Horoscope | Marso 21, 2024 (Huwebes)

ni Maestro Honorio Ong @Horoscope | Ika-21 Araw ng Marso 2024

Sa may kaarawan ngayong Marso 21, 2024 (Huwebes): Pinagpapala ka dahil sa kabutihang loob mo sa iyong kapwa. Huwag kang  hihinto sa pagmamalasakit kahit pa na ‘di sila marunong tumanaw ng utang na loob.

ARIES (Mar. 21-Apr. 19) - Tatalunin ka ngayon ng iyong damdamin.  Ang inaayawan mong bigyan ng tulong sa nagdaan ay ngayon mo matutulungan. Ito ang mensahe ng iyong kapalaran sa mga araw na ito. Masuwerteng kulay-violet. Tips sa lotto-9-18-27-33-39-45.

TAURUS (Apr. 20-May 20) - Huwag kang pumanig sa kahit na kanino. Ang tagapamagitan ay dapat nasa gitna at ang unang isinusulong ay ang pagkakaayos ng dalawang panig. Masuwerteng kulay–peach. Tips sa lotto-6-15-19-23-34-44.

GEMINI (May 21-June 20) - Puso sa puso, ito ang malabo mong magagapi, kahit pa kilala ka sa katalinuhan. Dahil ang matatalino ay may puso rin naman na tulad mo. Masuwerteng kulay-red. Tips sa lotto-5-9-14-21-27-32.

CANCER (June 21-July 22) - Kung sino ang gusto mong suwertehin, siya ay pagkakalooban ng langit ng mga suwerte. Huwag mong kalimutan na ang una mong dapat isipin ay ang iyong sarili. Masuwerteng kulay-aquamarine. Tips sa lotto-3-7-11-29-35-41.

LEO (July 23-Aug. 22) - Pakikinggan ka kapag banayad ang iyong pagsasalita. Pero kapag nag-utos ka ng pagalit, ito naman ay may masamang epekto sa kalusugan. Masuwerteng kulay-white. Tips sa lotto-4-13-28-36-42-48.

VIRGO (Aug. 23-Sept. 22) - Madali kang malalapitan ngayon. Mas magandang iwasan ang mga taong dumidikit sa iyo, lalo na silang nakangiti papalapit sa iyo na animo’y ngiting aso. Masuwerteng kulay-green. Tips sa lotto-10-16-25-31-40-44.

LIBRA (Sept. 23-Oct. 22) - Huwag kang makihalo sa magulong usapan. Mas maganda kung ano ang gusto mo, gawin mo na agad. Masuwerteng kulay-yellow. Tips sa lotto-6-18-21-29-37-45.

SCORPIO (Oct. 23-Nov. 21) - Huwag mong ipagdamot ang mga natututunan mo. Sa ganitong paraan, hindi ka rin pagdadamutan ng langit. Masuwerteng kulay-purple. Tips sa lotto-4-19-22-28-39-41.

SAGITTARIUS (Nov. 22-Dec. 21) - Panatilihin mong nakasayad ang mga paa mo sa lupa, lalo na sa ngayong paangat nang paangat ang iyong buhay. Masuwerteng kulay-pink. Tips sa lotto-2-17-21-27-43-45.

CAPRICORN (Dec. 22-Jan. 19) - Huwag kang papadaya sa iyong nakikita at naririnig. Ikaw ang dapat magpasya. Sa ganitong paraan ka uunlad at susuwertehin. Masuwerteng kulay-beige. Tips sa lotto-8-15-24-37-41-44.

AQUARIUS (Jan. 20-Feb. 18) - Napapabuti ang mga kalagayan ng taong marunong makinig ng payo habang minamalas naman ang buhay ng mga taong matitigas ang ulo. Ang payo sa iyo ay ipagpaliban mo kung ano ang nasimulan n’yong negosyo. Masuwerteng kulay-blue. Tips sa lotto-11-17-26-35-39-40.

PISCES (Feb. 19-Mar. 20) - Kontrolin mo ang taong malapit sa iyo bago ka pa niya makontrol. Kumbaga, unahan muna siya para ‘di ka niya alipinin. Masuwerteng kulay-black. Tips sa lotto-5-19-22-29-34-45.

‘Di gustong tumandang binata… Kelot, babaeng natitipuhan ang ka-compatible

ni Maestro Honorio Ong @Kapalaran ayon sa Palad | Marso 20, 2024

KATANUNGAN

1. Nakakahiya man aminin, 38-anyos na ako pero hanggang ngayon binata pa rin ako. Nagkaroon naman na ako ng girlfriend, kaya lang hindi ito nagtatagal dahil nasa abroad ako.

2. Pero ngayon, may nililigawan akong babae na isinilang noong September 24, 1988. May pag-asa kayang maging girlfriend ko siya? 

3. Sana siya na ang nakaguhit sa aking palad upang magkaroon na ako ng sariling pamilya, nagkakaedad na rin kasi ako, pero wala pa ring nangyayari sa mga naipon at naipundar ko.

KASAGUTAN

1. Medyo napadulo ang Marriage Line (Drawing A at B. 1-M arrow a.) sa kaliwa at kanan mong palad. Makikita ang nasabing guhit ng pag-aasawa hindi sa gitnang bahagi, sa halip ay mas malapit sa daliri ng kalingkingan o hinliliit (arrow a.). Ito ay malinaw na tanda na ang iyong pag-asawa ay magaganap humigit-kumulang sa edad mong 39 pataas. Ibig sabihin, kung hindi ngayong 2024, malamang sa susunod na taon ka pa makakapag-asawa.

2. Pansinin mo ring tuwid na tuwid ang pagkakapahalang ng iyong Marriage Line (arrow a.) sa kaliwa at kanan mong palad. Ito ang tinatawag na “good looking marriage line”, na nangangahulugan ng maligaya at panghabambuhay na pag-aasawa na siya ring pinapangarap ng bawat indibidwal na tulad mong malapit nang tumandang binata.

3. Ang maligayang pag-aasawa ay kinumpirma rin ng iyong lagda na suwabeng-suwabe mong isinulat, walang bumabalik na guhit sa direksyong pakaliwa. Sa halip, malinaw at tuluy-tuloy na umusad patungong kanan na nagtapos sa isang straight line na stroke. Ibig sabihin, ito ay malinaw na tanda na sa sandaling nakapag-asawa ka, habambuhay ka nang liligaya sa piling ng kaisa-isang babaeng malaon mo nang tinatangi-tangi at minahal sa kasalukuyan. 

DAPAT GAWIN

Ayon sa iyong mga datos, hindi magtatagal at tuluyan nang mahuhulog ang loob sa iyo ng babaeng nililigawan mo na nagtataglay ng zodiac sign na Libra at pagsapit ng 2025 sa edad mong 39 pataas, siya na ang iyong mapapangasawa at makakasama sa pagbuo ng isang maligaya at panghabambuhay na pamilya.

Baboy, lapitin ng suwerte at magandang kapalaran

ni Maestro Honorio Ong @Forecast | Marso 20, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Boar, Pig o Baboy. 

Ang Boar, Pig o Baboy ay silang mga isinilang noong 1923, 1935, 1947, 1959, 1971, 1983, 1995, 2007, 2019 at 2031.

Dahil likas na matulungin at mapagmahal sa kanilang kapwa, sadya namang lapitin ng suwerte at magagandang kapalaran ang mga isinilang sa Taon ng Baboy. Para sa kanila, kung ano ang nasa puso mo, gawin mo. Kaya naman sa huli, bumubuti at lalong nagiging buwenas ang kanilang kapalaran.

Dagdag pa rito, batid ng mga Baboy na ang natural na batas ng kalikasan ang nagbibigay sa kanila ng suwerte at magandang kapalaran, hangga’t patuloy silang naglilingkod sa kanilang kapwa at gumagawa ng kabutihan.

Tulad ng Baka, ang mga Baboy ay nagsisikap at nagtitiyaga rin, ngunit ang kaibahan nila, ginagawa ito ng mga Baboy nang may arte, lambing at saya dahil ang pagiging malambing at masayahin ay isa sa mga pangunahin nilang katangian.

Kaya naman ang mga Baboy ay hindi basta dinadatnan ng lungkot at kamalasan dahil tulad ng nasabi na, anuman ang dumating sa kanilang bahay, itinuturing nila itong may maganda at mabuting kauuwian dahil batid ng mga Baboy na sadyang malakas sila sa nasa itaas. Kaya anuman ang sapitin nila, sa huli, sila ay kusang pinapatnubayan, binibigyan ng suwerte at magandang kapalaran ng langit.

Kaya ang isa pang keyword na sadyang magiging pangunahing kapalaran ng isang Baboy ay sadya silang sinusuwerte at pinagpapala ng langit kapag patuloy silang nagpakita ng kabutihan sa kanilang kapwa. Lalo na sa ngayong Green Wood Dragon, mas marami pang mga biyaya at pagpapala silang makakamit na kung saan-saan manggagaling, lalo na sa buwan ng Oktubre hanggang Disyembre sa taong ito ng 2024.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….