DOH, nanawagan para sa donasyon ng dugo

ni Lolet Abania | January 28, 2022

Nananawagan ang Department of Health (DOH) sa mga eligible na indibidwal na mag-donate ng kanilang dugo sa gitna ng kakulangan sa suplay nito sa mga blood centers.

Ayon kay DOH Undersecretary Maria Rosario Vergeire, maaaring ma-access ng mga indibidwal ang listahan ng mga blood donation centers sa pamamagitan ng website: https://tinyurl.com/DONATEBLOODPH.

“Bukod sa makakatulong ang inyong dugo sa pagligtas ng buhay, marami din po benepisyo para sa inyo ang pagdo-donate ng dugo,” sabi ni Vergeire sa isang Palace briefing ngayong Biyernes.

“Kabilang na diyan po ang pagbaba ng risk of heart attack, pagtulong sa pagpapanatiling malusog ang inyong atay, at nakakatulong din po ma-improve ang inyong cardiovascular health,” paliwanag ng kalihim.

Ayon sa DOH, ang mga indibidwal na nasa pagitan ng edad 16 at 65-anyos, na tumitimbang ng hindi bababa sa 50 kilograms ay eligible na mabigay ng kanilang dugo.

Gayundin, hindi dapat sila sumailalim sa minor o major surgeries, bagong tattoos, body piercings, o tumanggap ng anti-rabies/anti-tetanus vaccine nitong nakalipas na taon.

Binanggit rin ng DOH na hindi dapat sila nasangkot sa tinatawag na “high-risk behaviors” gaya ng casual sex o mayroong multiple sexual partners, bukod sa iba pang kadahilanan.

“Sa ngayon po mayroon tayong kakulangan sa supply ng dugo sa atin pong mga blood centers. Nananawagan po kami sa ating publiko na kung kayo po ay eligible, kayo po ay maaaring mag-donate ng dugo para po sa mga nangangailangan nating kababayan,” giit pa ni Vergeire.

Community transmission ng Omicron variant, nararanasan na sa NCR — DOH

ni Lolet Abania | January 15, 2022

Ipinahayag ng Department of Health (DOH) na nakararanas na ngayon ang National Capital Region ng community transmission ng mas nakahahawang COVID-19 Omicron variant.

Sa isang televised public briefing ngayong Sabado, sinabi ni DOH Undersecretary Maria Rosario Vergeire na may local cases na ng variant of concern ang kanilang na-detect sa Metro Manila.

Ayon sa World Health Organization (WHO), “Community transmission happens when connections between local infections could no longer be established through the positive test results of routine sampling.”

Noong nakaraang linggo, isang eksperto ang nagsabi na ang Omicron’s community transmission ay nangyayari na sa bansa.

“Dito po sa National Capital Region, we are seeing the community transmission… Nitong Omicron variant. Bagama’t hindi po nakakahabol ang ating genome sequencing, we already have determined that there are local cases already,” paliwanag ni Vergeire.

“Sa nakikita nating trend ngayon, ito po ’yung characteristic talaga ng Omicron variant, na mabilis na pagkalat, ’yung very steep rise in the number of cases… And doubling time po na every 2 days,” ani pa ni Vergeire.

Ayon kay Vergeire, ang daily cases sa Metro Manila sa nakalipas na linggo ay nag-average ng tinatayang 17,124, habang aniya, higit sa doble ito ng 6,500 average na bilang ng kaso ng mas naunang nakaraang linggo.

Gayundin aniya, ang rehiyon ay may tinatayang 149,000 active COVID-19 infections, na halos kalahati ng kabuuang bilang ng aktibong kaso sa buong bansa.

Sinabi pa ng opisyal, nakikitaan na rin nila ng pagtaas ng mga bagong kaso sa ibang mga rehiyon, na maaaring dulot ng Omicron variant.

Bukod sa Metro Manila, ang Calabarzon, Central Luzon, Western Visayas, Eastern Visayas, Bicol Region ay kinakikitaan nila ng pagtaas in terms ng 2-week growth rate.

Ayon pa kay Vergeire, kapag nagpatuloy ang ganitong trend, posibleng dumating ang oras na palitan na ng Omicron strain ang Delta bilang isang dominant variant sa bansa.

Seafarer sa Iligan City, nagpositibo sa Omicron COVID-19 variant — DOH

ni Lolet Abania | January 8, 2022

Isang returning seafarer na taga-Iligan City ang naitala ng Department of Health (DOH) na nagpositibo sa test sa mas nakahahawang COVID-19 Omicron variant.

Ayon sa DOH, ang nasabing seafarer ay kabilang sa 29 Omicron variant cases na na-detect nitong Huwebes. Sinabi ng ahensiya na nag-travel ang seafarer mula sa Kenya at bumalik sa Iligan City nitong Disyembre 30.

“This case arrived on December 16, completed isolation until December 30. On December 30, he was discharged, transferred, and arrived in CDO (Cagayan de Oro),” ani DOH Undersecretary Maria Rosario Vergeire sa mga reporters ngayong Sabado.

Binanggit naman ng DOH na hindi ito kinokonsidera bilang unang kaso sa Mindanao, ang kaso ayon sa ahensiya ay kinaklasipika bilang isang returning overseas Filipino (ROF).

“Since this is an ROF po we do not count them under any region. Thus, there is still no case for Region 10 since wala pang local case doon,” sabi ni Vergeire.

Sa ngayon, nakapagtala na ang DOH ng 43 kumpirmadong Omicron variant cases sa bansa.

Ayon pa sa DOH, sa bagong kaso ng Omicron variant, 10 ay mga ROFs habang 19 ang mga local cases na ang mga address ay nasa National Capital Region (NCR).