63 M Pinoy fully vaccinated na kontra-COVID-19 — Malacañang

ni Lolet Abania | March 1, 2022

Mahigit sa 63 million Filipinos ang fully vaccinated na kontra-COVID-19 sa ngayon, eksaktong isang taon nang simulan ng gobyerno ang vaccine rollout sa bansa, ayon sa Malacañang ngayong Martes.

Sinabi ni Acting Presidential Spokesperson Karlo Nograles, may kabuuang 63,219,221 indibidwal ang nakakumpleto na ng kanilang primary vaccine series hanggang nitong Lunes, Pebrero 28. May kabuuan namang 135,747,294 vaccine doses ang na-administered na sa buong bansa.

Nasa 68,808,944 indibidwal ang nakatanggap ng unang dose, habang 10,214,164 ang nabigyan ng kanilang booster shots matapos na maabot ang tatlo hanggang anim na buwang requirement.

“With more than 80% of our country’s target population now fully vaccinated, we are confident that we can achieve our goal of vaccinating 90 million Filipinos by the end of the second quarter, and administer at least 72.16 million booster shots by the end of the year,” sabi ni National Task Force (NTF) Chief Implementer at vaccine czar Secretary Carlito Galvez Jr. Target ng gobyerno na maging fully vaccinated ang 77 milyong Pinoy kontra-COVID-19 sa pagtatapos ng Marso, at 90 milyon naman sa panahong si Pangulong Rodrigo Duterte ay bumaba na sa puwesto sa Hunyo 30.

Ginunita naman ng NTF, kung saan natanggap ng Pilipinas ang unang vaccine shipment noong Pebrero 28, 2021 na donasyon ng Chinese government. Ang mga bakuna ay agad namang ni-rolled out nang sumunod na araw, Marso 1, 2021.

Ayon pa kay Galvez, simula noong Pebrero nang nakaraang taon, nakatanggap na ang bansa ng mahigit 225 million vaccine doses.

“The key was to work closely with the medical experts, local government units, diplomatic corps, WHO (World Health Organization), and the private sector to maximize our limited inventory of vaccines. We ensured those in the medical field and the vulnerable sectors of society were given primary protection first,” ani Galvez.

8 pang bansa, oks ang COVID-19 vax certificates – Malacañang

ni Lolet Abania | February 21, 2022

Walo pang karagdagang bansa ang kinikilala na ng gobyerno ang kanilang mga national COVID-19 vaccination certificates, ayon sa Malacañang ngayong Lunes.

Sinabi ni acting presidential spokesperson Karlo Nograles na ito ang inilabas ng Inter-Agency Task Force (IATF) sa ilalim ng Resolution 162-B, kung saan nire-recognize na ng pamahalaan ang mga COVID-19 vaccination certificates mula sa Egypt, Maldives, Palau, Albania, Estonia, Greece, Malta at Uruguay, aniya, “for purposes of arrival quarantine protocols, as well as for interzonal/intrazonal movement.”

“This is in addition to other countries/territories/jurisdictions whose proofs of vaccination the IATF has already approved for recognition in the Philippines, and without prejudice to such other proofs of vaccination approved by the IATF for all inbound travelers,” paliwanag ni Nograles.

Ayon pa kay Nograles, nagbigay na rin ng direktiba ang IATF sa Bureau of Quarantine, Department of Transportation - One-Stop-Shop at Bureau of Immigration, na kilalanin lamang ang mga katibayan o patunay ng vaccination na inaprubahan ng IATF.

Malusog si Pangulong Duterte – Malacañang

ni Lolet Abania | February 4, 2022

Malusog para sa kanyang edad si Pangulong Rodrigo Duterte, ito ang paniniyak ng Malacañang ngayong Biyernes.

Ginawa ni acting presidential spokesperson Karlo Nograles ang pahayag isang araw matapos niyang ianunsiyo na sumailalim sa quarantine si Pangulong Duterte makaraang ma-expose sa nagka-COVID-19 nitong kasambahay at nagtungo sa ospital para naman sa kanyang regular checkup, base na rin sa order ng doktor nito.

“Okay naman si Pangulo,” sabi ni Nograles sa isang news conference ngayong Biyernes.

“He is as healthy as any healthy individual at his age could be,” giit pa ni Nograles.

Si Pangulong Duterte ay 76-taong gulang na.

Ayon kay Nograles, batay sa naging assessment ng doktor ng Pangulo, lumabas na ang COVID-19 case exposure nito ay noong Enero 28.

“Upon the assessment of the physician, even if another household staff tested positive [for COVID-19] last Sunday, the President was not in close contact as per the circumstances,” ani Nograles.

“That is why his quarantine was cut short and ended yesterday, February 3,” sabi pa ng opisyal.

Kinumpirma naman ni Nograles na nagtungo ang Punong Ehekutibo para sa kanyang checkup sa Cardinal Santos Medical Center sa San Juan City, subalit hindi nito binanggit kung kailan ito naganap.

Nitong Huwebes, naglabas ng larawan si Senador Christopher “Bong” Go na ipinakitang si Pangulong Duterte ay naka-personal protective equipment (PPE) habang nakasuot din ng face mask at face shield sa loob ng isang kotse.

Sinasabing ang larawan ay kinuha nitong Huwebes ng hapon sa isang lugar sa Metro Manila.

Matatandaan na paulit-ulit na dini-dismiss ng mga aide ni Pangulong Duterte ang panawagan ng publiko para mag-isyu ang Palasyo ng medical bulletin hinggil sa kalusugan ng Pangulo, anila, “the Constitution only demands disclosure in the event of a serious sickness.”

Naganap ang huling public appearance ng Pangulo sa kanyang Talk to the People address noong Enero 24.

Ani Nograles, “presumably on Monday”, ang susunod na public appearance ni Pangulong Duterte.