Bebot, hopeless matagpuan si ‘Mr. Right’

ni Maestro Honorio Ong @Kapalaran ayon sa Palad | Marso 26, 2024

KATANUNGAN

1. Minsan na akong nabigo sa pag-ibig at hindi lang isang beses kundi marami na. Dahil dito, parang ayaw ko nang umibig pang muli dahil baka mabigo na naman ako. Kaya lang, natatakot naman akong tumandang dalaga at habambuhay na nag-iisa.

2. Maestro, dapat ba muli akong magtiwala sa mga lalaki? Natatakot kasi akong lokohin at abusuhin muli ang aking kahinaan.

3. Sa ngayon may isa po akong anak sa pagkadalaga at nais kong sa kanya na lang ibuhos ang buong buhay ko.

4. Dapat bang umibig akong muli at mag-asawa o ‘wag na lang?  May guhit ba sa palad ko na nagsasabing susuwertehin ako?

KASAGUTAN

1. Ganito ang sabi ng isang dakilang American Author na isang bingi at bulag sa katauhan ni Helen Keller, “When one door of happiness closes, another opens; but often we look so long at the closed door that we do not see the one which has been opened for us.” Tingin kasi tayo nang tingin sa saradong pinto ng dating nawalang kaligayahan, pero ang hindi natin napapansin, marami pang bagong pinto ang kusang nabubuksan upang tayo ay muling lumigaya at magmahal.

2. Suwetung-suweto ang kasabihang sinipi sa itaas sa mga taong bigo sa pag-ibig, kung saan ang nakaraang kabiguan nila ang palaging naaalala at tinitingnan, kaya tuloy ang mas magagandang oportunidad ng buhay na abot-kamay na nila ngayon ay hindi namamalayang dumadating na pala. Pero dahil sa kasawian tayo nakatingin, ang ligaya sana ngayon ay tuluyang umalpas.

3.  “Umibig kang muli at magmahal”— ‘yan ang nais ipagawa sa iyo ng gumanda at naayos na Heart Line (Drawing A. at B. h-h arrow a.) sa gitna hanggang sa dulong bahagi (arrow a.) ng kaliwa at kanan mong palad. Tanda na kung maluwag sa loob mo na kalimutan ang mga nakaraang kabiguan sa pag-ibig at pakikipagrelasyon, suwabeng-suwabe na darating sa iyong harapan ang mas masaya at matagumpay na pakikipagrelasyon. Ito ay madali namang kinumpirma ng ikalawang mas malinaw, mahaba at makapal na Marriage Line (Drawing A. at B. 2-M arrow b.) sa kaliwa at kanan mong palad. Tanda na sa edad mong 25, hindi imposibleng makatagpo ka ng lalaking tapat, mabait at matino na iibigin ka habambuhay, hindi dahil sa iyong nakaraan kundi dahil kung ano ka ngayon.

DAPAT GAWIN

Ayon sa iyong mga datos, Ashanna, sa taon ding ito ng 2024, muli mong buksan ang iyong puso, limutin ang nakaraang kabiguan at umibig muli para pagsapit ng taong 2025, sa buwan din ng Oktubre hanggang Nobyembre, isang tapat at wagas na pakikipagrelasyon ang mararanasan mo. Ito ay hatid ng lalaking isinilang sa zodiac sign na Virgo, kung saan ang iyong relasyon ay hahantong sa isang maligaya at panghabambuhay na pagpapamilya.

Horoscope | Marso 26, 2024 (Martes)

ni Maestro Honorio Ong @Horoscope | Ika-26 Araw ng Marso 2024

Sa may kaarawan ngayong Marso 26, 2024 (Martes): Malayo ang iyong mararating. Ibig sabihin, magtatagumpay ka sa buhay at hindi lang isang larangan ang iyong mapagtatagumpayan.

ARIES (Mar. 21-Apr. 19) - Gamitin mo ang iyong imahinasyon. Malaki ang maitutulong nito sa pagpapaganda ng takbo ng negosyo. Gayundin, malaki ang kikitain mo rito. Ito ang mensahe ng iyong kapalaran sa araw na ito. Masuwerteng kulay-violet. Tips sa lotto-9-15-18-21-24-33.

TAURUS (Apr. 20-May 20) - Dito sa mundo, ang lahat ay nagkokopya. Kaya nga hindi masamang mangopya, lalo na kung ito ay paparisan mo ng magagandang pormula na magpapaunlad sa buhay mo. Masuwerteng kulay-peach. Tips sa lotto-3-12-27-39-42-45.

GEMINI (May 21-June 20) - Makikitang naglalaro ang iyong isipan sa mga puwede mong gawin na magbibigay sa iyo ng kasiyahan. Hindi puwedeng manatili kang naglalaro, kailangan mong mamili sa mga ito. Masuwerteng kulay-red. Tips sa lotto-5-14-17-26-34-38.

CANCER (June 21-July 22) - Madali kang mapapaniwala sa mga pagkakakitaan na sa biglang tingin ay mabilis kang yayaman. Ang payo ay nagsasabing huwag kang sumuko, sa halip, sila ay agad mong layuan. Masuwerteng kulay-silver. Tips sa lotto-2-11-20-34-37-40.

LEO (July 23-Aug. 22) - Isip ang iyong sundin at huwag ang iyong damdamin. Hindi basta-basta sumusugod ang isip kaya ang pagkakamali at pagsisisi sa huli ay maiiwasan. Masuwerteng kulay-white. Tips sa lotto-1-19-25-29-31-44.

VIRGO (Aug. 23-Sept. 22) - Intindihin mong mabuti ang mga ipapayo ng iyong malapit na kaibigan dahil siya ang higit na nakakikilala sa iyo. Masuwerteng kulay-green. Tips sa lotto-2-5-14-19-22-34.

LIBRA (Sept. 23-Oct. 22) - Nakakatuwa ang mga kaganapan. Aakalain mong ikaw ay napaniwala pero ang totoo, mahilig ka lang naman magpasakay kung saan sa dulo ay ikaw ang nakikinabang. Masuwerteng kulay-yellow. Tips sa lotto-6-15-27-29-35-39.  

SCORPIO (Oct. 23-Nov. 21) - Namumuo gaya ng bagyo ang iyong suwerte. Hindi pa man aktuwal na dadapo sa iyo, may mga ilang palantandaan na ang buhay mo ay papaganda nang papaganda kesa sa kasalukuyan. Masuwerteng kulay-purple. Tips sa lotto-9-17-22-28-35-44.

SAGITTARIUS (Nov. 22-Dec. 21) - Marami kang matututunan sa pakikinig sa mga kuwentuhan kahit sila ay pangkaraniwang nilalang. Ito ang mensahe ng iyong kapalaran ngayon. Masuwerteng kulay-pink. Tips sa lotto-5-16-23-25-39-45.

CAPRICORN (Dec. 22-Jan. 19) - Mamasyal ka para manariwa ang iyong isipan. Sa pananariwa ng iyong isipan, mananariwa rin ang magagandang alaala ng iyong nakaraan na magiging inspirasyon mo sa kasalukuyan. Masuwerteng kulay-beige. Tips sa lotto-8-19-22-28-39-45.

AQUARIUS (Jan. 20-Feb. 18) - Kapag napansin mong napaniwala ka sa maling pananaw, ibalik mo sa dati ang iyong sarili. Masuwerteng kulay-blue. Tips sa lotto-4-16-20-25-32-40.

PISCES (Feb. 19-Mar. 20) - Suwerte ka ngayon at sa ilang araw pa na darating. Makipagsapalaran ka para masabi mong ikaw ay mapalad. Kung wala ka namang gagawin, bubuwenasin ka pa rin naman. Masuwerteng kulay-black. Tips sa lotto-1-13-19-22-29-35.

Pagsusuot ng itim at dilaw na damit, daan upang gumanda ang kapalaran

ni Maestro Honorio Ong @Kapalaran Ayon sa Inyong Numero | Marso 25, 2024

Dear Maestro,

Naisipan kong sumangguni sa inyo dahil napansin ko na lagi akong minamalas sa buhay. Ilang beses na akong nag-try mag-abroad, ngunit lagi itong palpak. Ano ba ang dapat kong gawin upang mawala na ang mga kamalasan sa aking katawan?  Sana maturo n’yo rin sa akin ang mga paraan upang ako’y suwertehin. 

Maestro, okey na ba ang aking lagda o may dapat pa kong baguhin para gumanda ang aking kapalaran lalo na ngayong 2024? March 2, 1991 ang birthday ko.

Umaasa,

Irish ng Kaparangan, Orani, Bataan

Dear Irish,

Madali lang suwertehin ang isang Pisces na tulad mo na may birth date na 2, at may destiny number na 7 (naging 7 dahil 3+2+1991=1996/ 19+96=115/ 11+5=16/ 1+6=7). Kung saan ang birth date mong 2 at destiny number na 7 ay itinuturing na weak number.

Para lumakas ang iyong pagkatao at lumisan na ang mga kamalasan sa iyong buhay, iminumungkahi na magsuot ka ng kulay itim na siyang ginagamit ng mga weak number sa “do or die” na labanan.

Kapag nagsuot ka ng damit na kulay itim, may mala-dramatikong pangyayaring darating sa buhay mo, dahil ang itim ay siya ring kulay ng dark forces na siya ring kulay ng “anino” na nakakapagtaka kapag nagsindi ka ng kandila, hindi ba’t apoy o liwanag lang ang iyong gusto, pero kusang nagkakaroon ng anino o shadow ang nasabing kandila. Sa lahat ng liwanag, laging may anino. Nangyaring ganu’n, dahil ang itim o kadiliman ay co-equal din na tinatawag nilang good. Ngunit, sa mas malalim ng pilosopiya, pareho lang naman ang dilim at liwanag na may iisang kapangyarihan.

Bueno, mabalik tayo sa kulay na itim na siyang grand final color para sa mga weak number at bigo sa buhay na tulad mo na nagtataglay ng number 2 at 7. Iyan muna ang gawin mo para makita mo ngayong 2024 hanggang 2025 na may malaking pagbabago ang magaganap sa iyong career at sa mismong buhay mo.

Simula ngayon, kapag lagi kang nagsuot ng itim, ikaw ay tatawaging “woman in black” na siya ngang swak na kulay para sa mga may weak number na tulad mo.

Samantala, kung sawa ka na sa nasabing kulay, puwede mo namang ipalit ang kulay na golden yellow o kahit anong kulay na dilaw. Silang dalawa dapat ang lagi mong suotin upang suwertehin ka.

Hinggil naman sa iyong lagda, okey na ang ikalawa mong lagda, habaan mo na lang ang dulong bahagi, at sikaping maging straight line. Sa ganyang pirma, tulad ng nasabi na, tuluy-tuloy kang aasenso at liligaya.

Kapag nasunod mo na ang mga simpleng rekomendasyon sa itaas, tiyak ang magaganap sa mid year hanggang sa last quarter ngayong 2024 hanggang sa pagpasok na pagpasok ng taong 2025, sa edad mong 33 pataas, iba’t ibang uri ng mga suwerte at magandang kapalaran ang magdaratingan sa iyong karanasan.