Bf na todo-harot sa iba… “PUWEDE KA RING MAGPALIGAW SA IBANG LALAKI” - MAESTRO

ni Maestro Honorio Ong @Kapalaran ayon sa Numero | June 30, 2024

Dear Maestro,

Naghiwalay kami ng boyfriend ko dahil sa may third party. Bukod sa akin, may iba pa pala siyang nililigawan, pero hindi pa naman niya girlfriend. Nang malaman ko ito, tinanong ko siya kung bakit nanliligaw pa siya sa ibang babae gayung mag-on na kami, sinabi niya na hindi pa naman daw kami kasal o mag-asawa, kaya walang masama kung manliligaw pa siya sa iba. Nagalit ako kaya nakipag-break ako sa kanya, pero palagi pa rin siyang nagte-text at gustong makipagbalikan. 

Sa totoo lang, mahal ko pa rin siya, pero gusto ko siyang matuto dahil ayoko ang ginagawa niya. May girlfriend na siya, tapos manliligaw pa siya sa iba?

Maestro, magkakabalikan pa kaya kami kahit na hindi ko na sagutin ang mga texts niya sa akin? 

Ang plano ko kasi ay pahirapan muna siya at humingi siya ng sorry at ipangako niyang ‘di na niya muli pang uulitin iyon. Tama ba ang binabalak kong ito? Kung magkakabalikan kami, kami na kaya ang magsasama sa tamang panahon at compatible ba kami? March 12, 1997 ang birthday ko, habang November 6, 1994 naman ang birthday niya.

Umaasa

 Zagi ng San Carlos, Mariveles, Bataan

Dear Zagi,

Kung ang ikinakat’wiran niya sa iyo na kaya siya nanliligaw sa iba ay dahil hindi pa kayo mag-asawa, lumalabas na sa parte mo naman ay puwede ka ring magpaligaw sa ibang lalaki. 

Kung halimbawang pumayag siya na puwede ka ring magpaligaw sa iba kahit may relasyon kayo, siguro ay matatauhan siya dahil ibig sabihin ay parang wala kayong commitment sa isa’t isa. Kumbaga, parang hindi kayo magkasintahan dahil puwede pa rin siyang manligaw sa ibang babae habang ikaw naman ay puwedeng magpaligaw sa ibang lalaki.Kunsabagay, minsan ay napakahirap intindihin ang iba’t ibang tawag sa maraming kombinasyon ng relasyon. May tinatawag na “M.U ” o mutual understanding na parang hindi pa masyadong pormal ang relasyon. May tinatawag ding “fling” na ibig sabihin ay puwedeng palitan anumang oras ang ka-fling mo. Meron ding “syota-syotaan” o hindi pa talaga ganap na mag-on. Sa pag-aasawa naman, may tinatawag na “live-in” at may mga pangyayari pa na nagiging dalagang ina o binatang ama ang magka-live in na hindi nila kapwa ginusto. Kaya kapag nabuntis ang babae o nakabuntis ang lalaki, tinatawag nila itong “naka-ano” lang.

Sa madaling salita, para hindi kayo maguluhan, ang mas maganda nito ay alamin n’yong mabuti kung ano ang relasyon na mayroon kayo. Nagpa-practice lang ba kayo na maging magkasintahan upang kapag nagkasundo kayong muli habang may relasyon ay unti-unti n’yo nang gawing pormal ang inyong samahan, magkaroon ng bagong commitment, formal engagement na sa bandang huli ay hahantong sa totohanang preparasyon na sa pag-aasawa o pagtatayo ng sariling pamilya?Samantala, dahil nagkataong compatible ang Pisces at Scorpio dahil sila ay kapwa nagtataglay ng elementong tubig, gayundin ang birth date mong 12 (1+2=3) at birth date na 6 ng boyfriend mo na sadyang magkatugma rin dahil ang birth date na 3 at 6 ay tinatawag na grupo ng numerong series of 3-6-9, posibleng ngayon pa lang ay nasasagap mo na ang mangyayari.Dahil totoong mahal ka ng boyfriend mo at natatakot din siyang mawala ka sa kanya, bagama’t balak niya pang humanap ng iba, sa bandang huli ay matatauhan din siya. At kung ganu’n ang mangyayari, tiyak ang magaganap, hihingi rin siya ng tawad upang ang dating muntik nang mawasak na relasyon ay muling buuin sa bago at mas masayang pag-iibigan na hahantong sa tunay at lehitimong relasyon na patungo sa masaya at panghabambuhay na pagmamahalan na nakatakdang mangyari at maganap sa susunod na buwan ng Agosto o Setyembre sa edad mong 27, habang 29 naman ang boyfriend mo. 

Kahit pa super-lab ang isa’t isa… MAGKASINTAHANG ‘DI TINADHANA, SURE NA MAGHIHIWALAY

ni Maestro Honorio Ong @Kapalaran Ayon Sa Palad | June 29, 2024

KATANUNGAN

1. May boyfriend ako ngayon, bale siya ang first love, first kiss, first touch ko, at first b oyfriend ko. Ang problema ko ngayon ay tutol sa kanya ang magulang ko. Wala kasi siyang regular na trabaho ngayon, at minsan ay gumagamit pa ng pinagbabawal na gamot. Tambay din siya sa kanto kasama ang mga barkada niya, pero hindi naman siya ganu’n kaadik. 

2. Paano ko ipapaliwanag sa mga magulang ko na hindi naman masama ang magmahal at hindi naman masamang tao ang boyfriend ko?

3. Maestro, kahit ba na kontra ang mga magulang ko sa boyfriend ko, may chance pa rin ba na mapangasawa ko siya? Dapat ko rin ba siyang ipaglaban sa magulang ko?

KASAGUTAN

1. Hindi mo siya dapat ipaglaban, lalo na kung ikaw ay isang edukadang babae, galing sa matino at mabuting angkan. Tapos ang aasawahin mo lang ay isang hamak na tambay at gumagamit pa? Walang halagang ipaglaban ang ganyang klaseng tao. Kung sakali mang ipaglaban mo siya, ano naman ang mapapala mo sa kanya?

2. Kung sakali mang ipinaglaban mo siya, may maikli at guhit ng kanselasyon sa una mong Marriage Line (Drawing A. at B. 1-M arrow a.) sa kaliwa at kanan mong palad na nagsasabing mauuwi rin sa wala ang relasyon n’yo kahit pa ipaglaban mo siya. 

3. Nangyaring ganu’n, dahil ang maikli at guhit ng kanselasyon na Marriage Line (arrow a.) ay tanda na kahit ipaglaban mo pa ang kasalukuyan mong boyfriend, hindi pa rin siya ang makakatuluyan mo. Oo nga’t mahal mo siya at mahal ka rin niya, ang kaso nga lang hindi naman talaga kayo ang itinakda ng kapalaran para sa isa’t isa.

4. Ayon sa pag-aanalisa, frustration lang ang mararanasan mo sa kasalukuyan mong boyfriend na kinumpirma ng biyak at bilog na Heart Line (Drawing A. at B. h-h arrow b.) sa kaliwa at kanan mong palad. Tanda na ang pinakamabuti mong magagawa ngayon ay ihanda ang iyong sarili sa napipintong hiwalayan n’yo ng boyfriend mo, dahil ang nasabing biyak at bilog sa guhit ng Heart Line o sa Guhit ng Damdamin ay babala ng isang matinding kabiguan sa unang pag-ibig.

5. Pero kahit na hindi mo makatuluyan ang first boyfriend mo, hindi ka dapat manghinayang at malungkot, dahil ang ikalawang mas malinaw at mahabang Marriage Line (Drawing A. at B. 2-M arrow c.) sa kaliwa at kanan mong palad ang nagsasabing sa ikalawang pag-ibig at pakikipagrelasyon na ka-level mo sa lipunang inyong ginagalawan, sa kanya ka makakasumpong ng isang tunay na ligaya at panghabambuhay na pakikipagrelasyon, hatid ng isang lalaking nagtataglay ng birth date na 16 o 25.  

DAPAT GAWIN

Habang ayon sa iyong mga datos, Criselda, ang kasalukuyan mong boyfriend ay itatalang pansamantalang pag-ibig na mauuwi rin sa kabiguan. Sapagkat sa susunod na pakikipagrelasyon na darating sa susunod na taon, sa edad mong 24 pataas, makakasumpong ka na ng panibagong karelasyon, (2-M arrow c.), hatid ng isang lalaking isinilang sa zodiac sign na Taurus na siya mo na ngang makakasama sa pagbuo ng isang maligaya at panghabambuhay na pamilya.

Horoscope | Hunyo 29, 2024 (Sabado)

ni Maestro Honorio Ong @Horoscope | June 29, 2024

Sa may kaarawan ngayong Hunyo 29, 2024 (Sabado): Huwag kang magsawa na tumulong sa iyong kapwa. Ito ang misyon mo sa lupa para pagkalooban ka ng maraming biyaya at pagpapala.

ARIES (Mar. 21-Apr. 19) - Maawain ka ngayon, madali kang maaawa sa ibang tao. Mas magandang lumayo ka muna sa kanila lalo na sa mga taong mahilig magpaawa at manghingi. Masuwerteng kulay-lavender. Tips sa lotto-9-15-21-33-37-40.

TAURUS (Apr. 20-May 20) - Magbigay ka para makatanggap ka. Ang matatanggap mo ay mas marami pa kaysa sa ibibigay mo. Isabuhay mo ang pagiging mapagbigay, nang sa gayun mas dumami pa ang iyong biyaya. Masuwerteng kulay-white. Tips sa lotto-3-12-27-30-42-45.

GEMINI (May 21-June 20) - Bigyang oras mo ang mga malalapit sa puso mo. Ngayon ang magandang pagkakataon upang palaguin ang pagmamahalan at pagtibayin ang samahan. Masuwerteng kulay-green. Tips sa lotto-9-14-17-26-35-41.

CANCER (June 21-July 22) - Sa iyo ang araw na ito at sa iyo pa rin ang mga araw na darating. Hindi ka dapat magkamali ngayon. Ito ang mensahe para sa iyo. Masuwerteng kulay-yellow. Tips sa lotto-2-11-20-28-33-39.

LEO (July 23-Aug. 22) - Mahina ang panlaban mo sa mga taong mandaraya, mas magandang magpokus ka muna para sa mga taong mahal mo. Masuwerteng kulay-purple. Tips sa lotto-4-10-18-22-29-32.

VIRGO (Aug. 23-Sept. 22) - Magplano ka muna bago ka kumilos. Ang mga taong walang plano ay walang magandang nararating. Sa pagpaplano ang lahat ay mabilis na naisasagawa. Masuwerteng kulay-pink. Tips sa lotto-5-18-22-28-34-40.

LIBRA (Sept. 23-Oct. 22) - Huwag kang sumalungat sa agos ng buhay. Makiisa ka sa karamihan kahit hindi mo gaanong gusto ang mga nakikita mo, hindi ngayon ang panahon upang kumontra at makipaglaban. Masuwerteng kulay-beige. Tips sa lotto-7-16-19-21-27-30.

SCORPIO (Oct. 23-Nov. 21) - Kung sino ang nakakatulong sa iyo, siya ang pahalagahan mo, habang layuan ang mga taong wala namang kuwenta. Masuwerteng kulay-blue. Tips sa lotto-9-11-18-25-34-41.

SAGITTARIUS (Nov. 22-Dec. 21) - Kung ano ang malinaw at maayos na paraan, iyon ang iyong ipatupad. Masuwerteng kulay-black. Tips sa lotto-3-12-27-33-42-45.

CAPRICORN (Dec. 22-Jan. 19) - Pakinggan mo ang damdamin mo, at ‘wag ang isip mo. Ang inuutos ng isip, kahit na tama ay magbibigay lang sa iyo ng kalungkutan. Samantala, kapag pinakinggan mo ang iyong damdamin, mas liligaya ka. Masuwerteng kulay-violet. Tips sa lotto-6-18-22-25-37-40.

AQUARIUS (Jan. 20-Feb. 18) - Hindi ikaw ang laging tama. Subukan mo ring pakinggan ang mga taong malalapit sa iyo. Masuwerteng kulay-peach. Tips sa lotto-4-17-19-21-28-43.

PISCES (Feb. 19-Mar. 20) - Kumilos ka kahit nakakaramdam ka ng katamaran at pananamlay. Sa pagkilos, sisigla ang buhay mo at gaganahan kang asikasuhin kung paano mo pa mas mapapaganda ang iyong kinabukasan. Masuwerteng kulay-red. Tips sa lotto-2-11-20-29-33-40.