3rd booster vs. COVID, matumal

ni Mylene Alfonso | June 30, 2023

Dismayado si Manila Mayor Honey Lacuna-Pangan sa mababang turnout ng mga healthcare workers na nagpaturok ng bivalent COVID-19 vaccine.

Ayon kay Lacuna na isa ring doktor, mababa ang bilang ng mga nagpabakuna kahit na 32,000 doses na bivalent vaccine lamang ang ipinagkaloob ng national government makaraang pangunahan ang rollout ng bivalent vaccines sa Sta. Ana Hospital.

"Medyo mababa, I have to be honest mababa po. A1 pa lang and kagaya po sa ibang ospital natin hindi pa po kasi tayo puwede magpabakuna ng bivalent vaccine hangga't hindi tayo nakaka-two booster doses. Marami pa po na kahit medical health workers ang wala pa ring second booster," pahayag ni Lacuna sa ginanap na pulong balitaan ng Manila City Hall Reporters' Association sa Harbor View Restaurant.

Ipinaliwanag ni Lacuna na itinuturing bilang third booster ang bivalent at dahil dito, kailangang magkaroon muna ng first at second booster shots bago maturukan ng third booster.

"Halimbawa sa isang ospital 600 ang dapat na magpabakuna eh ang nagpapa-second booster pa lang sa kanila ay 400. So, 'yung 400 lang 'yung puwedeng mag-avail nu'ng bivalent vaccine," wika pa ng alkalde.

Ayon pa sa lady mayor, siya at ang mga health cluster ng lungsod ay nag-uusap na magbibigay sila ng palugit na isang linggo at pagkatapos ay ibibigay na nila ito sa senior citizens na kabilang din sa priority groups.

Ang pagluwag ng restriksyon sa health protocols ang dahilang itinuturo ng alkalde sa kawalan ng interes na magpaturok ng bivalent shots kabilang na rito ang tuluyang pag-alis ng public health emergency status ng World Health Organization.

"Hindi na kasi siya requirement, tapos kung magkakaroon man ng symptoms ng COVID, hindi na ganu'n kalala. Siguro rin hindi na po ganu'n katakot ang mga tao," saad niya.

No vaccine, no entry, ibalik — MHD.. Publiko, dapat takutin para magpabakuna vs. COVID

ni Mylene Alfonso | May 23, 2023

Kumbinsido si Manila Health Department (MHD) chief Dr. Arnold "Poks" Pangan na ang pagbabalik ng mga restriksyon ang solusyon upang mahikayat ang publiko na magpabakuna.

Ginawa ni Pangan ang pahayag sa isinagawang news forum ng Manila City Hall Reporters' Association (Machra) sa Harbor view makaraang ibunyag na nasa 2,070 na ang bilang ng namatay sa Maynila dahil sa COVID-19 kung saan 1,400 dito ang walang bakuna.

Dismayado si Pangan na dahil sa mababang bilang ng mga nagpapa-booster na siya ring itinuturong dahilan ng pagtaas ng kaso ng COVID sa lungsod.

"Dapat silang takutin," wika ni Pangan.

Giit ng opisyal na tinanggal na rin kasi ng pamahalaan ang requirement ng pagpapakita ng vaccination certificates bilang katibayan na bakunado ka bago ka papasukin sa malls, restaurants at iba pa kaya mataas ang pangangailangan ng pagpapabakuna.

Bunsod nito, nawalan na nang interes ang mga tao, dahil pinapayagan na ang lahat na makapasok sa establisimyento kahit pa hindi bakunado.

Binigyan-diin pa ni Pangan na bagama't hindi na ikinukonsidera ng World Health Organization (WHO) na global health emergency ang COVID-19 ay hindi ibig sabihin na tapos na ang pandemya.

Ayon sa kanya, nananatili ang COVID sa ating paligid, katunayan ang mga city-run hospitals sa Maynila ay may 183 COVID bed allocations dahil sa pagtaas ng bilang ng kaso ay mayroong 15.4 percent bed utilization.

Para kay Pangan, ang lifting ng COVID status bilang public health emergency ay nangangahulugan na hindi na magsu-supply ng bakuna ang WHO at idinagdag nito na:

“ngayon, tayo na ang bibili ng bakuna".

Naniniwala si Pangan na ang pagbabakuna at booster lamang ang tanging panlaban ng isang tao sakaling siya ay madapuan ng COVID.

Idinagdag pa ni Pangan na ang mga bakunado at may booster ay maaaring maging asymptomatic o mild kapag nagka-COVID at 'di katulad ng mga walang bakuna na tiyak na magiging severe ang kaso tulad ng siyam na napaulat sa Maynila na tinamaan ng COVID.

100-year-old Manila Central Post Office, natupok

ni Mylene Alfonso, Mai Ancheta at Alvin Fidelson | May 23, 2023

Pito katao ang nasugatan matapos masunog ang halos 100 taon nang gusali ng Philippine Postal Corporation-Manila Central Office na nasa Liwasang Bonifacio, Magallanes Drive, Ermita, Maynila.

Batay sa inisyal na ulat ng Manila Bureau of Fire Protection (BFP), alas-11:43 ng hatinggabi nang magsimula ang sunog sa Philpost na umabot sa general alarm at idineklarang fire under control alas-7:22 ng umaga.

Sa ulat, nagsimula umano ang sunog sa basement ng gusali at agad na umakyat hanggang sa ikaapat na palapag ng gusali.

Kabilang sa mga nasugatan ang limang BFP firemen na sina FO2 Joel Libutan, FO1 Carlo Abrenica, SFO2 Julio Erlanda, FO2 Jeremy Roque at FO1 Josaphat Araña sanhi ng mga paso sa katawan.

Gayundin, nagkaroon ng sugat sa kaliwang kamay ang fire volunteer na si Toto Doslin at Elaine Dacoycoy, 16, na nagtamo ng bali sa katawan.

Tinaya ng BFP na nasa P300 milyon ang halaga ng napinsalang ari-arian.

Nasunog din ang mga parcel at sulat habang ang mga files at documents ay nasa cloud storage o naka-save online.

Papalitan naman ng Philippine Statistics Authority (PSA) ang mga Philippine Identification cards na nasunog.

Batay sa inisyal na impormasyong ibinigay ng PHLPost, tanging PhilIDs ng mga taga-lungsod ng Maynila ang naapektuhan ng sunog, at inaalam na kung ilan ang mga ito.

Hindi kasama sa nasunog ang PhilIDs na ide-deliver sa ibang mga lugar dahil ang mga ito ay nakaimbak sa Central Mail Exchange Center ng PHLPost sa Pasay City.

Kaugnay nito, nanghihinayang at nalulungkot si Postmaster General Luis D. Carlos sa insidente.

“Masusi po kaming nakikipag-ugnayan sa Bureau of Fire Protection sa posibleng sanhi ng sunog na tumupok sa gusali ng MCPO”, ani PMG Carlos.

Ayon kay Carlos, pinapayuhan nila ang kanilang mga kliyente sa Manila Central Post Office na sa halip ay pumunta sa kanilang sangay sa Maynila, Ermita Post Office at Metro Manila.

Sinisiguro nila sa publiko na bukas pa rin at tuloy ang serbisyo ng Post Office sa buong bansa upang tumanggap at maghatid ng sulat at parsela.

Siniguro naman na maghahanap sila agad ng temporary office at ililipat muna ang kanilang mga kartero mula sa Manila Central Post Office papunta sa kanilang mga karatig na sangay sa Maynila.