Utos sa mga mayors... Polisiya sa face shield, sundin pa rin – Malacañang

ni Lolet Abania | November 8, 2021

Nagbabala ang Malacañang ngayong Lunes sa lahat ng mga mayors hinggil sa pagsuway ng mga nito sa ipinatutupad na mandatory face shield policy para sa mga crowded at enclosed spaces, kung saan nananatiling pinaiiral ang polisiya maliban na sabihin ito ng task force ng gobyerno.

Inisyu ni Presidential Spokesperson Harry Roque ang paalala matapos na ang mga lungsod ng Davao, Manila, Iloilo, at iba pa ay ibinasura umano ang polisiyang itinakda sa labas ng isang hospital setting.

“Ang desisyon po ng IATF (Inter-Agency Task Force) ay desisyon din ng Presidente. So, ang desisyon po ngayon ay kailangan ipatupad muna ang mga face shields habang pinag-aaralan po,” ani Roque.

“Mayors are under the supervision of the President. Let us follow the chain of command,” sabi pa ni Roque.

Nauna rito, sinabi ni Metro Manila Development Authority (MMDA) Chairperson Benjamin Abalos na nagkasundo na ang mga Metro Manila mayor na ang paggamit o pagsusuot ng face shield ay gawing optional.

Matatandaang ipinahayag ni Department of Health (DOH) Undersecretary Maria Rosario Vergeire na kailangan pa nila ng isang linggo para pag-aralan kung ang face shield requirement ay dapat nang alisin sa gitna ng pagbaba ng bilang ng kaso ng COVID-19.

P-Du30, balak tumakbong senador sa 2022 elections — Malacañang

ni Lolet Abania | November 5, 2021

Kinumpirma ng Malacañang ngayong Biyernes na kinukonsidera ni Pangulong Rodrigo Duterte na tumakbo sa pagka-senador sa 2022 elections.

“He is considering it,” ani Presidential Spokesperson Harry Roque sa isang press briefing, nang tanungin para kumpirmahin ang pahayag ni Senador Bong Go sa posibilidad na tumakbo sa senatorial race si Pangulong Duterte.

“As far as I know, wala pa pong pinal na desisyon,” sabi ni Roque.

Si Pangulong Duterte ay hindi naghain ng kanyang certificate of candidacy (COC) para sa 2022 polls sa panahon ng filing period nito noong Oktubre 1 hanggang 8.

Gayunman, siya ay maaaring tumakbo sa Senate race sa pamamagitan ng pag-substitute sa sinumang miyembro ng kanyang political party, ang PDP-

Laban, na naghain ng COC para sa pagka-senador.

Ang substitution ay maaaring gawin ng hanggang Nobyembre 15.

Matatandaang ipinahayag ng 76-anyos na si Pangulong Duterte na tatakbo siya sa vice presidential race sa 2022, subalit nagdesisyon ding hindi na ituloy at sinabing magreretiro na lamang siya sa pulitika.

Nangangahulugan umano na posibleng ang anak ng Pangulo na si Davao City Mayor Sara Duterte ay sasabak sa 2022 presidential race sa pamamagitan ng substitution.

Sa pareho ring briefing, umaasa naman si Roque sa isang “miracle” o milagro na si Mayor Sara ay tatakbo sa pagka-pangulo sa susunod na taon.

Si Mayor Sara ay naghain ng kanyang COC para sa reelection, subalit maaari pa rin siyang tumakbo sa pagka-pangulo via substitution.

Maging si Roque mismo ay may balak na tumakbo sa Senado sa 2022. Subalit, siya rin ay hindi nag-file ng kanyang COC sa panahon ng filing period.

24 M Pinoy bakunado na kontra-COVID-19 — Malacañang

ni Lolet Abania | October 19, 2021

Umabot na sa mahigit 24 milyong Pilipino mula sa 109 milyong populasyon ang bakunado na kontra-COVID-19, ayon Malacañang ngayong Martes.

Sinabi ni Presidential Spokesman Harry Roque na nakapag-administer na ang mga awtoridad ng 52.7 milyong COVID-19 shots sa buong bansa, kabilang dito ang tinatayang 28.2 milyong Pinoy na nakatanggap ng first dose.

Ayon din kay Roque sa press briefing, tinatayang 24,498,753 indibidwal naman ang fully vaccinated na hanggang nitong Lunes, kung saan nasa 31.76 percent ito ng target ng gobyerno na mabakunahan laban sa COVID-19.

Sa Metro Manila, tinatayang 7.8 milyong indibidwal ang nakatanggap ng ikalawang dose habang 9 milyon naman ang nabigyan ng unang dose ng COVID-19 vaccines, pahayag pa ng kalihim.

Una nang sinabi ng World Health Organization (WHO) na kinakailangang ang mga bansa ay makapagbakuna ng nasa 85 porsiyento ng kanilang populasyon kontra-COVID-19 matapos ang pagkakaroon ng mas nakakahawang mga variants.