Manila Bay reclamation, ginagamit sa korupsyon — Atienza

ni Jenny Rose Albason @News | August 21, 2023

Tinawag na ‘nonsense’ ni Lito Atienza, dating Mayor ng Maynila at former Deputy Speaker ng House of Representatives, ang Manila Bay reclamation sa ginanap na Pandesal Forum sa Kamuning Bakery kaninang umaga, August 21.

Matatandaang sinuspinde ang 22 reclamation projects sa Manila bay ng Department of Environment and Natural Resources (DENR) at ni Pangulong Ferdinand “Bongbong” Marcos Jr. dahil sa mga alalahanin na ang mga ito ay hindi umano pinamamahalaan at ino-operate nang maayos, at nirespeto naman ni Manila Mayor Honey Lacuna ang desisyong ito.

Pinaalalahanan naman ni Atienza si Manila Mayor Honey Lacuna na kailangan nang patigilin ang reclamation sa Manila Bay dahil ito ay public water at yaman umano ito ng bayan.

“'Yun daw reclamation, kalokohan ‘yan, niloloko tayong lahat n’yan. Dagat ‘yan, public water, gift of God, owned by the every citizen,” ani Atienza.

Ipinagmalaki pa ng dating alkalde na noong nanunungkulan pa siya bilang mayor ng Maynila ay crafted at worth of ordinance law ang pag-ban sa reclamation ng Manila Bay.

Giit pa ni Atienza, puro pagnanakaw at korupsiyon lamang umano ang nasa likod ng pangingialam sa Manila Bay.

“Kawawa naman ang Pilipino.‘Yung yaman ng Pilipinas na ang tanging pagkakataon, paraan upang umunlad ang Metro Manila, ibinebenta,” dagdag pa ni Atienza.

Dapat umanong managot ang mga sangkot sa pagbibigay ng permiso sa Manila Bay reclamation.

138 tonelada ng basura, nahakot sa Manila Bay

ni Gina Pleñago @News | August 11, 2023

Umabot sa 138 tonelada ng basura ang nahakot ng Metropolitan Manila Development Authority (MMDA) sa isinagawang clean-up operation sa Manila Bay mula Hulyo 1

hanggang Agosto 5.

Ilan dito ang sari-saring basura na inanod patungo sa pampang ng Manila Bay dahil sa lakas na ulan dala ng ilang bagyo at habagat noong mga nakaraang linggo.

Nanawagan ang naturang ahensya sa publiko na maging responsableng tagapangalaga ng kalikasan sa pamamagitan ng pagtatapon ng mga basura sa tamang lugar at pagre-recycle.

Problema sa baha, lalala.. Reclamation projects sa Manila Bay, stop, pwera sa isa — P-BBM

ni Mylene Alfonso @News | August 10, 2023

Sinuspinde ni Pangulong Ferdinand Marcos, Jr., ang lahat ng Manila Bay reclamation projects maliban sa isang hindi pinangalanang proyekto habang ang iba ay nirerebyu pa ng Department of Environment and Natural Resources (DENR).

"Nakasuspinde lahat... under review ang lahat ng reclamation. 'Yung isa lang ang natuloy dahil na-review na. Maraming problema, marami kaming nakitang hindi masyadong maganda ang patakbo," pahayag ni Marcos sa situation briefing sa Bulacan noong Lunes.

"But anyway, isa pang malaking problema na kailangan ayusin 'yan. Kasi kung matuloy lahat 'yan, maraming ilog mababara," wika pa ng Pangulo.

Hindi tinukoy ni Marcos kung aling mga proyekto ang sinuspinde, ngunit ikinalungkot nito na maaaring mawala ang dagat sa kahabaan ng Roxas Boulevard dahil sa mga reclamation projects.

Nabatid na sinasabing nakasunod na sa requirements ng Philippine Reclamation Authority (PRA) at DENR ang Manila Waterfront Reclamation Project.

Ayon sa PRA, aabot sa 22 reclamation project ang nakalinya sa Manila Bay kung saan tatabunan nito ang 6,700 ektarya ng dagat.

Kaugnay nito, ikinatuwa naman ni Senador Cynthia Villlar ang pagsuspinde ng Pangulo sa Manila Bay reclamation na posibleng nakapagdulot umano ng matinding pagbaha sa kanyang siyudad sa Las Piñas.

"I am happy that Pres. Marcos is suspending the reclamation in Manila Bay. This is good news to us who are afraid of ill effects of reclamation which will cause massive flooding in our cities," wika ni Villar.