Mga dapat gawin sa pagsalubong ng Chinese New Year

ni Maestro Honorio Ong @Forecast | Enero 25, 2024

Bukod sa paglilinis, pagsusuot ng mga suwerteng kulay bilang preparasyon at pagsalubong sa Chinese New Year sa February 9, 2024. Ano pa nga ba ang dapat nating gawin upang tayo'y suwertehin sa buong taong ito?

Tulad ng naipaliwanag na kahapon, dapat ding maghanda ng pansit at iba pang uri ng pasta, dahil ang “mahabang pasta” ay siya ring sumisimbolo ng mahabang pagsasama, mahabang pagmamahalan at mahabang buhay.

Maghanda rin ng mga pagkaing malalagkit at matatamis sa hapagkainan upang mapanatili ang madikit at matamis na pagmamahalan ng bawat miyembro ng pamilya sa buong taong 2024.

Dagdag dito, ang 12 na uri ng prutas na hugis bilog ay mahalaga ring ihanda, at hindi dapat kalimutan ang prutas na pinya, dahil ang prutas na pinya ay nakakapagbigay ng suwerte at magandang kapalaran. 

Ang prosperity of bowl ay dapat ding ihanda sa ibabaw ng mesa na ilalagay naman sa sala ng inyong bahay, bilang pagsalubong sa Chinese New year sa darating na February 9.

Ang prosperity bowl ay dapat naglalaman ng 12 pirasong itlog na ipinalibot sa mangkok na nilatagan ng bigas. Isalit-salitan sa mga itlog ang laurel leaves at ang mga perang papel na binilog at tinalian ng kulay pulang ribbon. Pagkatapos, ilagay sa gitna ang kulay golden yellow na prutas na sunkist na sumisimbolo naman ng ginto at kayamanan. Hindi rin dapat mawala sa hapagkainan, ang walong klaseng nuts at mga bilog na matatamis na candies at chocolates. Kung saan, ito naman ay ang tinatawag na “tray of togetherness”. Ilagay ang iba't ibang uri ng nuts, candies at chocolates, sa maliit na walong platito o mangkok, at ilagay ito sa tray.

Ang tray of togetherness ay dapat na ipatong sa ibabaw ng mesa na laging nakikita ng bawat miyembro ng pamilya.  Tulad ng nasabi na, Pebrero 9 ng gabi ay dapat masaya na nating ipagdiwang at salubungin ang Chinese New Year upang matamo natin ang suwerte at magandang kapalaran sa buong taong 2024.

Ang lahat ng nasabing handa ay dapat na nasa ibabaw ng mesa sa pagsalubong sa Chinese New Year upang ang suwerte at magagandang kapalaran ay madaling masagap ng inyong pamilya.

Pagsapit naman ng alas-11:30 hanggang alas-11:59 ng gabi,  dapat din tayong mag-ingay bilang pagsalubong sa Year of  Green Wood Dragon, kung saan, pinaniniwalaang ang paglikha ng ingay ay pantaboy sa mga negative vibrations na nasagap natin  nitong nakaraang taong 2023, year of Black Water Rabbit at pampasuwerte. 

Bukod sa pag-iingay, ang pagsasabit ng ubas at 9 na palay sa harap mismo ng bahay ay pinaniniwalaang hihigop din ng suwerte at magandang kapalaran sa pagpasok ng taong Green Wood Dragon.

Pagdating naman ng alas-11:45 ng gabi, dapat din tayong magsaboy ng mga barya papasok sa sala. Ito ay dagdag suwerte, at pagdating ng alas-11:55 ng gabi, ilabas mo na sa iyong bulsa ang makapal na iba’t ibang uri ng pera at puwede rin dollar.

Pumuwesto ka sa entrance ng inyong bahay at bilangin mo ang makapal na perang papel na iyong hawak hanggang sa pumasok ang 2024 o ang year of the Green Wood Dragon o ang petsang February 10, 2024.

Kung saan, pinaniniwalaang ang pagbibilang ng makapal na halaga ng salapi ay daan upang sumagana ang iyong buhay, at madoble nang madoble ang iyong kita o income sa buong taong 2024.

Muli, manatili tayong nakasubaybay sa Forecast 2024 na eksklusibo n'yo lang mababasa sa pahayagang Bulgar upang marami pa kayong matutunan tungkol sa Chinese Element Astrology,  siyempre para mas umunlad, lumigaya ang inyong buhay sa pagpasok na pagpasok ng year of the Green Wood Dragon sa February 9 to 10, 2024.

Itutuloy… 

Mag-asawang baon sa utang, pangingibang-bansa ang sagot

ni Maestro Honorio Ong @Kapalaran Ayon sa Inyong Numero | January 25, 2024

Dear Maestro,

Limang taon na kaming nagsasama ng misis ko, pero kamakailan lang ay nag-away kami dahil sa pera. Marami kaming mga utang na hindi namin nabayaran dahil laging kapos ang sinusuweldo ko, at nang mag-away kami ng misis ko, umuwi siya sa kanila.

Gusto kong malaman kung babalik pa ba ang misis ko rito sa apartment namin o dapat ko na siyang sunduin? Gayundin, compatible ba kami at makakabayad pa ba kami ng mga utang? Nais ko ring malaman kung makakaahon pa kaya kami sa aming kabuhayan? Nahihirapan talaga kami ngayon. Ang birthday ng misis ko ay February 1, 1988 habang ako naman ay October 13, 1987.  

Umaasa,

Glenn ng Almanza Uno, Las Piñas City

Dear Glenn,

Kung Astro-Numerology na pag-aanalisa ang tatanungin, sadya at tunay ngang compatible kayo ng misis mong isinilang sa zodiac sign na Aquarius habang Libra ka naman. Ito ay dahil ang Libra at Aquarius ay may iisang elementong tinataglay – ang elementong air o hangin.

Sa Numerology naman ay ganundin, ang birth date mong 13 o 4 (ang 13 ay 1+3=4) ay tugma sa birth date niyang 1, dahil ang 4 at 1 ay may iisang planetang tinataglay – ang planetang Uranus-Sun.

Ibig sabihin, wala kang dapat gawin kundi sunduin na ang iyong misis sa mga biyenan mo, dahil siguradong sa taon ding ito ng 2024, paghumingi ka ng tawad sa kanya, muling mabubuo at magiging liligaya ang inyong pamilya.

Samantala, upang makaahon sa mga pagkakautang at kahirapang bumabalot ngayon sa inyong pamilya, iminumungkahi ng birth date mong 4 at 1 naman si misis na mag-apply kayo sa ibayong-dagat.

Sapagkat, ayon sa inyong Travel Calendar, sa susunod na taong 2025, sa buwan ng Setyembre hanggang Oktubre, isa sa inyo ni misis ang makapag-a-abroad, na siya na ring magiging simula o daan upang tuluy-tuloy na kayong makaaahon sa mga pagkakautang at kahirapan hanggang sa tuluyan nang umunlad ang inyong kabuhayan at sa taong 2039 sa edad mong 52 pataas, unti-unti na rin kayong yayaman.

Horoscope | January 25, 2024 (Huwebes)

ni Maestro Honorio Ong @Horoscope | Enero 25, 2024

Sa may kaarawan ngayong Enero 25, 2024 (Huwebes): Gamitin mo ang iyong imahinasyon para sa iyong negosyo. Ito ang susi upang ika'y yumaman.

ARIES (Mar. 21-Apr. 19) - Nagbababala ang araw na ito na maaari mong dayain ang iyong sarili. Kaya ang payo sa iyo, kung ano ang masalat ng kamay mo, iyon ang tunay na bilang ng yaman mo. Masuwerteng kulay-white. Tips sa lotto-3-6-18-27-30-33.

TAURUS (Apr. 20-May 20) - May suwerte ka sa pakikipag-ugnayan sa malayo. ‘Wag ka nang magdalawang-isip pa, dagdagan mo na ang iyong mga kaibigan. Masuwerteng kulay-green. Tips sa lotto-12-15-21-36-39-42.

GEMINI (May 21-June 20) - Mapapansin na malalim ang iyong iniisip, pero sa katunayan mababaw lang naman ito. Ang plano mong paglalakwatsa ay pagsasayang lamang ng oras at pera. Masuwerteng kulay-yellow. Tips sa lotto-5-14-23-29-32-41.

CANCER (June 21-July 22) - Tunay ngang napakasarap sa pakiramdam na mahalin tayo ng taong mahal natin, pero mas maganda pa rin kung mayroon din tayong pagmamahal para sa ating sarili. Sa ganitong paraan, hindi nila tayo maaabuso. Masuwerteng kulay-purple. Tips sa lotto-2-7-11-20-29-34-42.

LEO (July 23-Aug. 22) - Huwag kang makisali sa gulo ng iba. Dahil sa pananahimik at pagiging abala ang daan upang ika'y yumaman, umasenso at lumigaya. Masuwerteng kulay-pink. Tips sa lotto-4-10-22-28-37-40.

VIRGO (Aug. 23-Sept. 22) - Huwag kang magulat kung sunud-sunod na suwerte at magagandang kapalaran ang darating sa iyo. Ang mahalaga ngayon ay lagi kang pumunta sa mga lugar na malapit sa nature upang mas madami kang suwerteng masagap. Masuwerteng kulay-beige. Tips sa lotto-7-15-23-29-33-35.

LIBRA (Sept. 23-Oct. 22) - Kung ano ang gusto mong gawin, gawin mo. Kung mabigo ka man, ‘wag kang magdamdam. Masuwerteng kulay-blue. Tips sa lotto-9-12-27-30-42-45.

SCORPIO (Oct. 23-Nov. 21) - Sapat ang taglay mong kakayahan para muli mong maibalik ang  iyong kabuhayan. Bakit ka mag-alala, ‘di ba noong una ay nagsimula ka rin sa wala? Masuwerteng kulay-black. Tips sa lotto-6-18-21-24-33-39.

SAGITTARIUS (Nov. 22-Dec. 21) - Ito ang araw na papaunlad na nang papaunlad ang iyong buhay. Wala kang ibang dapat gawin ngayon, kundi ang kumilos.  Masuwerteng kulay-violet. Tips sa lotto-13-19-27-36-41-44.

CAPRICORN (Dec. 22-Jan. 19) - Sarili mo ang iyong pakinggan para hindi ka magkamali. Ito ang mensahe ng iyong kapalaran ngayon.

Masuwerteng kulay-peach. Tips sa lotto-8-17-22-26-35-40.

AQUARIUS (Jan. 20-Feb. 18) - Nakakatuwa ang mga mangyayari, 'yung mga bagay na hindi mo ginusto ay unti-unti mong matutupad. Masuwerteng kulay-red. Tips sa lotto-4-13-22-28-35-44.

PISCES (Feb. 19-Mar. 20) - Sukatin mo ang iyong sarili bago ka maglunsad ng bago at kakaibang teknolohiya. Dapat nakahanda ka para rito. Masuwerteng kulay-lilac. Tips sa lotto-7-16-20-25-34-43.