Esporma at Adaoag hari't reyna, Chirchir champ sa Nueva Ecija Race

ni Anthony E. Servinio @Sports | June 7, 2024

Umani muli ng kampeonato si Welfred Esporma sa pinakaunang edisyon ng Nueva Ecija Marathon Linggo ng umaga sa Bypass Road ng Bayan ng Guimba. Tinapos ni Esporma ang 42.195 kilometrong karera sa oras na 2:51:00 at iniwan ang mga humahabol sa isa pang dominanteng takbuhan. 

Malayong pangalawa si Jade Sagadraca sa 3:04:00 at pangatlo si Requi Trupa sa 3:07:00. Mula Guimba ay tumuloy at umikot sa Bayan ng Cuyapo bago bumalik ng Guimba. 

Nanaig sa panig ng kababaihan ang isa pang beterana Lany Cardona-Adaoag sa photo finish laban kay Rocel Galicia Maestro kung saan pareho silang nagsumite ng parehong oras na 3:41:00. Pangatlo si Bhei Samson sa 3:46:00.

Sa mga side events, wagi sa Half-Marathon si Jackson Chirchir ng Kenya na kinailangan din ang photo finish kontra ka Lowegene Aliligay na parehong tinapos sa 1:16:00 ang 21.1 kilometro. Si John Paul Carreon ang pumangatlo sa 1:19:00. 

Napunta ang kampeonato ng kababaihan kay Joselyn Elejera sa 1:37:00. Sinamahan siya sa entablado ng pumangalawang Vernessa Pattison (1:39:00) at Beverlie Parale (1:43:00). 

Ang iba pang mga nagsipagwagi ay sina Collins Prago at Ailen Manansala sa 10 km. Panalo sa 5km sina Jaymark Quitan at Jonalyn Argamaso Unlayao. 

Noong Sabado ng gabi ay sinimulan na ang selebrasyon sa isang “warm up” na 5 km fun run, konsiyerto at mga paputok. May virtual race din para sa mga hindi makakapunta sa araw mismo ng karera. 

Pagsagip sa inabusong hayop at kalikasan sa Green Run

ni Anthony E. Servinio @Sports | June 6, 2024

Magbabalik para sa ikatlong taon ang “The Green Run at Vermosa” na patuloy ang paglaki bilang isa sa pinaka-inaabangang patakbo ng taon ngayong Hunyo 30 sa Ayala Vermosa, Imus City. Ang tema ngayong taon ay “Go Greener, Get Leaner, Give Back: Run Towards A Brighter Future”. 

Tampok dito ang Half-Marathon o 21.1 km at ang 10km, 5km at 3km. Hindi rin mawawala ang isang kilometrong takbuhan kasama ang alagang aso na ipinakilala noong 2023 at pumatok agad sa mga parokyano. 

Taglay nila ang mas pinalawak na adbokasiya tungo sa pag-aalaga ng Inang Kalikasan. Isang aksiyon na ginagawa ng pamunuan ng lugar ay ang pagbawal sa mga sasakyan tuwing Sabado at Linggo.  

Itutuloy ang suporta ng fun run sa Haribon Foundation na nag-aalaga sa Philippine Eagle. Subalit isasama na sa listahan ng makakatanggap ng tulong ang Pawssion Project at Takbo Kabitenyo. 

Layunin ng Pawssion Project na magligtas at alagaan ang mga hayop na dumaan sa abuso o iniwan ng kanilang may-ari. Nais ng Takbo Kabitenyo na tumuklas at humubog ng mga kabataang atleta mula sa lalawigan. 

Dahil maka-kalikasan ang karera, ginaganap ang pagpapalista online upang mabawasan ang paggamit ng papel. Kasama sa race kit ang damit at numero para at tatanggap ng medalya ang lahat ng magtatapos habang may dagdag na isa pang t-shirt para sa Half-Marathon. Para sa karera ng aso, may bandana at regalo para sa alaga at damit at numero para sa amo. 

Unang ginanap ang Green Run noong 2022 na halos paahon na ang buong mundo mula sa pandemya kaya balot ito ng maraming pag-iingat pangunahin ang pagiging limitado ng kalahok. Sa pagluwag ng mga patakaran, isang mas malaking fun run ang matagumpay na nairaos noong 2023. 

Salano at Camacho champ uli sa Trilogy Run

ni Anthony E. Servinio @Sports | June 3, 2024

Sina Maricar Camacho at Richard Salano, ang mga nagkampeon ng Half-Marathon sa 2024 HOKA Trilogy Run Asia Leg 2 kahapon sa Mall of Asia. (A. Servinio)

Umulit bilang kampeon si pambansang atleta Richard Salano habang balik sa panalo si beterana Maricar Camacho sa ikalawang yugto ng 2024 Hoka Trilogy Run Asia Manila Leg Linggo ng umaga sa Mall of Asia. Pinaspasan ng dalawa ang 21.1 kilometrong daan at sundan ang kanilang mahusay na ipinakita sa unang yugto ng serye noong Abril 7 sa parehong lugar. 

Mahigpit na nagbantayan sina Salano, James Kevin Cruz at Eduard Flores hanggang nakababa sila ng Buendia Flyover papuntang Cultural Center.  Doon ay nagpasya na humataw ni Salano sa nalalabing 5 kilometro at unang nagtapos sa oras na 1:13:53 habang pangalawa si Cruz (1:14:05) at pangatlo si Flores (1:14:28). 

Iba ang naranasan ni Camacho na pumangatlo lang sa Leg One at hawak niya ang liderato mula simula hanggang katapusan sa oras na 1:32:57.  Malayo na ang mga humahabol na sina Jennelyn Isibido (1:35:18) at Maria Joanna Abutas (1:37:18). 

Si Southeast Asian Games Triathlon gold medalist Kim Mangrobang ang nag-reyna sa 10 km  sa oras na 40:44 at sinamahan sa entablado nina Mea Gey Ninura (42:27) at Jessa Mae Roda (42:48) na nagkampeon sa 16 kilometro sa Baguio Leg One noong Mayo 5.  Nanaig sa mga kalalakihan sina kampeon ng Manila Leg One James Darell Orduna (32:51), Edgar Lee Jr. (34:23) at Jaspher Delfino (37:40). 

Isa pang pambansang atleta sa Obstacle Course Seannah Swift ang panalo sa 5km sa 21:27 habang pangalawa at pangatlo sina Joneza Mie Sustituedo (23:45) at Jyzel Gabriel (30:03).  Kampeon sa mga lalake si Mark Angelo Riagtan (17:31) na dinaig sina Karl Oxales (18:14) at Evelou Abutas (18:28).

Ang iba pang Leg 2 ay nakatakda sa Cebu (Hunyo 9), Baguio (Hulyo 7), Bacolod (Hulyo 28) at Cagayan de Oro (Setyembre 15).  Magbubukas pa lang ang serye sa Davao ngayong Hunyo 16 at ang Leg Two nila ay sa Agosto 25.