South Cotabato, niyanig ng magnitude 5

ni Mai Ancheta @News | August 27, 2023

Nakaranas ng malakas na pagyanig ang mga mamamayan ng South Cotabato na umabot sa magnitude 5 na lindol nitong Sabado ng madaling-araw.

Batay sa report ng Phivolcs, naitala ang pagyanig na tectonic origin alas-3:13 ng madaling-araw, dalawang kilometro ang layo sa bayan ng Surallah.

Naunang ini-report ng Phivolcs sa lakas na 5.5 magnitude ang lindol subalit kalaunan ay ibinaba ito sa 5.0 magnitude.

Dahil sa lakas ng pagyanig, naramdaman ito sa mga bayan ng Tupi, Banga, Polomolok, General Santos City, Kiamba at Maasim sa Sarangani sa lakas na intensity 4.

Naitala naman sa lakas na intensity 3 ang lindol sa mga bayan ng Alabel, Malungon, Malapatan, at Maitum sa Sarangani.

Wala pang ulat kung nagdulot ng pinsala sa South Cotabato ang malakas na pagyanig.

Nagbabala ang Phivolcs ng posibleng aftershocks sanhi ng malakas na paglindol.

Surigao del Sur, niyanig ng magnitude 5 na lindol

ni Lolet Abania | November 27, 2022

Niyanig ng magnitude 5 na lindol ang malayong baybayin ng Cortes, Surigao del Sur ngayong Linggo ng hapon, ayon sa Philippine Institute of Volcanology and Seismology (PHIVOLCS).

Alas-12:43 ng hapon, naitala ang lindol na tectonic ang pinagmulan habang may lalim na 11 kilometro. Namataan ang epicenter nito ng 35 kilometro northeast ng Cortes ng naturang lalawigan.

Nakapagtala naman ng Intensity II sa Tandag, Surigao del Sur at Intensity I sa Cabadbaran City, Agusan del Norte.

Ayon sa PHIVOLCS, kahit na walang pinsala na naiulat, asahan na ang mga aftershocks matapos ang lindol. Una nang nai-report ng PHIVOLCS ang lindol na nakapagtala ng magnitude 5.2, subalit ni-revise ito sa magnitude 5.0.

Davao Oriental, niyanig ng magnitude 5.4 na lindol

ni Ronalyn Seminiano Reonico | July 18, 2021

Niyanig ng magnitude 5.4 na lindol ang Governor Generoso, Davao Oriental ngayong Linggo nang umaga, ayon sa PHIVOLCS.

Unang naitala ang lindol kaninang alas-8:09 bilang magnitude 4.7 ngunit itinaas ito sa magnitude 5.4 na may lalim na 42 kilometers at ayon sa PHIVOLCS, inaasahang may magaganap na mga aftershocks.

Samantala, naramdaman din ang Intensity V sa Governor Generoso, Davao Oriental; Intensity IV sa Mati City, Davao Oriental; Intensity III sa Tampakan at Tupi, South Cotabato; Intensity II sa Davao City; General Santos City; Kidapawan City; Kiamba, Sarangani; at Intensity I sa Arakan, Cotabato.

Naitala rin ng PHIVOLCS ang Instrumental Intensity II sa General Santos City; Kidapawan City; Kiamba, Sarangani. Bukod sa posibleng aftershocks, nagbabala rin ang PHIVOLCS sa posibleng maitalang pinsala dahil sa lindol.