P8 balik-pamasahe sa trike sa Mandaluyong City

ni Lolet Abania | December 11, 2021

Muling ibinalik ang pamasahe na P8 sa mga pumapasadang tricycle sa Mandaluyong City, kasabay ng pagluluwag ng mga quarantine restrictions sa National Capital Region (NCR).

Nagdesisyon ang lokal na pamahalaan ng Mandaluyong na ibalik sa P8 ang minimum fare, kasunod ng pagpayag na ibalik na rin sa tatlong pasahero ang puwedeng isakay sa kada biyahe ng isang tricycle.

Magugunitang noong nakaraang taon ay naging P20 ang minimum fare o pamasahe sa mga pumapasadang tricycle sa siyudad dahil sa isang pasahero lamang ang pinapayagang maisakay, kung saan ipinatutupad ang mga quarantine restrictions sanhi ng COVID-19 pandemic.

Base sa record ng Mandaluyong government, nabawasan na ang mga kaso ng COVID-19 sa lugar at dahil nagluluwag na rin sa mga restriksyon na ipinatutupad, pinayagan na uli na magsakay ng hanggang tatlong pasahero sa siyudad.

Maliban sa P8 na minimum fare, may P1 karagdagan naman sa dagdag ding kilometro ng biyahe, habang P7 ang discounted na pamasahe sa mga senior citizen, PWDs at mga estudyante na magpapakita ng kanilang IDs batay na rin sa city ordinance ng Mandaluyong City.

Kalsada para sa pipelaying project sa Mandaluyong, gumuho

ni Jasmin Joy Evangelista | November 26, 2021

Gumuho ang malaking bahagi ng isang kalsada habang may isinasagawang pipelaying project ang Manila Water sa Coronado Street, Brgy. Hulo, Mandaluyong City.

Malapit ito sa Pasig River at ang mga kabahayan naman ay nasa kabilang bahagi nito.

Nakapasok umano sa hinuhukay na bahagi ng kalsada ang tubig mula sa ilog na siyang naging dahilan upang lumambot ang lupa.

Ayon kay Barangay Hulo chairman Bernadino Maglague, ginawan na ng paraan ng contractor ng proyekto upang mapigilan ang pagpasok pa ng tubig.

Tinambakan na rin ang mga apektadong bahagi ng kalsada at nangako umano ang contractor na tatapusin ang pagsasaayos sa loob ng tatlong araw.

Mga ‘di residente, puwede na ring magpabakuna sa Mandaluyong

ni Ronalyn Seminiano Reonico | August 20, 2021

Maaari na ring magpabakuna laban sa COVID-19 kahit ang mga hindi residente ng Mandaluyong, ayon sa Public Information Office ngayong Biyernes.

Ayon sa Mandaluyong City Public Information Office, kailangan lang magparehistro sa MANDAVAX ( www.mandaluyong.gov.ph/vaccine/ ) ang mga nais magpabakuna laban sa COVID-19 na hindi residente ng naturang lugar.

Pagkatapos magrehistro, makatatanggap ng tawag o text mula sa MANDAVAX Call Center kung saan, kailan at anong oras pupunta.

Paalala rin ng lokal na pamahalaan, huwag kalimutang magdala ng government o valid IDs.

Saad pa ng Mandaluyong PIO, “Strictly by APPOINTMENT, HINDI MAAARI ang WALK-IN.”