Mga dahilan kaya sinusuwerte ang mga Ox

ni Maestro Honorio Ong @Forecast | Ika-3 Araw ng Abril, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Ox o Baka. 

Ang Ox o Baka ay silang mga isinilang noong 1925, 1937, 1949, 1961, 1973, 1985, 1997, 2009, 2021, 2033. 

Ang animal sign na Ox o Baka ay may zodiac sign na Capricorn sa Western Astrology na pinaghaharian ng planetang Saturn. Ibig sabihin, upang higit na lumigaya at magtagumpay ang mga taong isinilang sa animal sign na Ox, ang kailangan sa taong ito ng 2024 ay magsumikap sila, dahil sa pamamagitan ng “hard work” tunay ngang makakamit ng Ox ang tagumpay at magandang kapalaran sa buong taon ng Green Wood Dragon.

Dagdag dito, sinasabi ring ang animal sign na Ox ay sadyang mapalad tuwing sasapit ang ala-1 hanggang alas-3 ng umaga, habang ang kanilang masuwerteng direksyon para sa isang Ox ay ang hilaga at hilagang-silangan.

Bukod sa pagiging masipag at masikap, ang mga taong isinilang sa animal sign na Ox, ay sinasabi ring maaasahan, nakaayos ang kanilang ginagawa, at kalmado lang sa buhay, dahil pinaghahandaan na nila ang kanilang future o kinabukasan.

Bukod sa maaasahan ang mga indibidwal na naiimpluwensyahan ng animal sign na Ox, kilala rin sa pagiging makatarungan. Kung saan, hindi sila nagpapabaya sa pangako na kanilang binibitiwan. Dahil mahalaga sa kanila ang “word of honor” lalo na pagdating sa pagnenegosyo at kalakalan, kaya karamihan sa kanila ay umuunlad at yumayaman.

Dahil nga masipag at praktikal, kung minsan kinukulong din nila ang kanilang sarili sa imahinasyon, pagpaplano at pangarap. Ngunit, hindi naman talaga ganu’n. Sa halip, ang ibig sabihin lamang nito ay gusto lang nila kung ano ang kanilang ginagawa sa ngayon at nasimulan nilang gawin.

Kaya ang akala ng iba ay kulang sa imahinasyon at pagpaplano ang mga Baka dahil para sa mga Baka, mas simple at mas madaling gawin ‘yung tumpak at

makakapagbigay sa kanila ng kasaganahan at kaligayahan sa kanilang buhay.

Dahil ang Baka ay hindi gaanong mahilig sa komplikado at mabusising mga gawain, tulad ng nasabi na, marami silang mga accomplishment at madali nilang natatapos ang mga gawaing nakaatang sa kanilang mga balikat.

Kaya naman, kung ikaw ay isang manager o supervisor at nagkaroon ka ng isang tauhan na isinilang sa animal sign na Ox, tunay ngang ikaw ay sadyang magiging mapalad, dahil nagkaroon ka ng kasama o tauhan, na bukod sa masipag ay talaga namang maaasahan at sunod lang nang sunod sa anumang bagay na ipag-uutos mo.

Bukod sa maaasahan, sila ay nagtataglay din ng kakaibang kasipagan at sadyang mapagmahal sa pribado at tahimik na buhay.

Ang Baka ay sinasabi ring hindi masyadong mahilig sa lipunan at ang mas pinahahalagahan nila ang trabaho at mga bagay na pagkakaperahan.

Wala rin sa bukabularyo ng isang Baka ang salitang pagyayabang o kayabangan, iniiwasan din nila ang maluho at marangyang pamumuhay, kaya naman sinasabing karamihan sa mga Baka bukod sa masipag, tuso at may pagkamateryoso ay madaling umuunlad ang kabuhayan hanggang sa tuluy-tuloy na yumaman.

Tunay nga bihirang-bihira ka makakakita ng isang Baka na sa edad 55 ay hindi pa mayaman. Kung saan, sa sandaling tumanda ang isang Baka ng lagpas 50, walang duda tiyak na siya ay may masagana at maunlad ng kabuhayan na maihahanay at masasabing ang tusong Baka na ito ay isa sa mayayaman at lalo pang yumayaman sa kanilang lugar.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Horoscope | Abril 3, 2024 (Miyerkules)

ni Maestro Honorio Ong @Horoscope | Ika-3 Araw ng Abril 2024

Sa may kaarawan ngayong Abril 3, 2024 (Miyerkules): Maraming pagpapala ang nakapila para sa iyo. Kaya ipagpatuloy mo lang ang iyong pangarap.

ARIES (Mar. 21-Apr. 19) -  Gandahan mo ang pananalita nang sa gayun, maging maganda rin ang pagsasama n’yo. Masuwerteng kulay-beige. Tips sa lotto-3-12-27-33-42-44.

TAURUS (Apr. 20-May 20) - Kung ano ang ihip ng hangin, sakyan mo lang. Ito ang susi ng  tagumpay upang hindi ka magkaroon ng mga kontrabida sa buhay mo hanggang sa tuluyan mong makuha mo ang gusto mo. Masuwerteng kulay-blue. Tips sa lotto-6-15-18-21-33-45.

GEMINI (May 21-June 20) - Bilang isang katuwaan ngunit isa ring seryosong bagay. Kapag may malapit sa iyo na may mataas na ranggo, maaari kang humiling sa kanya ng mga gusto mo sa buhay. Masuwerteng kulay-black. Tips sa lotto-5-14-23-28-34-41.

CANCER (June 21-July 22) - Hindi mo makukuha ang mga pinapangarap mo, pero liligaya ka naman ng sobra. Langit ang magpapasya kung ano ang makakabuti para sa iyo. Masuwerteng kulay-violet. Tips sa lotto-8-10-19-29-32-40.

 LEO (July 23-Aug. 22) - Hayaan mo lang na umagos ang ilog. Makikita mo, ang mga biyaya ay daraan sa iyo na nagsasabing, makakapili ka ng mga bagay na magpapasaya sa iyo. Masuwerteng kulay-peach. Tips sa lotto-1-11-16-28-33-44. 

VIRGO (Aug. 23-Sept. 22) - Ipahiram mo ang magagandang ideya sa mga taong may mataas na posisyon. Kailangan nila ito, para mas lalong gumanda ang takbo ng mga pangyayari sa kanila. Masuwerteng kulay-red. Tips sa lotto-5-14-26-34-40-45.

 LIBRA (Sept. 23-Oct. 22) - Hindi nagbibiro ang mahiwagang salamin sa dingding. Ang ibabalita nila sa iyo ay ang mas magandang kapalaran mo. Masuwerteng kulay-maroon. Tips sa lotto-3-12-24-27-33-39. 

SCORPIO (Oct. 23-Nov. 21) - Kontrolin mo ang sarili mo. Huwag mo nang ulitin ang nakaraan na kung saan nagalit ka na para bang bulkan na sumabog. Mas magiging matiwasay ang buhay, kung magpaparaya ka na lang. Masuwerteng kulay-white. Tips sa lotto-6-19-22-26-35-40.

SAGITTARIUS (Nov. 22-Dec. 21) -  Iyo ang araw na ito. Hinihintay na ng langit ang iyong mga kahilingan, humiling ka para sa personal mong kaligayahan at humiling ka rin para sa mga malalapit sa puso mo. Ang lahat ng ito ay matutupad at magkakatotoo. Masuwerteng kulay-green. Tips sa lotto-1-10-23-34-29-41.

CAPRICORN (Dec. 22-Jan. 19) - Kung saya at inspirasyon ang nakukuha sa iyo ng ibang tao, ano’ng dahilan para lumayo ka? Ito ang isipin mo. Masuwerteng kulay-yellow. Tips sa lotto-4-11-17-22-39-45. 

AQUARIUS (Jan. 20-Feb. 18) - Ikaw ang tagapamagitan upang magbigay ng biyaya. Kaya kung ano ang kailangan ng iba, sabihin mo sa mas nakakataas sa kanila. Masuwerteng kulay-purple. Tips sa lotto-8-19-27-31-40-44.

PISCES (Feb. 19-Mar. 20) - Hindi man kalakihan at karamihan ang mga biyaya, sapat na ito para masabi mong hindi ka kinalimutan ng langit. Ito ang mensahe para sa iyo. Masuwerteng kulay-pink. Tips sa lotto-2-7-16-24-30-33.

Hopeless nang yumaman… MAG-ASAWA, SURE NA PAPALARIN SA NEGOSYO

ni Maestro Honorio Ong @Kapalaran Ayon sa Inyong Numero | Abril 2, 2024

Dear Maestro, 

Naisipan kong sumangguni sa inyo dahil madalas na sinasabi n’yo na ang mga Taong Singko ay yumayaman. Pero bakit hanggang ngayon, sa edad kong 40 ay hindi pa rin ako yumayaman? Masipag naman kaming mag-asawa na nagtatrabaho at nagsisikap sa buhay. April 14, 1984 ang birthday ko habang December 8, 1988 naman ang birthday ng asawa ko. Kailan kaya kami yayaman at sa paanong paraan? Iniisip din naming magnegosyo ng tindahan ng bigas, angkop kaya sa amin ito? Sabi naman ng misis ko mag-abroad na lang ako. Maestro, ano ba ang dapat naming gawin para kami ay yumaman?

Umaasa

Daren ng Bagong Barrio, Pandi, Bulacan

Dear Daren,

Kapag ang tao ay napakaraming iniisip o sabihin na nating maraming laman ang kanyang isip at kung anu-ano ang gustong gawin sa buhay, malabo silang yumaman. Ganu’n kasi ang mga taong naiimpluwensyahan ng numerong 4. 

Bukod sa numerong 14 o 5, naiimpluwensyahan ka rin ng numerong 4, na siya namang destiny number mo. Naging kuwatro (4) ang destiny number mo dahil ang April 14, 1984 ay ganito kinokompyut:  4+14+1984=2002/ 20+02=22/ 2+2=4.

Kaya ang susi sa pagyaman at pagtatagumpay sa buhay ay konsentrasyon. Sapagkat kung iisang negosyo, pagkakakitaan, layunin o gawain lamang ang pinagtutuunan n’yo, malabo kayong mabigo.

Dahil dito, simulan mo nang ibuhos ang buo mong atensyon at panahon sa iisang bagay na gustung-gusto mong gawin. Halimbawa, ang naisip mo na mag-abroad, puro pag-a-abroad lang ang gawin mong paraan upang yumaman. Kung ang naiisip mo namang paraan ay negosyo, tulad ng pagnenegosyo ng bigas at palay, mamimili ka ng palay at ibenta mo sa mga miller, tiyak na roon ka yayaman.

Kaya pag-usapan n’yo ang pinakatamang proyekto na tututukan n’yo dahil nagkataong compatible ang birth date mong 14 o 5 sa birth date niyang 17  o 8, ganundin ang zodiac sign mong Aries sa zodiac sign niyang Sagittarius, tiyak ang magaganap. Limang taon lang ang hinihingi ng kapalaran na makapag-concentrate kayo sa iisang larangan o tumbok na proyekto, sa taong 2029 sa edad mong 45, mararamdaman n’yo ang unti-unting pagyaman habang patuloy n’yong ibinubuhos ang atensyon, panahon at lakas sa iisang depenidong gawain, tuluy-tuloy kayong yayaman hanggang sa tuluyan nang tanghaling isa sa pinakamayamang pamilya sa inyong lugar.