site sa Tinglayan.

Ayon sa mga awtoridad, nakatanggap sila ng intelligence report na may malaking marijuana plantation sa bulubunduking bahagi ng naturang bayan, kaya agad na nagsagawa ng surveillance nitong Biyernes at Sabado.

Nasa kabuuang 152,000 full-grown marijuana plants ang nakuha ng mga pulis na nagkakahalaga ng P25.8 milyon, habang sinunog din ang mga ito.