Simula Pebrero 16... Foreigners na ‘di bakunado, bawal na sa ‘Pinas – Palasyo

ni Lolet Abania | January 28, 2022

Ipagbabawal na ang pagpasok ng mga foreign nationals o dayuhan na hindi fully vaccinated kontra-COVID-19 simula Pebrero 16, kasunod ng pagrebisa ng gobyerno ng kanilang protocols para sa mga international travelers at returning overseas Filipinos, ayon sa Malacañang.

Sinabi ni acting Malacañang Spokesman at Cabinet Secretary Karlo Nograles na base aniya ito sa pandemic inter-agency task force’s (IATF) Resolution No. 157.

“Sorry to say pero by Feb. 16, ‘pag hindi fully vaccinated, hindi natin papapasukin,” ayon kay Nograles sa isang televised public briefing ngayong Biyernes.

Aniya, inaprubahan ng pamahalaan ang tinatawag na dropping facility-based quarantine para sa mga fully-vaccinated international travelers at returning overseas Filipinos (ROFs).

Ang mga fully-vaccinated nationals mula sa mga non-visa requiring countries, sa ilalim ng Executive Order 408, series of 1960 ay papayagan na ring pumasok sa bansa simula Pebrero 10, 2022.

Gayundin, batay sa nakasaad sa EO, pinapayagan nito ang pagpasok ng mga fully-vaccinated international travelers kaugnay naman sa pagnenegosyo at turismo.

“’Yung under EO 408, kailangan fully vaccinated, makikita natin na we are only allowing foreign nationals coming in na fully vaccinated,” paliwanag ni Nograles.

“Kapag hindi fully vaccinated, hindi po puwede, pero absolutely sa 16 tama po ‘yun, wala nang foreign nationals na makakapasok dito na hindi fully vaccinated,” sabi pa ng opisyal.

Nabuo ang naturang polisiya matapos na simulan ng gobyerno na ipagbawal ang mga unvaccinated na mga indibidwal na pasakayin sa mga public transport sa National Capital Region (NCR).

Disenyo ng 3 bayaning Pinoy... P1,000 bill, hindi ide-demonetized – Malacañang

ni Lolet Abania | December 14, 2021

Isa lamang test circulation ang bagong P1,000 banknote design na nagpapakita ng Philippine eagle kapalit ng tatlong Filipino war heroes, ayon sa Malacañang.

“Our P1,000 bill that shows the faces of our heroes and martyrs will not be demonetized,” sabi ni acting Presidential Spokesperson Karlo Nograles sa isang press briefing ngayong Martes.

“This new design with polymer material is only for test circulation,” dagdag pa ni Nograles, nang tanungin na kung buburahin ang mga bayani sa Philippine banknotes ay magiging polisiya na ngayon ng administrasyong Duterte.

Maraming mambabatas at mga personalidad ang kumuwestiyon sa bagong disenyo ng P1,000 banknote, kung saan ang mga mukha nina Josefa Llanes Escoda, Vicente Lim at Jose Abad Santos ay inalis. Sina Escoda, Lim at Santos ay pinatay ng mga Japanese forces noong World War II, na nakipaglaban para sa kalayaan ng Pilipinas mula sa mga colonizers.

Ayon kay Nograles, batay aniya sa Bangko Sentral ng Pilipinas (BSP), ang test circulation ng bagong P1,000 bill ay magsisimula sa Abril 2022.

“The test circulation will be done to validate if the polymer material is environment friendly, more hygienic considering we are still facing a pandemic, or if it is more secure,” ani opisyal.

Gayunman, hindi pa batid ni Nograles kung hanggang kailan ang test circulation na ipapatupad, at kung ang mga mukha ng tatlong bayani ay muling ire-restore matapos ang test circulation period.

“The new design for banknotes is cyclical and is done in validating advantages of the polymer material, with the assurance that the existing P1,000 bill with the faces of our heroes will not be demonetized,” paliwanag pa ni Nograles.

Galing abroad na positive sa COVID... Sequencing, gawin na — Malacañang

ni Lolet Abania | December 3, 2021

Inatasan na ang National Task Force Against COVID-19 Task Group on the Management of Returning Overseas Filipinos na isumite ang mga nagpositibo ang resulta ng test sa COVID-19, mula Nobyembre 1 at sumusunod pa para sa agarang genome sequencing, sa Philippine Genome Center (PGC) dahil ito sa Omicron variant, ayon sa Malacañang ngayong Biyernes.

Sinabi ni acting Presidential Spokesperson Karlo Nograles, ang direktiba ay ibinigay sa ilalim ng Inter-Agency Task Force Resolution 152, kung saan inatasan din ang Department of Interior and Local Government (DILG) na makiisa sa mga local government units (LGUs) para sa tinatawag na active case finding at agarang pagsasagawa ng flag clusters, at agad na magsumite ng mga eligible samples para sa sequencing.

“This is to further strengthen active case finding and healthcare system capacity,” sabi ni Nograles.

Samantala, ipinaalala naman ni Dr. Alethea de Guzman ng Department of Health (DOH) sa publiko na wala pang patunay na ang Omicron variant ay nagdudulot ng mas severe COVID-19, pagkamatay dahil sa COVID-19, o kaya ay maglalagay sa mga kabataan sa higher risk na ma-infect ng virus.

“The Omicron variant is still being studied," sabi ni De Guzman ngayong Biyernes.

Ang Omicron variant ay unang na-detect ng mga South African authorities habang nai-report na mas transmissible ito.

Tinatayang nasa 35 bansa ang nakumpirmang mayroong mga kaso ng Omicron variant sa ngayon, kabilang na ang South Africa, Belgium, France, Saudi Arabia, ang UK, Netherlands, Hong Kong, Germany.