Malinaw ayon sa birthday… Mag-bf na magkakatuluyan dahil parehong taglay ang air element

ni Maestro Honorio Ong - @Kapalaran ayon sa Numero| May 16, 2021

Dear Maestro,

Matagal na akong sumusubaybay sa inyong mga artikulo at naisipan kong sumangguni sa inyo dahil may ilang katanungan ako tungkol sa aking kapalaran. Habambuhay na ba kami ng boyfriend ko, gayundin, compatible ba kami at kami na ang magkakatuluyan? September 29, 1991 ang birthday ko at October 4, 1991 naman ang birthday ng boyfriend ko.

Umaasa,

Kat ng Mabuhay, Carmona, Cavite

Dear Kat,

Compatible kayo ng kasalukuyan mong boyfriend dahil kapwa kayo under sa zodiac sign na Libra. Kung saan, ang birthday mong September 29, 1991 at October 5, 1991 naman ang boyfriend mo ay sadya ngang tugma at compatible sa isa’t isa, sapagkat pareho kayong nagtataglay ng elementong air o hangin. Kaya tulad ng nasabi na, sa pag-aanalisang Western Astrology, suwetong-suweto ang inyong pagsasama at habang kayo ay nagmamahalan at nagsasama, itatala ang maligaya at panghabambuhay na relasyon.

Dagdag pa rito, sa Numerology, ang birth date mong 29 o 2 (2+9=11/ 1+1=2) ay nagtataglay ng planetang Moon-Neptune na naiimpluwensiyahan din ng elementong tubig, habang ang destiny number naman ng boyfriend mo na 7 (10+4+1991=2005/ 20+05=25/ 2+5=7) ay compatible rin sa isa’t isa, ibig sabihin, sa pag-aanalisang Numerology ay tugmang-tugma ang inyong pagsasama.

Samantala, bukod sa birth date mong 29 o 2 (2+9=11/ 1+1=2), ikaw din ay nagtataglay ng destiny number na 4 (9+29+1991=2029/ 20+29=49/ 4+9=13/ 1+3=4), na siya namang birth date ng boyfriend mo, kung saan mapapansing compatible at talagang tugma kayo ng boyfriend mo sa upang magsama at magmahalan habambuhay.

Ayon sa Decadens ng Kapalaran na pinaigting pa ng inyong Love Calendar, sa susunod na taong 2022 o 2023, sa edad n’yong 31 pataas, kayo na ang magkakatuluyan at magsasama nang maunlad at maligaya habambuhay.

Nainlab sa kumare habang nasa abroad si kumpare, dapat nang umiwas

ni Maestro Honorio Ong - @Kapalaran ayon sa Palad | May 09, 2021

KATANUNGAN

1. May kumare ako at tawagin na lang natin siyang Carmela, na mas bata sa akin ng limang taon at hindi ko alam na kaya niya pala ako kinuhang ninong sa panganay nilang anak ay may lihim pala siyang gusto sa akin. Sa ngayon, nasa abroad si kumpare at dahil wala ang kanyang mister, nagkaroon kami ng lihim na relasyon. Inamin niyang ako ang gusto niya kaysa sa kasalukuyan niyang asawa, pero nauna akong nag-asawa at hindi ko siya niligawan noong mga binata at dalaga pa kami.

2. Noong bago pa lang ang relasyon namin, regular at madalas kaming nagtatagpo nang palihim at regular ding may nangyayari sa amin. Pero ngayon, dahil may pandemya ay medyo paiwas na ako dahil natatakot din ako sa aming ginagawa. Kaya lang, nang mapansin niyang umiiwas na ako, sinabi niyang bahala raw ako kapag nabisto kami ng mister niya at misis ko. Magka-vibes din kasi sila ng misis ko at madalas na nagkakakuwentuhan, kaya kinakabahan ako dahil ayaw kong masira ang aming pamilya.

3. Sa palagay mo, Maestro, kapag tuluyan ko nang iniwasan ang babaeng ito, ititimbog kaya niya ang lihim naming relasyon at baka ito pa ang maging dahilan para magkahiwalay kami ng misis ko at masira ang aming mga pamilya?

KASAGUTAN

1. ‘Yan ang problema, Rex, gagawa-gawa ka ng kalokohan at ngayon ay natatakot ka sa magiging resulta!

2. Kunsabagay, talagang ganu’n ang mga medyo good boy pa ngayon. Kapag nakagawa ng kasalanan o pagkakamali, dahil hindi sila sanay sa kanilang ginawa, madali silang natatakot at nagugulumihanan.

3. Gayunman, ‘wag kang masyadong matakot at kabahan dahil bagama’t may malinaw na Guhit ng Pambababae (Drawing A. at B. I-I arrow a.) sa kaliwa at kanan mong palad, ito ay hindi naman gaanong umusad at nagtagumpay. Sa halip, matapos lumagpas sa Life Line (L-L arrow b.), agad ding namatay ang nasabing Guhit ng Pambababae (arrow c.) sa kaliwa at kanan mong palad.

4. Ito ay malinaw na tanda na bagama’t nagawa mong mambabae, ito ay maiiwasan mo rin dahil tulad ng nasabi na, likas pa rin sa iyong puso at pagakatao ang pagiging mabuti. Ang ikinaganda pa nito, dahil likas ka ngang takot gumawa ng kasalanan, kung may pagkakataon mang muli kang mambabae, ito ay hindi mo na uulitin pa at agad na susunggaban.

5. Ang pag-aanalisang minsan lang kakatok sa iyong karanasan ang pambababae pero hindi na muling mauulit pa ay madali namang kinumpirma ng malinaw, makapal at kaisa-isang Marriage Line (Drawing A. at B. 1-M arrow d.) sa kaliwa at kanan mong palad. Tanda na anuman ang mangyari sa ginagawa mong pambababae ngayon, lubhang mapalad ka pa rin dahil ang lahat ng ‘yan sa dakong huli ay lilipas din hanggang sa maluwalhati mong malusutan ang minsang kalokohan na iyong ginawa ay mauuwi na lang sa isang masarap balikan pero makasalanang bahid ng alaala sa iyong isipan.

MGA DAPAT GAWIN

1. Habang, ayon sa iyong mga datos, Rex, nakatakda na ang magaganap — habang unti-unti mong iniiwasan ang iyong kumare, kusa nang papabor sa iyo ang kapalaran at pagdating ni kumpare galing sa abroad, ganap na ring huhupa ang pagnanasa n’yo sa isa’t isa.

2. At sa sandaling humupa nang tuluyan ang libido, tuluy-tuloy na ring mabubura at mapaparam ang interes n’yo sa isa’t isa, hanggang sa hindi na maulit pa ang inyong palihim na pagtatagpo. At dahil hindi na kayo nagkikita, magkakalimutan na rin kayong dalawa at maluwalhati ka nang makapagmu-move on at makababalik bilang tapat na asawa at ulirang ama sa iyong mga anak.

Palad ng mister na kayang labanan ang tukso

ni Maestro Honorio Ong - @Kapalaran ayon sa Palad | April 11, 2021

KATANUNGAN

1. Noon, may babaeng may crush sa akin, pero hindi naman niya ako pinipilit na maging kami, kaya nasayang ang pagkakataon. Torpe at mahiyain kasi ako noon, hanggang sa nagka-girlfriend ako at nakapag-asawa. Habang ang tinutukoy kong babae ay nakapag-asawa ng isang Hapon, kaya sa Japan na sila nanirahan ng kanyang pamilya.

2. Sa ngayon, nandito siya sa Pilipinas para magbakasyon at hindi niya kasama ang kanyang asawa. Nagkikita kami, nag-uusap at naging magka-close ulit. Parang pinagtiyap ng pagkakataon dahil ngayon ay nagtatrabaho naman ang misis ko sa abroad bilang caregiver.

3. Sa madaling salita, Maestro, kaunting kuwento at usap na lang, malapit nang may mangyari sa amin, pero pinipigil ko ang sarili ko dahil halata kong gusto pa rin niya ako. Hindi ko malaman kung dapat ba akong bumigay for sexual pleasure dahil dama kong ganu’n lang naman din ang hanap at habol niya sa akin.

4. Kung sakaling may mangyari sa amin, nakaguhit ba sa palad ko na mahiwalay sa asawa? Sa kasalukuyan, palagi kaming nag-uusap dahil magkapitbahay kami dahil dito siya umuuwi sa matandang bahay ng mga nanay niya. Ang sabi pa niya sa akin, bago siya bumalik ng Japan ay mamamasyal kami at siya ang taya.

KASAGUTAN

1. Malabo at maaaring hindi mangyayari ang naglalaro sa isip n’yo ng babaeng binabanggit mo dahil nananatiling matino at tuwid ang kaisa-isang Marriage Line (Drawing A. at B. 1-M arrow a.) sa kaliwa at kanan mong palad.

2. Tanda na kahit magparamdam pa nang magparamdam at halimbawang siya na ang nagyaya at natuloy ang inyong pamamasyal, mananatili pa rin ang dati mong ugali na mabait at tapat sa asawa. Kaya sa sandaling natuloy ang inyong pamamasyal, wala ring mangyayari at posibleng hanggang pasyal lang talaga.

3. Ang ikinaganda pa nito, kung sakali namang manaig ang tawag ng laman at pagnanasang seksuwal, magagalaw mo ang nasabing babae, pero tulad ng naipaliwanag na, hindi lalago sa isang ganap, lehitimo at tunay na pagmamahalan ang inyong sexual escapade na mamamagitan sa inyong dalawa.

4. Kumbaga, ‘ika nga ni Kuya Manoling nang minsang nagkuwentuhan kami sa bagong bahay niya nang maisipan kong dalawin siya noong nakaraang Mahal na Araw, habang napaliligiran kami ng malagong mga halaman na kanyang inaalagaan, sabi niya, “Alam mo, Honorio, minsang maging mabuti ang isang tao, palagi na siyang magiging mabuti at minsan namang nagpakasama, palagi na siyang gagawa ng kasamaan.”

MGA DAPAT GAWIN

1. Ayon sa iyong mga datos, Mr.R.Y., sadyang kakaiba ang posibleng mangyari at maganap, “Sa minsang paggawa mo ng ka-imoralan, hindi na ito masusundan pa dahil duwag ka”, (Drawing A. at B. L-L, H-H arrow b.) kaya muli kang makababalik sa matino at mabuting pamumuhay. Sa madaling salita, minsan man kayong magtalik ng babaeng tinutukoy mo, malabo at maaaring ito ay hindi na masusundan pa. Gayunman, hindi mo dapat patusin ang babaeng may asawa na at isipin pang ikaw din ay may asawa at maayos namang pamilya.

2. Samantala, tunay ngang minsan ay mahirap talagang pigilin ang tukso, lalo na’t kung ito ay may kaugnayan sa pagnanasang seksuwal at makamundo. Pero kahit mahirap, dapat pigilin upang mapanatili ang kaayusan sa lipunan at mapanatili ang moral value ng bawat isa.

3. Habang, muli, ayon sa iyong mga datos, nakatutuwang isipin pero ‘wag mo namang gagawin, kahit may mangyari sa inyo ng nasabing babae at mairaos n’yo ang inyong uhaw at pagnanasa sa isa’t isa, sa bandang huli, sa pagbabalik ng iyong misis galing abroad at pagbalik naman niya sa Japan, mananatili pa rin ang kani-kanyang matino, mabuti at masayang pamilya habambuhay (Drawing A. at B. 1-M arrow a.).