Reclamation sa Manila Bay, tatalupan

ni Mylene Alfonso | May 8, 2023

Matapos makatanggap ng reklamo mula sa ilang mangingisda sa Manila Bay, sisilipin ng ACT-CIS Partylist ang ongoing reclamation sa Manila Bay.

Ayon kay ACT-CIS 1st Nominee Rep. Edvic Yap, may reklamo ang ilang mangingisda sa Manila Bay na wala na silang makuhang isda sa lugar.

Nabulabog umano ang mga isda dahil sa pagtambak ng lupa sa lugar.

“Kung dati-rati’y diyan lang sila sa nangingisda malapit sa Roxas Boulevard, ngayon kailangan na nilang lumabas at magtungo malapit na sa Batangas daw,” ani Yap.

"Nakonsulta kaya sila sa project na ito o inumpisahan na lang ito nang walang dialogue sa mga stakeholders tulad ng mga fisherman d'yan at mga maliit na negosyo o kainan along the baywalk?" tanong ng mambabatas.

“Hindi po kami kontra sa pag-unlad, pero kung ang pag-asenso ng isang lugar ay pag-alis ng hanapbuhay sa isang ordinaryong tao, medyo magtatanong na tayo kung may alternatibo ba para kumita ang mga mawawalan ng kita d'yan sa lugar”, paliwanag ni Yap.

“May nabasa rin ako na post mula sa isang waiter sa restaurant sa tabi ng dagat d'yan sa Pasay, na magsasara na ang restoran nila dahil lupa na ang katabi nila at hindi na dagat, na siyang dinadayo raw ng mga customer dahil sa sariwang hangin," pahabol pa ng mambabatas.

Pagbubukas uli ng Manila Baywalk Dolomite Beach, dinagsa

ni Lolet Abania | June 12, 2022

Dinagsa ng mga tao ang Manila Baywalk Dolomite Beach, na nasa labas pa lamang at naghihintay ng pagbubukas nito, ngayong Linggo, Hunyo 12, kasabay ng pagdiriwang ng Araw ng Kalayaan.

Una nang inanunsiyo ng Department of Environment and Natural Resources (DENR) ang nakatakdang pagbubukas muli sa publiko ng artificial “white sand beach” ngayong araw, makaraang isara ito upang dumaan sa ikalawang phase ng kailangang rehabilitasyon.

Karamihan sa kanila ay pami-pamilya na pumunta roon ng alas-4:00 pa lamang ng madaling-araw. May iba na naglatag na lamang ng tela at nag-picnic sa labas ng Manila Baywalk Dolomite Beach habang matiyagang naghihintay na magbukas at makapasok sa loob.

Kahit na inabisuhan na ang mga ito ng mga guwardiya na hapon pa magbubukas ang dolomite beach at walang katiyakan kung kailan sila magpapapasok, maghihintay pa rin anila sila ilang oras man o gaano katagal ito abutin.

Marami kasi sa mga ito, ang gustong doon na magdiwang ng kanilang kaarawan dahil sa anila, maganda na ang tanawin ay makakatipid pa. Ginanap ang inagurasyon ng Manila Baywalk Dolomite Beach ng alas-4:00 ng hapon ngayong Linggo.

Manila Bay Dolomite Beach, bubuksan na sa Hunyo 12 — DENR

ni Lolet Abania | May 31, 2022

Magbubukas na muli sa publiko ang man-made beach na matatagpuan sa kahabaan ng Manila Baywalk sa Hunyo 12, kasabay ng selebrasyon ng 124th Independence Day ng bansa, ayon sa Department of Environment and Natural Resources (DENR).

Sa isang statement, sinabi ng DENR na ang reopening ng Manila Bay Dolomite Beach ay unang naiskedyul nitong Mayo subalit iniurong ito dahil sa ilang mga imprastruktura ang hindi pa natapos sa naturang lugar.

“We are excited to open the dolomite beach to the public again on June 12. This is the good legacy of the Duterte administration, that’s why we really aim to open it before President Rodrigo Roa Duterte’s term ends,” saad ni DENR Acting Secretary Jim Sampluna.

Matatandaan na maraming environmental groups ang bumatikos sa nasabing proyekto, dahil anila sa idudulot na epekto umano sa kalusugan ng isang indibidwal ng crushed dolomite na ginamit bilang “white sands.”

Gayunman, ipinagtanggol ng DENR ang proyekto, paliwanag nila ang mga concerned agencies at mga eksperto ay kanilang kinonsulta hinggil dito. Gayundin, ayon sa Malacañang ang P389-M dolomite beach project ay makatutulong para sa flood control at mapipigilan din ang soil erosion. Unang binuksan ang Manila Bay Dolomite Beach sa publiko noong Setyembre 2021.

Kaugnay nito, ayon kay DENR Undersecretary for Policy, Planning, and International Affairs Jonas Leones, ang 500-meter beach nourishment project aniya, “has withstood rains, typhoons and floods yet remains intact.” “This proves that the dolomite beach, thanks to the assistance of the Department of Public Works and Highways and the other agencies, is stable and will prevail,” sabi pa ni Leones.