Horoscope | Pebrero 13, 2024 (Martes)

ni Maestro Honorio Ong @Horoscope | Pebrero 13, 2024

Sa may kaarawan ngayong Pebrero 13, 2024 (Martes): Marami ang kokontra sa iyo. Ito ang mangyayari dahil nasasagap na nila ang kahihinatnan ng iyong tagumpay at pagyaman.

ARIES (Mar. 21-Apr. 19) - Magtiwala ka sa iyong sarili at ‘wag kang mangamba, dahil mula ngayon at sa susunod pang mga araw, ikaw ay makikitang paangat nang paangat hanggang sa tuluyan kang yumaman. Masuwerteng kulay-pink. Tips sa lotto-3-16-19-21-29-34.

TAURUS (Apr. 20-May 20) - Huwag kang maniwala sa mga taong mapaglaro. Sasaya ka sa kanila, pero hanggang saya lang ang kaya nilang ibigay sa iyo. Masuwerteng kulay-lilac. Tips sa lotto-6-9-12-27-36-42.

GEMINI (May 21-June 20) - Mamili ka ng isa sa napakaraming bagay na gusto mong gawin. Nanonood sa iyo ang nasa itaas. Sa susunod na mga araw, ang lahat ng piliin mo ay magkakaroon na ng kaganapan at katotohanan. Masuwerteng kulay-silver. Tips sa lotto-5-19-22-31-40-45.

CANCER (June 21-July 22) - Kung sino ang nasa malapit, ‘yun ang iyong lapitan. Huwag ka na maghanap sa malayo. Masuwerteng kulay-green. Tips sa lotto-2-17-28-35-42-45.

LEO (July 23-Aug. 22) - Ang mga bagay na aayusin palang ay magiging sanhi ng pagkaantala ng malalaking pera. Masuwerteng kulay-yellow. Tips sa lotto-1-18-27-33-38-44.

VIRGO (Aug. 23-Sept. 22) - Kumonsulta ka sa kakilala mong may maunlad na hanapbuhay. Masuwerteng kulay-blue. Tips sa lotto-5-14-20-28-32-45.

LIBRA (Sept. 23-Oct. 22) - Timbangin mo ang mga oportunidad na nasa iyong harapan. Masuwerteng kulay-maroon. Tips sa lotto-3-12-19-24-38-44.

SCORPIO (Oct. 23-Nov. 21) - Huwag mong hadlangan ang iyong sarili dahil ito ang madalas mong nagiging pagkakamali. Masuwerteng kulay-red. Tips sa lotto-5-17-25-33-40-45.

SAGITTARIUS (Nov. 22-Dec. 21) - Mamamahinga ngayon ang iyong kapalaran. Kapag nakapagpahinga ka, mas lalakas ang iyong karisma at suwerte. Masuwerteng kulay-lavender. Tips sa lotto-6-18-23-27-35-42.

CAPRICORN (Dec. 22-Jan. 19) - Hinahon ang kailangan mo sa harap ng masalimuot na sitwasyon. Sa pagiging mahinahon masosolusyunan mo ang iyong mga problema. Masuwerteng kulay-gold. Tips sa lotto-7-11-25-31-35-42.

AQUARIUS (Jan. 20-Feb. 18) - Nagbabalita ang mga araw sa ngayon  na ang mga magagandang kapalaran ay magdadatingan na sa iyo. Masuwerteng kulay-peach. Tips sa lotto-4-17-21-27-34-41.

PISCES (Feb. 19-Mar. 20) - Dapat kang tumibay sa rami ng mga pagsubok na iyong pinagdaanan. Kikilos ang langit upang bigyan ka ng premyo at handugan ng mga oportunidad. Masuwerteng kulay-aquamarine. Tips sa lotto-1-14-25-34-39-40.

Mga propesyon na swak sa Kabayo

ni Maestro Honorio Ong @Forecast | Pebrero 12, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Horse o Kabayo.

Ang Horse o Kabayo ay silang mga isinilang noong taong 1930, 1942, 1954, 1966, 1978, 1990, 2002, 2014 at 2026.

Isa sa pinakamasayang karanasan ng Kabayo ang paglalakbay at pamamasyal. Sa gawaing ito, tunay ngang higit silang nagtatagumpay.

Kaya naman pagdating sa career at sa larangan ng propesyon, bagay na bagay sa Kabayo ang mga gawaing kung saan-saan siya nadedestino, na-a-assign at napupunta.

Ang gawain iyon ay talaga namang hinahanap-hanap ng kanilang puso at katawan.

Karamihan sa mga Kabayo ay maagang umaalis sa poder ng kanilang pamilya o mga magulang, pagtumungtong sila sa kanilang pagbibinata at pagdadalaga ang gusto ng kanilang kaluluwa ay ang lumaya, magkaroon ng sariling diskarte at pamamaraan sa buhay.

Sa pakikisalamuha sa lipunan at sa pakikipag-ugnayan sa kanilang kapwa, sinasabing ang Kabayo ay masarap na kaibigan at masarap na kasama, ngunit hindi sila magaling sa pagbibigay ng advice o payo lalo na sa mga seryosong problema. Para sa mga Kabayo, ang buhay ay hindi naman dapat seryosohin. Sa halip, mas maganda umano kung itutuon ang ating isipan at karanasan sa paglalakwatsa at pagpapasarap ng buhay.

'Yan mismo ang summum bonum o the highest or ultimate good na nasa puso ng mga Kabayo.

At dahil nga masarap kasama ang Kabayo, masarap din silang maging kaibigan, tunay ngang magaling din silang magkuwento. Kaya naman karamihan sa mga Kabayo ay may malalaking grupo ng kaibigan, palabarkada, mahilig sa gimmick, outing, picnic, mountain climbing at pamamasyal.

Dahil dito, iniisip ng mga nakakakita sa kanila na bihira lang sa mga Kabayo ang nagpapahalaga sa salapi. Sa katunayan, hindi talaga sila nakakapag-ipon dahil mas pinapriyoridad nila ang mga bagay na may kaugnayan paglalakwatsa, gala, paglilibang at adventure hanggang sa hindi nila namamalayan na roon na pala napupunta ang malaking bahagi ng kanilang budget o buwanang kinikita.

Kaya naman, kapag hindi natutong mag-ipon ng pera ang mga Kabayo, walang duda, babagsak ang kanilang kabuhayan at magiging isa sila sa pinakakawawang hayop sa 12 animal signs na tila isang ulilang sisiw na sisiyap-siyap sa isang sulok, dahil sa hindi pagtatabi para sa kanilang future.

Sa pag-ibig at pakikipagrelasyon, sinasabing higit na ka-compatible ng isang Kabayo ang Tigre, Aso at Tupa. Sapagkat, lilimitahan ng Aso ang pagiging lakwatsera at lakwatsero ng isang Kabayo para matuon sa kanya ang atensyon ng Kabayo. Habang itutulak naman ng Tigre ang Kabayo upang lalo pang maging masaya at maligaya ang kanilang gagawing pamamasyal dahil ang hinahanap din ng puso ng isang Tigre ay ang pamamasyal.

Makakaramdam naman ng comfort ang Kabayo sa piling ng isang mabait, malabing, maasikaso at mapagmahal na Tupa.

Makakasumpong naman ng ganap na laya ang Kabayo sa piling ng isang Ahas, Unggoy, Kuneho, Baboy at Tandang. Kung saan, secondary compatibility ng Horse ang nasabing mga animal sign na pupuwede nilang makasama sa pagbuo ng isang masaya at panghabambuhay na pamilya.

Manatiling nakasubaybay sa Forecast 2024 na eksklusibo n’yo lang mababasa sa pahayagang Bulgar upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024. 

Itutuloy…

Lalaking ‘di naliligo, compatible sa 25-anyos na babae

ni Maestro Honorio Ong @Kapalaran Ayon sa Inyong Numero | Pebrero 12, 2024

Dear Maestro,

Marami na akong nakarelasyon, pero lahat sila ay nauwi rin sa wala. Sa ngayon mayroon akong nobyo, sa social media kami nagkakilala, pero nagkita na kami at naging maayos naman ang lahat.

Ayon sa kanya, two years na siyang hiwalay sa live-in partner niya at may bago na rin umanong ka-live-in ‘yung babae kaya malaya na raw siya. Okey naman ang pagde-date namin at magaan din ang loob namin sa isa’t isa. 

Sa palagay n’yo ba magtatagal ang aming relasyon? Siya na rin kaya ang itinakda sa akin ng kapalaran na makasama ko habambuhay? 

Ang birthday ko ay February 12, 1999 habang August 4, 1998 naman ang birthday ng boyfriend ko. 

Umaasa,

 Yvena Valerie ng Minuyan Proper, SJDM, Bulacan

Dear Ms. Yvena Valerie,

Ayon sa Oriental Astrology, tunay ngang ka-compatible mo ang Leo dahil siya ang ka-opposite attract mo. Kung saan, ang Aquarius ay air type sign habang ang Leo naman ay fire type sign. 

Sa aktuwal na pangyayari, air ang nagpapalakas ng siklab at alab ng mahinang apoy, kaya naman complementary compatible na matatawag ang relasyong Aquarius at Leo.

Dagdag pa rito, ang birth date na 13 o 4  (ang 13 ay 1+3=4) ng lalaking tinutukoy mo ay siya rin namang numero ng zodiac sign mong Aquarius dahil ang Aquarius na under sa planetang Uranus ay may katumbas na numerong 4. 

Kaya sa pisikal na deskripsiyon at mga gawain, kung may pagka-weird at kakaiba ang kanyang trabaho, ang nature ng kanyang propesyon o background ng kanyang pamilya at sa personal naman niyang buhay, kapag tila hindi siya naliligo at laging aburido sa kanyang pagmumukha, ito ay mga palatandaang siya na ang lalaking itinakda sa iyo ng kapalaran.

Mapapansin mo kaya naging ganyan ang resulta ng iyong “Astro-Numero-relationship chart analysis”, sapagkat kung matatandaan mo, noon ay malimit kang mahiwalay.

Bagkus, tulad ng nasabi na, ang nakatakda talaga sa iyo ay ang lalaking may kakaibang pagkatao, propesyon o background ng kanyang pamilya.

Samantala, ayon sa iyong Love Calendar, umikot man nang umikot sa kabiguan at pakikipaghiwalay ang iyong karanasan sa larangan ng pag-ibig at pakikipagrelasyon, sa panahong itinakda ng kapalaran, mapapanatag din ang lahat. 

Sa paghinto ng roleta ng kapalaran, makakasumpong ka na ng tunay at pangmatagalang relasyon na nakatakdang mangyari ngayong 2024 sa edad mong 25 pataas, hatid ng isang lalaking nagtataglay ng unique na pagkatao o kakaibang istilo ng personalidad at ang lalaking makakasama mo sa pagbuo ng maligaya at panghabambuhay na pamilya na may  zodiac sign na Leo.