Istayl kolorum, 'di gumagamit ng app para mas mataas ang singil.. Angkas at Joyride drivers, buking

ni Mylene Alfonso | May 15, 2023

Patuloy na dumarami ang reklamong natatanggap ng motorcycle taxi na Angkas dahil sa umano'y overcharging ng mga rider sa mga commuter na naghahabol ng oras sa kanilang mga pupuntahan.

Nabatid na hindi na nasusunod ang fare matrix na ipinalabas ng Land Transportation Franchising and Regulatory Board (LTFRB) na siyang guidelines para sa pagbibigay ng tamang pasahe sa mga nagnanais na sumakay sa motorcycle taxi.

Nakapaloob sa fare matrix na ipinalabas noong Enero 27, 2020 ng LTFRB na sa Metro Manila, P50 para sa unang 2km; P10 hanggang 7km; P15 sa mga susunod pang kilometro habang sa Metro Cebu/ Cagayan De Oro, P20 sa unang 2km; P16 hanggang 8km at P20 sa mga susunod pang kilometro.

Ayon sa mga reklamo ng commuter na ibinahagi sa social media, ang mistulang naging kolorum at habal-habal ang mga motorcycle taxi na binigyan ng prangkisa dahil sumusunod sa guidelines ng LTFRB.

Partikular na reklamong tinukoy ang hindi na paggamit ng apps kung saan, kinokontrata na lamang ng mga rider ang kanilang pasahero lalo na sa gabi na kung saan ay 5 hanggang 10 beses ang taas ng singil.

“Grabe ang modus ng mga Angka at Joyrider drivers. Mag-aabang sila sa mga exit ng mall/establishment. Nakabukas 'yung app nila kaya nakikita nila kung sino nagbu-book pero hindi nila ina-accept. Instead, lalapit sila as habal tapos aalukin nila ng mas mahal na pamasahe kaysa sa app,” isa lang ito sa reklamong ipinost sa social media.

Gayundin, nanawagan sa social media ang Angkas, Habal, Joyride riders and passengers group na kung saan ay humihingi sila ng proteksiyon sa pamunuan ng motorcycle taxi na i-orient ang ibang riders na maging marespeto dahil sa hindi na nasusunod ang fare matrix ng LTFRB kung kaya’t hindi na nila alam kung ano ang latest Angkas rate.

Prangkisa, special permit ng ruta sa Region 12, hawak na ng BLTFRB

ni Jeff Tumbado | May 9, 2023

Ganap nang inilipat ang mga kaukulang tungkulin, ari-arian, at dokumento ng Bangsamoro Autonomous Region in Muslim Mindanao (BARMM) sa BARMM Land Transportation Franchising and Regulatory Board (BLTFRB) mula sa LTFRB Regional Franchising and Regulatory Office (RFRO) XII.

Sa isang pagdiriwang na idinaos sa LTFRB Central Office, pinangunahan ni LTFRB Chairman Teofilo Guadiz III ang turn-over o ang pagsalin ng digital copy ng mga franchise document o dokumento ng mga rutang nasasakupan ng BARMM.

Kabilang sa mga dumalo sa programa sina LTFRB Board Member Atty. Mercy Jane Paras-Leynes at Executive Director Atty. Robert Peig.

Gayundin sina LTFRB Region XII Regional Director Paterno Reynato Padua at Atty. Paisalin Tago na ministro ng Ministry of Transportation and Communications (MOTC) ng BARMM.

Nagpaabot din ng pasasalamat kay Chairman Guadiz si Atty. Tago para sa makasaysayang hakbang na pakikinabangan ng BARMM.

Alinsunod sa Board Resolution No. 025, kinakailangan nang ilipat ang lahat ng mga ari-arian, digital record, prangkisa, special permit, provisional authority, at kaukulang dokumento ng mga ruta na nasa ilalim ng BARMM mula sa LTFRB Region 12 matapos mabigyan ng buong kapangyarihan at otoridad ang BLTFRB na pamunuan ang nasasakupan nito.

Biyahe ngayong Semana Santa, bantay-sarado

ni Jeff Tumbado | April 4, 2023

Tiniyak ng Land Transportation Franchising and Regulatory Board (LTFRB) na magiging maayos ang pagbiyahe ng publiko sa kanilang mga destinasyon ngayong Semana Santa.

Ayon kay LTFRB Chairman Teofilo Guadiz III, noong nakaraang linggo pa lamang ay ipinakalat na ng mga regional director ng LTFRB sa lahat ng regional office ang kanilang mga enforcer upang matiyak ang maayos at mahusay na daloy ng pasahero sa mga pampublikong terminal sa bansa.

Iginiit ni Chairman Guadiz na magsasagawa ng inspeksyon ang mga enforcer sa mga tsuper at konduktor upang siguraduhin na mananatiling alerto at maayos ang kanilang pag-iisip at katawan sa oras ng pamamasada sa pamamagitan ng pagsusuri kung nakainom ba ang mga ito ng alak o ipinagbabawal na droga.

Susuriin din ng mga enforcer ang mga public utility bus (PUB) upang masiguro na hindi ito kolorum at ligtas pa itong pumasada.

Titiyakin din ng mga enforcer na nasusunod ang mga umiiral na public health safety protocol sa loob ng pampublikong sasakyan dahil nananatiling nasa state of national public health emergency ang bansa.

Naglabas na rin ang LTFRB ng Special Permits para sa 743 units upang matiyak na mayroong sapat na PUB na magsisilbi sa mga pasaherong pupunta sa kani-kanilang probinsya.