Para sure na maiingatan... Bantay sa bakuna, itatalaga

ni Lolet Abania | May 17, 2021

Magtatalaga na ng vaccine security at safety officers matapos ang mga napaulat na insidenteng nangyari sa COVID-19 vaccines.

Ayon sa opisyal ng Department of Health (DOH) na si Undersecretary Myrna Cabotaje sa isang interview, “Ang ating napag-usapan, kasama ang ating vaccine czar, ay magkakaroon tayo ng vaccine security and safety officer at different levels para tingnan niya ano ba ‘yung mga kailangang gawin."

Matatandaang noong nakaraang linggo, ang service boat ng Department of Agriculture na may kargang COVID-19 vaccines ay tumaob sa Quezon matapos na tumama sa isang concrete post.

Gayunman, ayon sa DOH, ang mga nasabing vaccines ay nanatili sa maayos na kondisyon dahil nakabalot ito sa dalawang layers ng plastic.

Sinabi ni Cabotaje, inatasan na ni Vaccine Czar Secretary Carlito Galvez, Jr. ang mga military assets sa pagdadala ng mga bakuna upang matiyak ang safety nito.

Dagdag ni Cabotaje, tinalakay na rin ito noong weekend kasama ang pulisya at military representatives sa COVID-19 vaccine cluster.

Binanggit naman kanina ni DOH Undersecretary Maria Rosario Vergeire na kinailangan ng 24/7 monitoring ng mga bakuna para sa 348 vials ng Sinovac na nagkaproblema sa Cotabato, matapos na mai-report na dalawang araw itong nakalagay sa freezer na walang kuryente.

“As to the sanctions, they were already advised and the local government has been coordinated with by our regional office,” ani Vergeire.

41 close contacts ng 2 positibo sa Indian variant, bantay-sarado sa DOH

ni Ronalyn Seminiano Reonico | May 15, 2021

Sinusubaybayan ng Department of Health (DOH) ang health status ng 41 pasahero na nakasabay sa biyahe ng dalawang nagpositibo sa B.1.617.2 COVID-19 variant.

Ayon kay Health Undersecretary Maria Rosario Vergeire, ang unang Indian variant case ay nagkaroon ng 6 close contacts at 35 naman ang naging close contacts ng pangalawa sa biyahe.

Pahayag ni Vergeire, “Tine-trace na natin itong mga kababayan natin na nakasama sa eroplano. We are tracing all of them and check all of their statuses.”

Ayon sa DOH, ang isa sa 2 kaso ng Indian variant ay 37-anyos na returning overseas Filipino (ROF) mula sa Oman na dumating sa bansa noong April 10.

Ang pangalawa naman ay 58-anyos na ROF mula sa UAE na dumating sa bansa noong April 29.

Samantala, pinalawig pa ng bansa ang travel ban at ipinagbawal din ang pagpasok ng mga biyahero mula sa Oman at UAE hanggang sa May 31, ayon sa Malacañang.

Pahayag pa ng Palasyo, "All existing travel restrictions of passengers coming from India, Pakistan, Nepal, Bangladesh and Sri Lanka are extended until May 31, 2021.”

Kahit nagkakaubusan ng suplay… Halu-halong COVID vaccine, 'di puwedeng iturok

ni Mary Gutierrez Almirañez | April 14, 2021

Nilinaw ng Department of Health (DOH) na hindi nila inirerekomendang paghaluin ang iba’t ibang brand ng bakuna kontra COVID-19 bilang tugon sa nagkakaubusang suplay.

Ayon sa panayam kay DOH Undersecretary Maria Rosario Vergeire ngayong araw, Abril 14, “Sa ngayon, hindi pa ‘yan ang recommendation ng ating mga eksperto. Wala pang evidence to say that kapag binigyan mo ng kakaibang bakuna doon sa first dose, kung ano po ‘yung mangyayari.”

Paglilinaw pa niya, “‘Yun pa rin po ang ating posisyon at ang posisyon ng ating mga eksperto at FDA that whatever brand you have started with na bakuna sa inyo, ‘yan pa rin ‘yung second dose n'yo.”

Kaugnay ito sa naging rekomendasyon ni Dr. Nina Gloriani sa Vaccine Expert Panel (VEP) sa ginanap na briefing kamakailan. Ayon kay Dr. Gloriani, “‘Di ba kulang din ang ating mga supplies ng COVID-19 (vaccine)? Sometimes we have to be realistic, ano ‘yung next na puwedeng ibigay? Hindi puwedeng i-delay too long ‘yung second dose.”

Sa ngayon ay ubos na ang suplay ng AstraZeneca sa ‘Pinas at hindi pa rin nababakunahan ng pangalawang dose ang mga unang nabakunahan nito.

Samantala, iniulat naman sa Germany na ibang brand ng bakuna ang ituturok nila sa pangalawang dose upang makumpleto ang pagbabakuna sa mga unang naturukan ng AstraZeneca.