50 bagong kaso ng Omicron subvariant BA.5, naitala — DOH

ni Lolet Abania | June 28, 2022

Nakapagtala ng 50 karagdagang kaso ng mas nakahahawang Omicron subvariant BA.5, kaya umabot na ito sa kabuuang bilang na 93 cases, ayon sa Department of Health (DOH) ngayong Martes.

Sinabi ni DOH Undersecretary Maria Rosario Vergeire na sa naturang bilang, 38 indibidwal ay mula sa Western Visayas, 5 sa National Capital Region (NCR), at 7 ay mga returning overseas Filipinos (ROFs).

Ayon pa kay Vergeire, nakapag-record din ng 11 bagong BA.2.12.1 subvariant cases at 2 pang BA.4 subvariant cases.

5 lugar sa NCR, idineklarang moderate risk ng COVID-19 — DOH

ni Lolet Abania | June 25, 2022

Limang lugar sa National Capital Region (NCR) ang idineklara ng Department of Health (DOH) na nasa moderate risk matapos ang patuloy na pagtaas ng bilang ng mga COVID-19 cases.

Sa interview sa Laging Handa briefing ngayong Sabado, inanunsiyo ni DOH spokesperson at Undersecretary Maria Rosario Vergeire ang mga sumusunod na lugar na isinailalim ngayon sa moderate risk classification:

• Pasig

• San Juan

• Quezon City

• Marikina

• Pateros

Ayon sa DOH, ang isang lugar na naka-classified bilang moderate risk kung ito ay may positive two-week growth rate sa bilang ng mga COVID-19 cases at average daily attack rate (ADAR) sa pagitan ng 1 hanggang 7.

Ang ADAR ay insidente na nagpapakita ng average number ng mga bagong kaso sa isang period kada 100,000 katao.

“Kapag tiningnan natin, ang kanilang mga growth rate ay lumalagpas ng 200% kasi nanggagaling sa mababang numero, biglang nagkaroon ng kaso kaya tumaas ang growth rate,” paliwanag ni Vergeire.

Gayunman, sinabi ni Vergeire na isa lamang sa limang nabanggit na lugar ang mayroong bahagyang pagtaas sa kanilang hospital utilization na may mild at asymptomatic admissions.

“Even though these five areas are under moderate risk classification, only one of them had a slight increase in hospital admissions and the rest are less than 50%,” pahayag ni Vergeire na pinaghalong Filipino at Ingles.

Subalit aniya, sa kabila na ang NCR ay mayroong tinatawag na “slightly high” positivity rate ng mahigit sa 5%, hindi pa nakikita ng DOH na kailangan na ng rehiyon na i-escalate ito sa mas mataas na alert level dahil mas tinitinggan ng gobyerno ang mga naire-record na hospital admissions. “Escalation to Alert Level 2, hindi pa ho natin nakikita,” ani Vergeire.

“Even though the positivity rate is increasing, as long as we can maintain our hospitals not getting overwhelmed, as long as there are less severe and critical [cases], our system is okay,” dagdag niya.

Ayon pa sa opisyal, hindi rin kailangan na maalarma sa pagtaas ng kaso ng COVID-19. “Hindi po kailangan mabahala, pero kailangan vigilant tayong lahat,” sabi ni Vergeire.

Nitong Miyerkules, sinabi ng DOH na ang Pilipinas ay nasa low risk pa rin ng COVID-19 kahit pa nakapag- record ng kapansin-pansing pagtaas ng coronavirus cases.

Paliwanag ni Vergeire, ang low risk ay ang ADAR na nananatiling mas mababa sa 1 kada 100,000 populasyon.

1.2K COVID-19 daily cases sa katapusan ng Hunyo, posible — DOH

ni Lolet Abania | June 18, 2022

Posibleng umabot sa 800 hanggang 1,200 kada araw ang maitatalang COVID-19 cases sa bansa sa katapusan ng Hunyo, kung ang pinakabagong serye ng pagtaas nito ay napapanatili, ayon sa Department of Health ngayong Sabado.

“Ang meron tayo, projections that by the end of June, maaari na aabot tayo to 800 to 1,200 cases per day kung magtutuloy-tuloy ang mga kaso natin sa ngayon,” sabi ni DOH Undersecretary at Spokesperson Maria Rosario Vergeire sa Laging Handa briefing.

“These projections are not cast in stone. These are just used for us to prepare,” giit niya. Subalit, iba ang pananaw ni Vergeire sa tinuran ni DOH Secretary Francisco Duque III nitong Biyernes, kung saan sinabi ni Duque na inaasahan niya ang posible aniyang, “minor and short-lived COVID-19 surge.”

“Let us not call it a surge. When you talk about a surge, it is a sudden increase in the number of cases,” paliwanag ni Vergeire.

“If we look at it, just like what I said, yes it is increasing but it is not sudden and the additional cases are not that numerous,” pahayag ni Vergeire sa pinaghalong Ingles at Filipino.