Horoscope | Abril 18, 2024 (Huwebes)

ni Maestro Honorio Ong @Horoscope | Ika-18 Araw ng Abril 2024

SA MAY KAARAWAN NGAYONG ABRIL 18, 2024 (Huwebes): Ginagarantiyahan ng araw na ito ang iyong pagsilang. Mahalin at pahalagahan mo ang mga biyayang napapasaiyo.

ARIES (Mar. 21-Apr. 19) - Para sa iyo ang araw na ito. Ang nakakatuwa, ang mga araw na darating ay para pa rin sa iyo. Huwag mong sayangin ang magagandang bagay na hinuhulog sa iyong kamay. Masuwerteng kulay-violet. Tips sa lotto-5-10-28-30-34-45.

TAURUS (Apr. 20-May 20) - Magpakita ka ng tapang upang ipakita rin sa iyo ng langit ang malaking premyo. Masuwerteng kulay-peach. Tips sa lotto-3-19-20-35-38-42.

GEMINI (May 21-June 20) - Huwag kang magmadali. Ang mga bagay na nakukuha sa mabilis na paraan ay mabilis ding nawawala. Mas maganda kung isabuhay mo ang positibong paghihintay. Masuwerteng kulay-red. Tips sa lotto-19-20-28-30-35-41.

CANCER (June 21-July 22) - Kung ano ang wala ka, iyon ang pangarapin mo. Ito ang susi para gumanda ang takbo ng iyong buhay. Masuwerteng kulay-orange. Tips sa lotto-12-18-26-37-41-45.

LEO (July 23-Aug. 22) - Humugot ka ng lakas sa mga nakaraang pagsubok na iyong napagtagumpayan. Sa ganitong paraan, ang iyong mga pinagdaanan ay iyo ring malalampasan. Masuwerteng kulay-white. Tips sa lotto-16-25-30-33-35-43.

VIRGO (Aug. 23-Sept. 22) - Hindi masama ang mangopya. Sa katunayan, ang mga taong gumagaya sa magagandang ginawa ng iba ang pinupuri at hinahangaan. Masuwerteng kulay-green. Tips sa lotto-19-24-27-35-38-44. 

LIBRA (Sept. 23-Oct. 22) -Kahit hindi mo kailangan, kunin at ipamigay mo pa rin sa mga nangangailangan. Kapag ganito ang ginawa mo, pagpapalain at bibigyan ka pa ng langit ng suwerte. Masuwerteng kulay-yellow. Tips sa lotto-18-29-31-33-34-43. 

SCORPIO (Oct. 23-Nov. 21) - Tumulong ka kahit na nangangailangan ka rin ng tulong. Masuwerteng kulay-purple. Tips sa lotto-9-11-16-22-30-50.

SAGITTARIUS (Nov. 22-Dec. 21) - Makibahagi ka sa pag-iipon ng mga bagay na makakatulong sa mga taong nangangailangan. Kapag pinagsama-sama ang isang bagay, dadami rin ito tulad ng butil sa isang sakong bigas. Masuwerteng kulay-pink. Tips sa lotto-10-16-27-33-36-44.

CAPRICORN (Dec. 22-Jan. 19) - Nasa dulo ng dilim ang liwanag, kaya magpatuloy ka! Hindi ka dapat sumuko ngayon. Masuwerteng kulay-beige. Tips sa lotto-6-8-16-18-26-49.

AQUARIUS (Jan. 20-Feb. 18) - Mabilis na nawawala ang makapal na ulap sa kalangitan. Gayundin, ang ulap ng mga suliranin na dumarating sa iyong buhay. Kaya dapat kang maging matatag. Masuwerteng kulay-blue. Tips sa lotto-21-29-30-31-47-51.

PISCES (Feb. 19-Mar. 20) - Una-unahan lang. Ang mga unang dumating muna ang bigyan mo ng oras. Ibig sabihin, ‘di maganda kung pagsasabayin mo ang mga nakikita mong magagandang bagay. Masuwerteng kulay-black. Tips sa lotto-6-10-15-26-35-43.

Mga mapalad na buwan at araw para sa mga Tigre

ni Maestro Honorio Ong @Forecast | Ika-17 Araw ng Abril, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Tigre o Tiger. 

Ang Tigre o Tiger ay silang mga isinilang noong taong 1926, 1938, 1950, 1962, 1974, 1986, 1998, 2010 at 2022. 

Ngayong 2024, aangat nang husto ang enerhiya at kasiglahan ng Tigre. Kasabay nito, masasagupa nila ang iba’t ibang masalimuot na pagbabago at pangyayari. Sa panahong ito, masusubok ang kanilang husay, galing at katatagan sa mga nakakakabang pagdedesisyon. Kung tama ang kanilang pagpapasya, ang mga suliranin at problema ay tiyak na maiko-convert sa positibong kaganapan. Susuwertehin at magtatagumpay ang mga Tigre ngayong 2024. 

Gayunman, alalahanin n’yo na anumang mangyari at maganap, huwag kang masyadong magpapaka-stress sa mga pangyayari. Sapagkat, kung magdedesisyon ka basta-basta, ‘yung mga suwerte at magagandang kapalaran na hawak mo ngayong 2024 ay maaaring mawala. Ibig sabihin, sa pagiging kalmado, mas matitiyak ang tagumpay at ligaya ngayong Green Wood Dragon.

Sinasabing sa first quarter ng taong ito, maraming mga pagsubok at suliranin silang mararanasan. Bagama’t may mga bagong proyekto at oportunidad na darating, kasabay nito ang mga panibagong responsibilidad na magpapairita sa kanilang karanasan. Mas mainam na mag-relax sa panahong ito, kesa sumuong sa malalaking venture na maaaring magdulot ng problemang pangkalusugan.

Sa second quarter naman, unti-unti nang huhupa ang mga negatibong pangyayari na naranasan nila noong nakaraang buwan. Magsisimula na muling umangat ang kanilang kita. Kasabay nito, gaganda na rin ang kanilang career at maraming oportunidad na pangmateryal na bagay ang mabubuksan. Ito ang panahong dapat nilang itago ang malaking halaga ng salapi na darating at mahahawakan nila para hindi masayang at maubos sa walang kabuluhang paggastos. 

Sa panahon ding ito, unti-unti nang ngingiti ang panibagong pag-ibig at masayang pakikipagrelasyon na hindi inaasahan ng Tigre.

Habang sa ikatlo hanggang last quarter ngayong 2024, magkahalong suwerte at saya ang kanilang mararanasan na may sundot ng manaka-nakang pagbabago na magdudulot ng kakaibang suliranin ngunit sa bandang huli ay may malaking sorpresa na pagkakakitaan at pagdoble ng kabuhayan.

Sa business, career at pangangalakal, bagama’t aangat ng bahagya ang kinikita sa aspetong pangkabuhayan ngayong 2024, hindi naman pinapayagan na ang isang Tigre na mag-invest ng malaking halaga, dahil may babala na ma-scam lang sila. Kaya naman kung susubukan nilang magnegosyo o mangalakal, dapat nilang iwasan na maglabas ng malaking puhunan. Sa halip, ang dapat nilang piliin ay ang investment o negosyong maliiit lang ang puhunan. Sa ganyang paraan, maiiwasan nilang mawalan ng malaking halaga ng salapi. 

Samantala, pinapaalala rin na kung sakaling may dumating na biglaang suwerte at halaga ng salapi na hindi inaasahan ngayong 2024, mas mainam na itabi o ipunin na lang ito at gawing savings or security para sa future.

Sa pag-ibig, kung ikaw ay isang single, ngayong taon n’yo na matatagpuan ang bago at mas masayang pag-ibig, higit lalo kung nakalimutan n’yo na nang lubusan ang mga taong nanggulo sa inyong nakaraan. Kaya naman, maging positibo lamang kayo at laging tumingin sa magagandang bahagi ng iyong buhay upang magdatingan ang mga sorpresa at masasayang pag-ibig na tiyak namang  maghahatid ng isang maligaya at nakakakilig na romansa ngayong 2024.

Dagdag dito, sinasabi ring sa buong taon ng Green Wood Dragon, likas at sadyang mapalad ang Tigre, mula sa ika-19 ng Enero hanggang sa ika-28 ng Pebrero, mula sa ika-19 ng Mayo hanggang sa ika-29 ng Hunyo at mula sa ika-19 ng Setyembre hanggang sa ika-19 ng Nobyembre.  

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Bf na may iba pang babae, ka-compatible kaya sure na makakatuluyan

ni Maestro Honorio Ong @Kapalaran Ayon sa Inyong Numero | Abril 17, 2024

Dear Maestro 

May boyfriend ako na may live-in partner. Hindi pa naman sila mag-asawa at wala pa rin isang taon ang pagsasama nila, gayundin, wala pa silang anak.

Mas mahal niya raw ako kesa sa kinakasama niya kaya naniwala naman ako. Sa ngayon, madalas na may mangyari sa amin. Ang ipinagtataka ko, mahal na mahal ko siya kahit may kinakasama na siya, kaya gustuhin ko mang tumanggi ay hindi ko magawa. Ang hindi ko lang maisip ay mahal niya raw ako, pero ayaw niya namang hiwalayan ang live-in partner niya?

Minsan tuloy naiisip ko na baka ginagamit niya lang ako. Ano sa mpalagay o, Maestro, dapat ko na bang itigil o mas dapat na ipagpatuloy ko ang relasyon namin? Sa bandang huli, kami rin ba ang magkakatuluyan at magsasama habambuhay tulad ng palagi niyang ipinapangako sa akin sa tuwing may nangyayari sa amin? 

November 10, 1996 ang birthday ko habang July 7, 1990 naman ang birthday ng lalaking ito.

Umaasa,

Karen ng Santa Ana, Taytay, Rizal

Dear Karen,

Babala o warning ang dapat mong ibigay sa boyfriend mo na may ibang partner, ngunit sumasawsaw pa rin sa iyo. Ito ay para maging klaro sa iyong isipan at maging malinaw na rin kung saan hahantong ang inyong magulong relasyon. Minsan, sadyang madaming problema ang tao, pero sa pamamagitan ng deadline, babala o warning, ito ang tatapos sa kanyang mga suliranin sa buhay. Sa simpleng tanong na, “Hanggang kailan ka maghihintay?” 

Ganu’n ‘yun! Sabihin mo sa boyfriend mo, kung talagang mahal ka niya, makapaghihintay ka. Halimbawa lang ito, hanggang sa katapusan ng taong 2024. Kapag dumating ang katapusan ng 2024 o sa December 31, sa ayaw at sa gusto niya, dapat iwanan mo na siya kapag hindi ka niya pinili.

Kapag binigyan mo ng “ultimatum” ang isang pangyayari o sitwasyon, sa dakong huli ay kusa rin bibigay sa iyo ang iyong kagustuhan.  Kapag dumating ang katapusan ng 2024 at hindi ikaw ang kanyang pinili, okey lang dahil hangga’t maaga pa, nalaman mo na ang magiging hantungan o wakas ng inyong relasyon. Subalit kung ikaw naman ang pipiliin niya, eh ‘di salamat sa binigay mong deadline dahil na-pressure mo siyang magdesisyon hangga’t maaaga pa o hangga’t hindi ka pa grabeng napapalautan.

Samantala, sa pagsusuring Astrology, tunay na ka-compatible ng zodiac sign mong Scorpio ang zodiac sign na Cancer ng boyfriend mo. Sapagkat, ang Scorpio at Cancer ay may iisang elementong tinataglay – ang elementong water o tubig.

Habang sa pagsusuring Numerology, ang weak number na 7 ng boyfriend mo at strong number mo namang 10 o 1 (ang 10 ay 1+0=1) ay nagsasabing sadyang compatible kayo sa isa’t isa, kung saan bukod sa pagiging tugma ng inyong mga numero, mas lamang na ikaw ang kanyang piliin dahil mas madaling napahihinuhod ng Taong Uno (1) ang Taong Siete (7), lalo na sa mga sitwasyong may kaugnayan sa damdamin o pag-ibig.

Ayon sa iyong Love Calendar, Karen, sa taong kasalukuyan at sa buwan ng Setyembre hanggang Nobyembre, sure na ang magaganap, makakapagdesisyon na rin ang boyfriend mo kung sino ang pipiliin at pakikisamahan niya. Kung hindi naman niya ka-compatible ang kanyang partner, tiyak na ikaw ang kanyang pipiliin na pakasalan at tuluyanng makasama sa pagbuo ng isang maligaya at panghabambuhay na pagpapamilya, na nakatakdang mangyari at maganap sa susunod na taong 2025 sa buwan ng Mayo. Kung saan, may pormal na pagsasama at kasalang magaganap na hahantong sa isang masaya at panghabambuhay na pagpapamilya.