Lumang jeep, tuloy — LTFRB

ni Jeff Tumbado | February 7, 2023

Palalawigin pa ng Land Transportation and Franchising Regulatory Board (LTFRB) ang bisa ng mga prangkisa ng mga tradisyunal na jeep sa layong matiyak na walang tsuper ang mapag-iiwanan ng Public Utility Vehicle Modernization Program (PUVMP) ng pamahalaan.

Kasunod ng huling deliberasyon para sa PUVMP, kinumpirma ni LTFRB Chairman Atty. Teofilo Guadiz III na napagpasyahan ng mga miyembro ng Board na palawigin ang mga prangkisa ng tradisyunal na jeep, sa ikaapat na pagkakataon.

Gayunman, nilinaw ni Guadiz na kailangan munang isapinal ang mga detalye hinggil sa mga alituntunin kaugnay ng pagpapalawig ng bisa ng mga prangkisa ng tradisyunal na jeep.

Tinukoy ni Guadiz na mula sa target na bilang ng mga yunit na ilalahok sa modernisasyon, nasa 60% ng mga jeep ang sumailalim na sa PUVMP, habang 40% ang hinihintay na makalahok sa nasabing programa.

“Hindi namin gustong mayroong maiiwan kaya nais namin na kahit 95% lang ng mga dyip ang maging handa na kapag itinuloy namin ang PUV modernization program,” pagdidiin ni Guadiz.

“However, sa meeting, pag-uusapan din namin kung may mga area na talagang fully-modernized na, baka doon ilatag na namin nang tuluyan ‘yung full modernization (program). But on areas na kulangkulang pa o wala pang modernized jeepney, we will still stick to the traditional jeepney,” dagdag pa ni Guadiz.

Bukod sa hindi pa handa ang lahat ng mga jeep na maging modernisado, sinabi rin ni

Guadiz na isinaalang-alang nila ang iba pang mga problema sa sektor ng transportasyon.

Kabilang na aniya rito ang kakulangan sa mga pampublikong sasakyan na matutugunan sakaling palawigin pa ang bisa ng mga prangkisa ng mga tradisyunal na jeep.

Ayon pa kay Guadiz, naiintindihan ng ahensya na maaaring hindi magkaisa ang mga operator at tsuper para sumali sa iisang kooperatiba kaya’t pinag-aaralan na nila ang posibilidad na magtalaga ng dalawa o tatlong kooperatiba sa bawat isang ruta, na maaaring salihan ng mga operator at tsuper.

Bukod dito, nais din ng ahensya na maging balanse at matiyak na walang operator o tsuper na maiiwan kaya palalawigin din nito ang palugit para sa pagtalima sa mga regulasyon sa ilalim ng PUVMP.

Teofilo Guadiz, III, bagong LTFRB chairman — Malacañang

ni Lolet Abania | December 14, 2022

Itinalaga ni Pangulong Ferdinand “Bongbong” Marcos, Jr. si dating Land Transportation Office (LTO) chief na si Atty. Teofilo Guadiz, III bilang bagong chairman ng Land Transportation Franchising and Regulatory Board (LTFRB), ayon sa Malacañang ngayong Miyerkules.

Si Guadiz, kung saan nilagdaan ni Pangulong Marcos ang appointment paper nito noong Disyembre 9, ay nanumpa sa harap ni Executive Secretary Lucas Bersamin ngayong Miyerkules ng hapon, base sa impormasyon ng kanyang opisina.

Una nang na-appoint si Guadiz bilang Assistant Secretary for Road Transport and Infrastructure ng Department of Transportation (DOTr). Noong Hulyo ng kasalukuyang taon, si Guadiz ang siyang head ng LTO. Siya rin ang Region 1 director ng ahensiya.

Libreng sakay sa jeep at bus hanggang Hulyo na lang — LTFRB

ni Lolet Abania | June 21, 2022

Magtatapos na ang libreng sakay sa ilang public utility jeepneys (PUJs) at buses sa Metro Manila sa ilalim ng service contracting program (SCP) ng gobyerno sa Hulyo, ayon sa Land Transportation Franchising and Regulatory Board (LTFRB) ngayong Martes.

Base sa datos mula sa LTFRB, nasa 146 National Capital Region (NCR) public utility jeepney (PUJ) cooperatives at mga korporasyon ang hihinto na sa pagbibigay ng free rides sa Hunyo 30.

“For the buses, Busway will end by July pa as well as Commonwealth Route 7 bus from Montalban to Quezon Avenue,” pahayag ni LTFRB Executive Director Tina Cassion sa mga reporters.

Noong Abril 11, nagsimula ang EDSA Busway Carousel sa pagbibigay ng free rides para sa mga commuters sa ilalim ng third phase ng service contracting program (SCP) ng Department of Transportation (DOTr).

Sa ilalim ng SCP, ang mga public utility vehicle (PUV) operators at drivers na lalahok sa free ridership program ng gobyerno ay makatatanggap ng one-time payout at weekly payments base sa bilang ng kilometro na kanilang biniyahe per week, may sakay man silang pasahero o wala.

Ang mga ruta para sa free ride program ng mga PUVs gaya ng modern at traditional jeepneys, UV Express, at mga bus ay pinalawig naman nationwide noong Abril.

Ayon sa DOTr, nabigyan ang programa ng P7-billion budget ng General Appropriations Act (GAA) of 2022, sakop nito ang inisyal na 515 buses mula sa 532 units na registered sa program.

Noong Mayo 25, inanunsiyo naman ng DOTr ang extension ng free rides sa Metro Rail Transit Line 3 (MRT3) hanggang Hunyo 30.