Wa' paki na nagtapon lang daw ng pera sa dagat… "Dolomite is beautiful" – P-Duterte

ni Lolet Abania | August 27, 2021

Ipinagtanggol ni Pangulong Rodrigo Duterte ang multimillion-peso project na crushed dolomite na inilagay sa bahagi ng Manila Bay, kung saan aniya ang naging resulta nito ay maganda.

“Dolomite is beautiful to the eyes, period. ‘Wag ka na magtanong kasi hindi naman ninyo kaya kung kayo,” ani Pangulong Duterte nitong Huwebes nang gabi sa kanyang ikalawang public address ngayong linggo.

“You had your chance, actually. For so many years, you had every chance to do it. Was there anybody willing to take the problem by its horns? Si Cimatu lang (Department of Environment and Natural Resources Secretary Roy Cimatu),” dagdag ng Pangulo.

Bilang bahagi ng P389-milyon Manila Bay rehabilitation program, sinimulan ng DENR noong nakaraang taon ang paglalagay ng tone-toneladang white sand — na gawa sa crushed dolomite boulders na ipinadala sa lugar na galing sa probinsiya ng Cebu — sa maliit na bahagi sa kahabaan ng bay’s shoreline.

Si Cimatu na ipinrisinta ang natapos na proyekto ng DENR sa isang televised briefing ay nagsabing kaya ng dolomite sand na mapigilan ang maaaring coastal erosion, ma-filter ang tubig nito at madagdagan ang beach width ng Manila Bay.

“It is considered a beach nourishment kasi malaking bagay ang nagagawa niya diyan. Nililinis niya ‘yung… na-prevent niya rin ang erosion at saka, ‘yung mga luwag ng beach ay napaluwagan nito,” ani Cimatu.

Nauna na ring sinabi ng DENR na ang beach project ay mag-eengganyo sa mga tao na huwag magkalat sa paligid nito.

Gayunman, umani ito ng mga kritisismo mula sa iba’t ibang sektor gaya ng environmental at fishing groups na tinawag nilang isang “cover-up” sa tunay na problema sa polusyon ng nasabing bay.

Matatandaang tinangay din ang artificial white sand ng malakas na buhos ng ulan na tumama sa nasabing lungsod. Gayundin, nang magkaroon ng bagyo, matapos nito ay napuno ng tone-toneladang basura ang paligid ng Manila Bay.

Isang grupo naman ng mga scientists ang nagpahayag na ang gobyerno ay “literal na nagtapon ng pera sa dagat” dahil anila, ang pondo para rito ay maaari pa sanang magamit sa pagpapabuti ng mga hospital facilities, vaccine procurement, at financial assistance sa panahon ng pandemya para sa mga Pilipino.

Dolomite beach ng Manila Bay, nagmukhang basurahan sa lakas ng ulan

ni Lolet Abania | July 22, 2021

Nagmukhang basurahan ang kontrobersiyal na white sand beach ng Manila Bay matapos matambak ang mga basura at water hyacinths na inanod mula sa dagat dahil sa matinding buhos ng ulan na dulot ng mas lumakas na Southwest Monsoon ngayong Huwebes nang umaga.

Ayon sa mga residente, posibleng ang mga basura ay mula sa Pasig River at mga probinsiyang malapit sa Manila Bay.

Samantala, ang mga marshals ay nagtungo na sa lugar para linisin ang mga nagkalat na basura at water hyacinths na inanod papunta sa pampang ng white sand ng Manila Bay.

Matatandaang tinambakan ang 500-metro kahabaan ng coastline malapit sa US Embassy sa Manila ng puting buhangin na gawa mula sa tone-toneladang crushed dolomite boulders na nanggaling sa Visayas na tinatawag na ngayong Manila Bay ‘dolomite’ beach.

Dahil dito, umani ng mga kritisismo ang paggamit ng artificial sand mula sa mga environmental groups na nagsasabing nakatuon lamang sa pagpapaganda ng Manila Baby at hindi sa rehabilitasyon.

DENR, tameme sa unti-unting pagkawala ng dolomite sand sa Manila Bay

ni Mary Gutierrez Almirañez | May 23, 2021

‘Di maipaliwanag ng Department of Environment and Natural Resources (DENR) ang nangyari sa dolomite sand na itinambak nila sa Manila Bay bilang bahagi ng rehabilitation program, batay sa pahayag ni DENR Undersecretary Jonas Leones.

Aniya, “Siguro, too early to say na nag-wash out na siya.” Kaugnay ito sa sinabi ng Oceana Philippines nu’ng Abril na nag-e-erode na ang dolomite sand. “From December 2020 to February 2021, this dolomite beach has eroded by at least 300 square meters. They are refilling it again and even extending the area,” sabi pa ni Oceana Vice-President Gloria Ramos.

Sagot naman ni Leones, normal lamang ang pag-erode ng buhangin sa mga dagat. Paliwanag pa niya, “We have put in place 'yung mga geotubes to ensure na 'di mawa-wash out 'yung mga dolomite.” Sa ngayon ay inaabangan na nila ang pagsapit ng tag-ulan upang malaman kung epektibo ang geotubes para maiwasan ang soil erosion.

“Gusto natin mag-rainy season na dahil para once and for all, we can see and evaluate kung talagang effective 'yung ating beach nourishment. Pinag-aralan namin ‘yan and we are confident na kahit bagyuhin 'yan, kahit ano'ng ulan man, nandiyan pa rin 'yung beach nourishment,” dagdag ni Leones.