Babaeng may zodiac sign na Cancer, swak sa binatang may weak number

ni Maestro Honorio Ong @Kapalaran Ayon sa Inyong Numero | Pebrero 5, 2024

Dear Maestro,

Ako ay Taong Dos (2) dahil ako ay ipinanganak noong November 2, 1997. Ano ang ibig sabihin kapag ikaw ay Taong Dos at paano ka susuwertehin at magkakaroon ng isang maligaya na buhay? Wala pa rin akong girlfriend hanggang ngayon, kaya gusto ko ring malaman kung sinu-sino ang mga babaeng ka-compatible ko na dapat kong ligawan upang ako'y magkaroon ng matagumpay at maligayang pamilya?

Nais ko ring malaman kung kailan ako magkaka-girlfriend at ano ang zodiac sign ng magiging first girlfriend ko?

Umaasa,

Daren ng Talaba, Bacoor, Cavite

Dear Daren,

Ang zodiac sign mong Scorpio ay nagsasabing ka-compatible mo ang mga babaeng nagtataglay ng zodiac sign na Cancer, Pisces, Taurus at kapwa mo Scorpio, higit lalo silang may mga birth date na 7, 16, 25, 4, 13, 22, 31, 2, 11, 20 at 29, gayundin silang nagtataglay ng strong number na 8, 17, 26, 1, 10, 19 at 28. Sila ang mga babaeng dapat mong ligawan at magandang mapangasawa para magkaroon ka ng maligaya at matagumpay na pamilya. 

Upang buong lakas mo namang mahigop ang magagandang kapalaran, sa kabila ng katotohanang weak number o mahina ang numerong 2, dapat ka ring makisama sa mga taong nagtataglay ng strong number, tulad ng nabanggit na sa itaas, sila ang mga taong may birth date o kaya’y mas destiny number na 8, 17, 26, 9, 18, 27, 1, 10, 19 at 28. 

Ang mga taong nabanggit  ang makakatulong sa iyo sa lahat ng aspeto ng buhay, lalo na kung lagi kang didikit at sasama sa kanila. Habang ang mga taong may bitbit na numerong 7, 16, 25, 2, 11, 20, at 29 ay mga natural o kusa na magiging kaibigan mo, magiging mahalagang bahagi ng iyong buhay at magiging shoulder to lean on, kung saan, sa panahong may mabigat kang problema sila ang aagapay at tutulong sa iyo.

Ang pinakamapalad mo namang panahon ay mula sa ika-19 ng Enero hanggang sa ika-28 ng Pebrero, mula sa ika-19 ng Hunyo hanggang sa ika-28 ng Hulyo at mula sa ika-19 ng Oktubre hanggang sa ika-28 ng Nobyembre. Ang isa pa sa pinakamapalad mong panahon ay ang panahong nasa new moon, first quarter at full moon ang buwan sa langit.

Sa mga panahong nabanggit, kusang iigting ang mabuting kapalaran at sa mga panahon ding tinuran, magandang makipagsapalaran o lakarin ang mahahalagang plano at balakin sa buhay upang magkaroon ng positibong resulta at masigurado ang tagumpay. 

Berde, pula at itim naman ang mapalad na kulay na dapat at palagi mong gamitin upang mas mabilis mong mahigop ang magandang kapalaran. Habang ang batong topaz o kahit anong uri ng bato na nagtataglay ng kulay na pula o berde na ipalalamuti sa gold na singsing ay magsisilbi namang talisman upang hindi ka tablan ng mga negatibong pangyayari sa iyong buhay. Sa halip, ang nasabing hiyas ang magbibigay sa iyo ng dagdag na lakas ng loob at kakaibang suwerte habang ito ay patuloy mong isinusuot na nakadikit sa iyong balat.

Ayon sa Decadens ng Kapalaran, kusa namang lalakas ang natural na magnetismo ng iyong personalidad sa taong 2024, kaya sa eksaktong edad mong 26 pataas, walang sablay dahil sa nasabing panahon, magkaka-girlfriend ka na at habambuhay na magiging maligaya, hatid ng babaeng isinilang sa zodiac sign na Cancer.

Mga katangian ng ahas

ni Maestro Honorio Ong @Forecast | Pebrero 5, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Snake o Ahas. 

Ang Snake o Ahas ay silang mga isinilang noong taong 1929, 1941, 1953, 1965, 1977, 1989, 2001, 2013, at 2025. 

Bagama't likas na relihiyoso, misticismo at espiritwalidad ang Ahas, sinasabi ring may kakaibang sensual ito, ibig sabihin matalas ang kanilang pandama o five senses na nagiging dahilan kaya nalululong sila sa pagpapasarap ng buhay, masasarap na pagkain, at iba pang mga gawaing may kaugnayan sa pagpapasarap ng katawan, na kung minsan ito ang nagiging sanhi upang mapabayaan ng isang Ahas ang kanyang kalusugan, kaya kung hindi siya maglulubay sa kinahiligan niyang pagpapasarap, kadalasang natatagpuan ang isang Ahas na mataba at may pagka-chubby ang pangangatawan. 

Ang dapat sa isang Ahas upang patuloy siyang lumigaya, magkaroon ng malusog na pangangatawan at humaba ang kanyang buhay ay mas mainam na disiplinahin niya ang kanyang sarili sa layaw at pagpapasarap ng buhay.

Kaya nga, kapag ang isang Ahas ay natagpuan mong may disiplina sa sarili, ito ang Ahas na masasabing sobrang tagumpay at napakaligaya.

Dagdag dito, sinasabi ring bukod sa pagiging praktikal, kilala rin ang Ahas sa taglay niyang kakaibang kagandahan at pambihirang katalinuhan. Sa kabila ng positibo niyang talento, nakapagtatakang iniiwasan pa rin ng Ahas ang lipunan. Sa halip, mas gusto niyang nasa tahimik na gubat o kuweba lang, dahil mas gusto niya ng katahimikan, sinasadya niya ring umiwas sa lipunan hangga’t maaari. Pero, dahil nga siya ay likas na maganda at matalino, kadalasan kinakawayan siya ng lipunan.

At sa sandaling namang napasama ang isang Ahas sa umpukan o sa mga gawaing may kaugnayan sa lipunan. Hindi naman maiiwasan ng isang Ahas na magduda at maghinala sa kanyang mga kasama. Dahil dito, kung makikipagsosyalan man ang isang Ahas at napasama sa isang grupo o sa mga magkakaibigan, asahan mo na ang istilo ng kanyang pakikisama ay masyadong napakaingat, pero hindi naman niya pinapahalata ang ugaling iyon sa kanyang mga kasama.

Kaya kung iniisip mong lamangan o dayain ang isang Ahas, ito ay sobrang malabong mangyari at maganap.

Samantala, sinasabing kaya naman pala mahilig sa pag-iisa at hindi masyadong nakikipagsalamuha ang isang Ahas ay dahil tulad ng nasabi na, alam niya na kapag nalaman mo ang kanyang lihim na itinago ay maaari mo itong ibisto. Kaya nga ang Ahas ay hindi masyadong nakikipagkaibigan dahil sa 12 animal signs, ang Snake o Ahas ang siya number one sa mga napakaraming inililihim sa buhay.

Samantala, dahil nga may malalim na misteryo o hiwaga sa panloob at panlabas na pagkatao ng isang Ahas, bukod sa taglay niyang kakaibang karisma at katalinuhan.

Sinasabing sa sandaling pumasok ang Ahas sa isang silid, agad na mapapalingon ang lahat sa kanya, dahil sa kakaibang pang-akit na wala sa ibang mga animal signs.

Kaya habang nagma-mature sila, mas lalong dumarami ang kanilang mga lihim at lantarang tagahanga na kung hindi nila itong iiwasan, may babala na maaga at biglaan silang makapag-aasawa.

Itutuloy…

Horoscope | February 5, 2024 (Lunes)

ni Maestro Honorio Ong @Horoscope | Pebrero 5, 2024

Sa may kaarawan ngayong Pebrero 5, 2024 (Lunes): Bibilis ang iyong pagpapala. Kaya bilisan mo rin ang pag-iisip at pagkilos, dahil malapit ka na sa pagyaman.

ARIES (Mar. 21-Apr. 19) -  Huwag mong balewalain ang maliliit na suwerte na nag-aabang sa iyo dahil kapag ito ay iyong pinahalagahan, lalaki ito nang lalaki hanggang sa 'di mo na ito masukat. Masuwerteng kulay-lilac. Tips sa lotto-3-11-24-26-31-35.

TAURUS (Apr. 20-May 20) - Hahabulin ka ng saya kahit pa maglungkut-lungkutan ka. Mas magandang yakapin mo ang saya nang sa gayun ay magdatingan sa buhay mo ang masasaya at nakatutuwang mga pangyayari. Masuwerteng kulay-white. Tips sa lotto-9-12-24-33-40-45.

GEMINI (May 21-June 20) - Ngayon ay araw mo, ang sinumang kumontra sa iyo ay makararanas nang 'di magandang kapalaran. Samantala, ang mga taong aayon sa iyo ay bubuwenasin. Masuwerteng kulay-green. Tips sa lotto-5-17-23-31-38-41. 

CANCER (June 21-July 22) - Masasabi mo sa mga araw na ito na ang buhay pala sa mundo ay isang malaking biro. Ang inaakala mong pangit na pangyayari ay siya palang pagmumulan ng iyong mga suwerte. Masuwerteng kulay-yellow. Tips sa lotto-2-7-11-20-29-34.

LEO (July 23-Aug. 22) - Mabilis na susulong ang iyong kabuhayan kapag binilisan mo ang pagpapasya sa mga magagandang pagkakataong nakalatag sa iyong harapan. Ito ang mensahe ng iyong kapalaran ngayon. Masuwerteng kulay-purple. Tips sa lotto-1-4-10-13-28-32. 

VIRGO (Aug. 23-Sept. 22) - Bigyang sigla mo ang mga taong nawalan ng pag-asa. Pakitaan mo sila ng simpatya at iparamdam mo na ang lungkot ay napapalitan din ng saya. Masuwerteng kulay-pink. Tips sa lotto-9-14-18-21-25-34. 

LIBRA (Sept. 23-Oct. 22) - Magparaya ka! Hindi kabawasan sa iyo kung paminsan-minsan ay masisingitan ka ng iyong kapwa. Masuwerteng kulay-beige. Tips sa lotto-7-11-19-22-30-45.

SCORPIO (Oct. 23-Nov. 21) - Lalaki nang lalaki ang kikitain mo kapag pinagbutihan mo ang iyong negosyo. Masuwerteng kulay-blue. Tips sa lotto-9-18-22-31-40-44. 

SAGITTARIUS (Nov. 22-Dec. 21) - Kumikislap ang mga bituin, ikaw din ay kikislap ngayon dahil ang magandang kapalaran na  hindi mo inaasahan ay mag-uunahang gumuhit sa iyong buhay. Masuwerteng kulay-black. Tips sa lotto-6-9-18-24-35-45. 

CAPRICORN (Dec. 22-Jan. 19) - Dumikit ka sa mga taong masayahin upang ika'y sumaya. May dagdag pakinabang ka dahil kapag sumaya ka ang mga suwerte ay magsisidapo sa buhay mo. Masuwerteng kulay-violet. Tips sa lotto-4-13-28-31-35-40.

AQUARIUS (Jan. 20-Feb. 18) - Huwag mong hanapin ang nawala, kahit hindi na sila bumalik huwag kang mabahala. Ang harapin at paghandaan mo ngayon ay ang magandang bukas na magbibigay sa iyo ng tunay na ligaya. Masuwerteng kulay-peach. Tips sa lotto-6-8-17-22-26-34.

PISCES (Feb. 19-Mar. 20) - Kahit wala kang gagawin sa labas, lumabas ka pa rin. Ang ganitong pagkilos ang daan upang mabuhay ang iyong suwerte. Masuwerteng kulay-red. Tips sa lotto-2-7-20-25-29-34.