Pangarap na makapagpatayo ng bahay at grocery store, matutupad sa ikalawang pag-a-abroad

ni Maestro Honorio Ong @Kapalaran Ayon sa Inyong Numero | January 19, 2024

Dear Maestro,

Ako ay dating OFW. Umuwi ako rito sa ‘Pinas dahil sa pag-aakalang malaki-laki na ang naipon kong pera na ipinapadala ko sa aking nanay. Akala ko pupuwede na akong makapagpagawa ng bahay at makapagpatayo ng isang maliit na grocery.

Pero, hindi nangyari ang pangarap kong ito at huli na nang malaman kong nagamit pala ng magulang ko sa investment scam ang perang pinag-ipunan ko sa loob ng pitong taon sa abroad. Pilit naming hinahabol ang taong nanloko sa kanila, pero ngayon ay nagtatago na sila. Sa ngayon ay nag-a-apply ako at hindi ko alam kung makakaalis pa ako dahil medyo may edad na rin ako at parang tinatamad na akong mangibang-bansa dahil sa nangyari at nagkataon pang nagkaroon din ng depresyon ang nanay ko.

Sa palagay n’yo, malulusutan ba namin ang problemang ito? Ngayon ay may aplikasyon ako sa dati kong agency, matatanggap pa ba ako at kung oo, kailan naman ito mangyayari? June 9, 1985 ang birthday ko.

Umaasa,

Kate Bayugo ng Jalajala, Rizal

Dear Kate, 

Huwag ka nang malungkot at mag-alala, Kate, dahil isang batas ng kalikasan na hindi mapasusubalian na kapag may nawala, may darating muli at kapag may binawi, tiyak na muling may matatanggap. Sa isang pamilya, mapapansin na kapag mahina na sina lolo’t lola at malapit nang bumigay, may mga apo namang naglalakihan upang pumalit o dumagdag sa inyong angkan.Walang iniwan sa isang nabulok na bunga ng bayabas na nahulog sa sanga at nalaglag sa lupa. Sa susunod na araw, ang bulok na bayabas, kusang susupling ng maliliit na binhi mula sa nabulok na bunga ng bayabas at makalipas ang ilang taon, ang dating maliit na supling ng bayabas na nanggaling sa bulok na bunga ang siya namang mahihitik ng panibagong bunga. Ganyan ang natural na batas ng kalikasan na inorasyon ni Lord noong araw na dinisenyo ang kalikasan.

Ang problema, ang batas kalikasan na ipinapaliwanag natin ay hindi kadalasang nangyayari sa isang tao. Sapagkat, ang tao ay hindi tulad ng halaman at hayop dahil masyado siyang madaling sumuko. Ang tao kasi ay likas na mainipin.

Kumbaga, kaunting pagsubok lang ay nalulungkot at pinanghihinaan na agad tayo ng loob - tulad ng nasabi na, dahil sa kalungkutan at hina ng loob, imbes na umusbong at madagdagan ang dahon, agad itong namamatay. Kaya kapag tayo’y nawalan, hindi dapat tayo malungkot at magmukmok dahil sa bandang huli, maaari pa tayong magkakasakit, at baka ‘yun pa ang ikamatay natin.  

Kaya tama lang ang ginagawa mo, Kate. Bumangon at lumaban ka. Oo, lumaban at muli kang magsikap, kahit na medyo may edad ka na, mag-apply ka pa rin sa abroad.

Bumuo ka ng bago mong pangarap. Sapagkat ayon sa iyong Travel Calendar, tiyak ang magaganap ngayong 2024, sa edad mong 38, muli kang makapag-a-abroad, at sa ibayong dagat, muli kang makakapag-ipon ng sapat na salapi na magagamit mo upang maipagawa ang sira-sira n’yong bahay at kapag may sumobra, tuluyan mo na ring simulan ang binabalak mong grocery store hanggang sa tuluy-tuloy ka ng umunlad, lumago ang kabuhayan at tuluyan na muling lumigaya ang iyong pamilya.

Horoscope | January 19, 2024 (Biyernes)

ni Maestro Honorio Ong @Horoscope | Enero 19, 2024

Sa may kaarawan ngayong Enero 19, 2024 (Biyernes): Kabilang ka sa tinatawag na mapalad. Ikaw ay kusang dadapuan ng suwerte kahit na wala kang gawin.

ARIES (Mar. 21-Apr. 19) - Kumuha ka ng lakas sa sikat ng araw. May babala na hihina ang iyong kalusugan dahil sa sobrang pag-iisip at pagtatrabaho. Masuwerteng kulay-beige. Tips sa lotto-10-18-20-34-38-41.

TAURUS (Apr. 20-May 20) - Nakita ng nasa itaas na kapag nagpatuloy ang pananamlay mo maaari kang magkasakit, kaya kumilos ang langit upang ika'y pasiglahin. Masuwerteng kulay-blue. Tips sa lotto-2-15-20-24-30-37. 

GEMINI (May 21-June 20) - Ituloy mo lang ang diskarte mo. Huwag kang magpapaapekto sa mga taong negatibo. Wala kang mapapala sa kanila, kaya huwag kang makinig sa sasabihin nila. Masuwerteng kulay-black. Tips sa lotto-8-16-19-20-23-32. 

CANCER (June 21-July 22) - Nakahanda na ang langit na bigyan ka ng malaking suwerte. Itakwil mo ang mga hindi maganda, lalo na ang mga pananaw na makaluma. Masuwerteng kulay-violet. Tips sa lotto-7-11-16-28-33-37. 

LEO (July 23-Aug. 22) - Iyung-iyo ang araw na ito. Isang salita mo lang, agad na kikilos ang langit at ikaw ay pagbibigyan. Masuwerteng kulay-peach. Tips sa lotto-11-16-19-20-27-39.

VIRGO (Aug. 23-Sept. 22) - Huwag mo na bigyan ng halaga kung magugustuhan ba ng iba ang gusto mong gawin. Gawin mo agad at makakaasa ka na ang bendisyon ng langit ay tiyak na mapapasaiyo. Masuwerteng kulay-red. Tips sa lotto-5-14-21-26-34-45.

LIBRA (Sept. 23-Oct. 22) - Angat na angat ngayon ang magaganda mong katangian. Ito ang mensahe sa iyo ng iyong kapalaran. Masuwerteng kulay-burgundy. Tips sa lotto-3-9-17-22-27-36.

SCORPIO (Oct. 23-Nov. 21) - Marami ang umaasa sa iyo. Ipagpatuloy mo ang pagsasakripisyo. Ang langit na ang magreregalo sa iyo dahil sa kabutihang ipinapakita mo sa iyong kapwa. Masuwerteng kulay-white. Tips sa lotto-9-16-18-22-26-39. 

SAGITTARIUS (Nov. 22-Dec. 21) - Kambal-kambal ngayon ang suwerte mo, at ibahagi mo ito sa iyong mga kaibigan.  Masuwerteng kulay-green. Tips sa lotto-2-16-24-27-33-45. 

CAPRICORN (Dec. 22-Jan. 19) - Ingatan mo ang mga biyaya na mula sa langit. Hindi dapat ito masayang. Ang mga taong nag-iingat sa biyaya ay mas lalong pinagpapala. Masuwerteng kulay-yellow. Tips sa lotto-1-18-21-26-29-37.

AQUARIUS (Jan. 20-Feb. 18) - Huwag kang magyabang, at kapag natutukso kang magyabang. Isipin mo na minsan ay walang tumulong sa iyo sa oras ng iyong pangangailangan. Masuwerteng kulay-purple. Tips sa lotto-7-10-14-19-28-31.

PISCES (Feb. 19-Mar. 20) - Suwerte ka ngayon, pero may kondisyon na nagsasabing kahit na hindi humingi ng patawad ang nagkamali at nagkasala sa iyo, patawarin at ibalik mo ang inyong dating masayang pagsasama. Masuwerteng kulay-pink. Tips sa lotto-2-12-27-32-35-42.

Horoscope | January 18, 2024 (Huwebes)

ni Maestro Honorio Ong @Horoscope | Enero 18, 2024

Sa may kaarawan ngayong Enero 18, 2024 (Huwebes): Ginagarantiyahan ng araw ng iyong pagsilang na ikaw ay yayaman. Ito ay tiyak dahil ito ay nakaguhit sa iyong kapalaran.

ARIES (Mar. 21-Apr. 19) - Gawin mo ang gusto mong gawin. Aalalayan ka ng langit at ang mga kahinaan mo ay pansamantalang babalewalain. Masuwerteng kulay-white. Tips sa lotto-3-6-9-12-15, 27.

TAURUS (Apr. 20-May 20) - Bibigyan ka ngayon ng lakas ng kalooban na magagamit mo sa anumang layunin mo sa buhay. Ang prebilehiyong ito ay ipinagkakaloob sa iyo. Masuwerteng kulay-green. Tips sa lotto-9-17-29-33-36-42.

GEMINI (May 21-June 20) - Iwasan mong kumilos nang mabilis at hindi nag-iisip. Madami na ang nagsisi r’yan. Ito ang mensahe ng iyong kapalaran. Masuwerteng kulay-yellow. Tips sa lotto-7-16-2-31-34-40.

CANCER (June 21-July 22) - Ito ang araw na inilaan sa iyo. Gawin mo agad ang anumang maisip mo. Makikita mo, mangyayari at magkakatotoon ang lahat ng gagawin mo sa araw na ito. Masuwerteng kulay-purple. Tips sa lotto-11-19-20-25-29-38.

LEO (July 23-Aug. 22) - Iwasan mong uminit ang iyong ulo. Mas magandang lumayo sa mga hindi nakaiintindi at lalong maganda kung ikaw ay didikit sa nagpapasaya sa iyo. Masuwerteng kulay-pink. Tips sa lotto-1-10-13-28-37-45.

VIRGO (Aug. 23-Sept. 22) - Piliin mo ang tugma sa hilig mo. Sa ganitong paraan, hindi ka gaanong mahihirapan sa pagpapayaman. Masuwerteng kulay-beige. Tips sa lotto-9-14-17-21-30-34.

LIBRA (Sept. 23-Oct. 22) - Hindi nakakabigla kapag narinig mo na ikaw ang inspirasyon ng gustong magsikap. Ang totoo, marami ang lihim na idineklarang ikaw ay kanilang inspirasyon sa buhay. Masuwerteng kulay-blue. Tips sa lotto-6-15-24-33-39-42.

SCORPIO (Oct. 23-Nov. 21) - Huwag kang maghabol. Ikaw ang dapat habulin dahil ang dala mo sa mga tao ay suwerte kung saan kapag nawala ka sa kanila, papangit ang kanilang kapalaran. Masuwerteng kulay-black. Tips sa lotto-3-13-21-27-30-39. 

SAGITTARIUS (Nov. 22-Dec. 21) - Walang hangganan ang mararating ng gustong magtagumpay. Kaya kung hindi ka hihinto, magugulat ka dahil mas yayaman ka kaysa sa iba. Masuwerteng kulay-violet. Tips sa lotto-18-22-24-33-39-40.

CAPRICORN (Dec. 22-Jan. 19) - Makikitang nagsasawa ka sa araw-araw na galaw ng iyong buhay. Mag-ingat ka dahil baka mabihag ka ng mga mapagsamantala. Masuwerteng kulay-peach. Tips sa lotto-2-15-26-31-39-45.

AQUARIUS (Jan. 20-Feb. 18) - Isang simpleng ngiti mula sa iyong mga labi ay sapat na para mabago ang buhay ng tao na papunta sa pagganda ng kanyang kalagayan. Masuwerteng kulay-red. Tips sa lotto-7-16-25-28-29-35.

PISCES (Feb. 19-Mar. 20) - Kung sino ang makatuwaan mo ay susuwertehin, at kung sino naman ang iyong kaiinisan ay papangit ang kapalaran. Ikaw ang magdidikta sa buhay ng mga taong nasa paligid mo. Masuwerteng kulay-lilac. Tips sa lotto-1-4-10-19-22-37.