Makati at Taguig, banggaan naman sa health facilities sa 10 EMBO

ni Gina Pleñago @News | September 26, 2023

Matapos ang ilang linggong pagsasalin ng hurisdiksyon ng mga health facilities sa 10 EMBO barangays na isinasagawa ng Department of Health (DOH) at ng kasunduang iayos ang petsa ng pag-transfer sa Oktubre 1, 2023 ay muli umanong sinimulan ng

Makati City ang pagpapakalat ng maling impormasyon.

Namahagi umano ang Makati ng isang press release na may pamagat na “Taguig’s ‘unreasonable’ rejection of Makati proposals impedes smooth transfer of city-owned health facilities, services – City Administrator”.

Pumalag ang Taguig LGU at sinabing ito ay nakakahiyang mga paglabag ng kasunduan sa DOH para sa Makati at Taguig na hindi dapat pinag-uusapan ang pagmamay-ari sa lupa at mga gusali habang nagpapatuloy ang pagtalakay sa transition upang hindi madiskaril ang pangunahing pakay ng isang maayos na pagsasalin ng hurisdiksyon mula sa Makati patungong Taguig.

Kung sinsero umano ang Makati ay tinanggihan na nito ang apela ng DOH na isantabi ang isyu sa ownership ngayong panahon ng transition.

Kaugnay naman sa Ospital ng Makati, binigyang diin sa press release nito na hindi kailanman tinanggihan ni City Mayor Lani Cayetano ang anumang mungkahi mula sa

Makati ngunit naipagpaliban lamang ito nang sabihin ni Health Secretary Teodoro Herbosa, na ang DOH Regional Director ang mangunguna sa alinmang talakayan

patungkol sa OsMak.

Bilang paglilinaw, sinabi ng Taguig na siya ang may nakakataas na legal na pag-aangkin sa pagmamay-ari ng lupa at mga pagbabago rito dahil ang Makati ay walang titulo sa mga lote at hindi ipinakita sa publiko ang mga titulo na sumuporta sa kanyang inaangkin.

Ipinamigay na school uniform at sapatos ng LGU, sablay

ni Mylene Alfonso @News | September 13, 2023

Dinagsa ng reklamo ang Makati LGU dahil sa mga umano'y palpak na school supplies na ipinamahagi sa mga estudyante.

Ayon sa mga magulang na naglahad ng kanilang saloobin sa social media, hindi na kasya sa kanilang mga anak ang mga polo, shorts at sapatos na ipinamahagi ng lokal na pamahalaan para sa pasukan.

Matatandaang sinabi ni Makati Mayor Abby Binay na "annual tradition" ang pamamahagi ng mga nasabing school supply sa mga estudyante sa Makati.

Sinabi pa nito na pati ang mga estudyante sa mga eskwelahan na sakop ng EMBO barangay na inilipat na sa hurisdiksyon ng Taguig ay makatatanggap ng mga ganitong supply upang masigurong handa sila para sa pasukan.

Ayon sa mga magulang, dapat ay may naganap na pagsusukat man lang bago nagsimula ang klase upang masigurado na magagamit ang mga nasabing damit at sapatos.

Nag-trending sa social media ang #Swap dahil sa mga magulang na naghahanap ng makakapalitan ng mga uniporme at sapatos para sa kanilang mga anak.

EMBO schools, bawal pakialaman — VP Sara.. Makati LGU, dedma sa utos

ni Mylene Alfonso @News | August 23, 2023

Hands-off dapat ang Makati City sa mga EMBO schools kasunod ng ipinalabas na order ni Vice President at Education Secretary Sara Duterte, subalit ilang guro ang nag-report ng paglabag ng lungsod sa kautusan.

Ilang guro mula sa mga paaralan ang nagpaabot ng kanilang report ng paglabag ng Makati City sa order ni Duterte kabilang na ang tangkang pagpapasok ng school supplies ng Makati LGU sa Pitogo High School.

Ang nasabing school supplies ay ipinadala umano sa pamamagitan ng courier service delivery ng Makati.

Ang tangkang pagpapasok ng school supplies ng Makati ay tinanggihan ng mga guro dahil batid nitong dapat may kautusan muna mula sa DepEd.

Patuloy pa rin umano ang paglalagay ng mga bagong tarpaulin sa mga EMBO schools na nakasaad na “This Property is owned by Makati City”.

Matatandaang sa hangarin na maalis ang tensyon sa pagitan ng Makati at Taguig, nagpalabas ng Memorandum No 23-2023 si Duterte na nag-uutos na ilagay sa direct authority ng DepEd ang 14 na public schools sa EMBO.

Ang DepEd Central Office ang may direct supervision sa management at administration habang hindi pa natatapos ang transition plan para sa paglilipat sa Taguig City ng mga EMBO schools.

Nakapaloob din sa memo na habang nasa transition period ang lahat ng kilos ng Makati at Taguig LGUs ay may pahintulot muna mula sa DepEd Office of the Secretary.