Plebisito sa paghahati ng Maguindanao, nakatakda sa Set. 17 — Comelec

ni Lolet Abania | June 23, 2022

Isang plebisito para sa ratipikasyon sa dibisyon ng Maguindanao na maging dalawang probinsiya ay nakatakdang isagawa sa Setyembre 17, 2022, batay sa anunsiyo ng Commission on Elections (Comelec) ngayong Huwebes.

Ayon kay acting Comelec spokesperson John Rex Laudiangco, naitakda ng Comelec en banc ang petsa para sa plebisito sa Maguindanao sa kanilang regular session.

Matatandaang inaprubahan at nilagdaan na maging batas ni Pangulong Rodrigo Duterte noong Mayo 27, 2021 ang Republic Act 11550, kung saan mahahati ang southern province sa Maguindanao del Norte at Maguindanao del Sur.

Sa ilalim ng Republic Act 11550 ay nakapaloob, “the law dividing the province of Maguindanao into Maguindanao del Norte and Maguindanao del Sur, the two provinces will be created upon approval by the majority of the votes cast by the voters of the affected areas in a plebiscite to be conducted and supervised by the Comelec within 90 days from the date of the effectivity of the law.”

Sa naturang batas, ang Maguindanao del Norte ay bubuuin ng mga munisipalidad ng Barira, Buldon, Datu Blah Sinsuat, Datu Odin Sinsuat, Kabuntalan, Matanog, Northern Kabuntalan, Parang, North Upi, Sultan Kudarat, Sultan Mastura, at Talitay.

Ang seat ng gobyerno nito ay Datu Odin Sinsuat. Ang Maguindanao del Sur ay bubuuin naman ng Ampatuan, Buluan, Datu Abdulla Sangki, Datu Anggal Midtimbang, Datu Hoffer Ampatuan, Datu Montawal, Datu Paglas, Datu Piang, Datu Salibo, Datu Saudi Ampatuan, Datu Unsay, Gen. Salipada K. Pendatun, Guindulungan, Mamasapano, Mangudadatu, Pagalungan, Paglat, Pandag, Rajah Buayan, Sharif Aguak, Sharif Saydona Mustafa, Sultan sa Barongis, Talayan, at South Upi. Ang seat ng gobyerno nito ay Buluan.

9 patay sa ambush sa Maguindanao

ni Lolet Abania | February 12, 2022

Patay ang siyam na indibidwal na sakay ng isang convoy ng maroon at itim na SUVs matapos na tambangan ng mga hindi nakilalang armadong kalalakihan sa Guindulungan, Maguindanao, ngayong Sabado ng umaga.

Ito ang kinumpirma ni Guindulungan Mayor Midpantao Midtimbang Jr., kung saan dead-on-the-spot ang mga biktima.

Sa inisyal na report, isang Kumander Peges Mamasainged alyas “Black Magic” ang umano’y target ng ambush.

Ayon kay Maguindanao Police spokesperson Police Lieutenant Fayeed Cana, ang grupo ni Mamasainged ay mga nakasakay sa tatlong SUVs, kung saan patungo ang mga ito sa Barangay Kitapok sa Datu Saudi Ampatuan para umano sa isang “rido” o clan war settlement sa pamilya ng isang Jordan Mamalintang at iselebra ang isang “kanduli” o thanksgiving nang maganap ang insidente sa Barangay Kalumamis.

Ani Cana, isa si Black Magic sa mga nasawi habang tatlo pa ang nasugatan.

Sa isang interview naman ngayong Sabado kay BARMM Regional Police Office PIO Police Lieutenant Colonel Cristio Lagyop Jr., sinabi nitong anim sa mga biktima ang kinilala na ng mga awtoridad.

Ayon kay Lagyop, bandang alas-8:30 ng umaga nangyari ang insidente sa Barangay Tambunan II sa naturang munisipalidad.

Batay sa Maguindanao Police Provincial Office, si Mamasainged ay miyembro ng Inner Guard base command ng Bangsamoro Islamic Armed Forces ng Moro Islamic Liberation Front (MILF).

Tinitingnan na rin ng mga awtoridad na away pamilya ang posibleng motibo ng ambush.

“Merong matagal nang alitan itong grupo ng victim at itong grupo ng suspek,” pahayag ni Lagyop.

PNP Chief Eleazar pinaiimbestigahan na ang nangyaring pagsabog ng hand grenade sa Maguindanao

ni Jasmin Joy Evangelista | October 25, 2021

Ipinag-utos ni Philippine National Police (PNP) Chief Police Gen. Guillermo Eleazar ang Police Regional Office-Bangsamoro Autonomous Region na magsagawa ng masusing imbestigasyon sa nangyaring pagsabog ng hand grenade malapit sa convoy ni Maguindanao Rep. Esmael “Toto” Mangudadatu noong Oktubre 23.

“Our police investigators should not leave any stone unturned in determining the motive and identifying the perpetrator of the grenade blast. Lahat ng anggulo ay ating titingnan sa insidenteng ito,” ani Eleazar.

Nangyari ang pagsabog ng granada nang dumaan sa detachment ng militar sa Guindulungan, Maguindanao noong Sabado ang convoy ng 20-30 sasakyan ni Mangudadatu at ng kanyang grupo.

“Isa lang sa maraming posibleng motibo sa insidente ang sinasabing pagtarget kay Maguindanao Rep. Esmael Mangudadatu. Maaari rin kasing nagkataon lang na dumaan ang convoy niya nang naganap ang insidente,” pahayag pa ng PNP Chief.

Samantala, inatasan din ni Eleazar ang lahat ng police units at tanggapan sa rehiyon na manatiling mapagmatyag at makipagtulungan sa militar upang maiwasan ang anumang pag-atake ng mga "lawless elements," lalo na ngayong panahon ng eleksiyon.