Pagbubukas uli ng Manila Baywalk Dolomite Beach, dinagsa

ni Lolet Abania | June 12, 2022

Dinagsa ng mga tao ang Manila Baywalk Dolomite Beach, na nasa labas pa lamang at naghihintay ng pagbubukas nito, ngayong Linggo, Hunyo 12, kasabay ng pagdiriwang ng Araw ng Kalayaan.

Una nang inanunsiyo ng Department of Environment and Natural Resources (DENR) ang nakatakdang pagbubukas muli sa publiko ng artificial “white sand beach” ngayong araw, makaraang isara ito upang dumaan sa ikalawang phase ng kailangang rehabilitasyon.

Karamihan sa kanila ay pami-pamilya na pumunta roon ng alas-4:00 pa lamang ng madaling-araw. May iba na naglatag na lamang ng tela at nag-picnic sa labas ng Manila Baywalk Dolomite Beach habang matiyagang naghihintay na magbukas at makapasok sa loob.

Kahit na inabisuhan na ang mga ito ng mga guwardiya na hapon pa magbubukas ang dolomite beach at walang katiyakan kung kailan sila magpapapasok, maghihintay pa rin anila sila ilang oras man o gaano katagal ito abutin.

Marami kasi sa mga ito, ang gustong doon na magdiwang ng kanilang kaarawan dahil sa anila, maganda na ang tanawin ay makakatipid pa. Ginanap ang inagurasyon ng Manila Baywalk Dolomite Beach ng alas-4:00 ng hapon ngayong Linggo.

Manila Bay Sands, dinumog, dedma na sa social distancing

ni Lolet Abania | September 20, 2020

Dinagsa ng mga tao ang kahabaan ng Roxas Boulevard madaling-araw pa lamang ngayong Linggo para maranasan ang paglalakad sa Manila Bay Sands sa Baywalk, Manila.

Karamihan sa kanila ay dumating doon ng alas-5:30 ng umaga kahit pa magbubukas ito ng alas-6 ng umaga.

Pinapayagang makapasok sa lugar ng 20 hanggang 30 katao lamang. Gayunman, hindi nasusunod ang one-meter social distancing sa lugar dahil sa dikit-dikit ang gustong pumasok sa tinaguriang ‘white sand bay’.

Matindi na rin ang traffic sa kahabaan ng Roxas Boulevard dahil sa mga motoristang nakikiusyoso na dumaraan.

Sa ngayon, umabot na ang pila hanggang Magsaysay Center malapit sa Rajah Sulayman at posibleng humaba pa ito. Samantala, dalawang araw nang nagbukas ang Manila Bay Sands subali’t walang panuntunang ipinatutupad na safety at health protocol sa lugar tulad ng one-meter physical distancing, pag-fill up ng impormasyon para sa contact tracing at hand disinfection bago makapasok sa lugar.

Panawagan ng mga naroroon, aksiyunan ito ng Department of Environment and Natural Resources (DENR), Manila City government at iba pang ahensiya ng pamahalaan dahil posibleng pagsimulan ng pagkalat ng COVID-19.

Gilid ng Manila Bay, tatambakan ng puting buhangin

ni Lolet Abania | September 3, 2020

Inihahanda na ang puting buhangin na itatambak sa baybayin ng Manila Bay malapit sa US Embassy bilang rehabilitasyon at pagpapaganda ng siyudad sa gagawing "Manila Bay Beach."

Nilalayon ng Department of Environment and Natural Resources (DENR) na matambakan ng 500-meter ng puting buhangin ang kahabaan ng baywalk sa mga susunod na araw, kasabay ng plano ng lokal na pamahalaan na gawin ang Manila Bay Beach na makatutulong sa turismo ng lungsod.

Ayon kay Antiporda, ang puting buhangin ay nagmula pa sa Cebu beaches. Sa lugar na ito matatagpuan ang magagandang white-sand beaches at sandbars tulad ng Bantayan Island at Malapascua Island.

Gayundin, inaasahan ng awtoridad na matatapos ang pagtatambak ng puting buhangin sa Manila Bay Beach hanggang sa September 19, kasabay ng International Coastal Cleanup Day. Samantala, noong Enero 2019, may kabuuang 45.59 tonelada ng basura na umabot sa 11 trak ang nakolekta mula sa Manila Bay. Sa ngayon, patuloy na hinahakot ang mga basura at nililinis ang Manila Bay, kung saan nag-organisa ang lungsod ng clean-up drives upang maibalik ang dating kagandahan ng look ng Maynila.