LTFRB, bawal manghuli, mag-impound at mag-dispose ng kolorum na sasakyan — DOJ

ni Madel Moratillo | June 8, 2023

Hindi umano puwedeng manghuli, mag-impound at mag-dispose ng kolorum na sasakyan ang Land Transportation Franchising Regulatory Board (LTFRB).

Ito ang nakasaad sa legal na opinyon ni Justice Secretary Jesus Crispin Remulla, kung saan nakasaad na ang maaari lamang gawin ng LTFRB ay makipag-ugnayan sa ibang ahensya ng pamahalaan para sa paghuli ng mga kolorum na sasakyan.

Ang legal opinion ay inilabas ng Department of Justice (DOJ) matapos humingi ng paglilinaw si noo’y Transportation Sec. Arthur Tugade hinggil sa kung sakop ba ng hurisdiksyon ng LTFRB ang paghuli ng mga kolorum na sasakyan.

Puwede lang umanong manghuli ang LTFRB ng kolorum kung binigyan siya ng kapangyarihan ng Land Transportation Office (LTO) o ng Philippine National Police (PNP).

Batay aniya sa nakasaad sa Republic Act 4136, o ang Land Transportation and Traffic Code na inamyendahan ng RA 6975, o Department of the Interior and Local Government Act of 1990, tanging ang LTO at PNP lamang ang maaaring magsagawa ng enforcement pagdating sa mga traffic rules at hindi kasama ang LTFRB.

Hindi rin umano puwedeng gamitin ng LTFRB ang kanilang Joint Administrative Order para magkaroon enforcement power maliban na lamang kung may nakasaad sa batas.

Transaksyon sa LTFRB, balik-face-to-face

ni Jeff Tumbado | June 6, 2023

Ipinag-utos ng Land Transportation Franchising and Regulatory Board (LTFRB) na gawin na lamang opsyonal ang online na pagkuha ng dokumento o paghahain ng iba pang request para sa ilang piling transaksyon sa ahensya.

Alinsunod ito sa Memorandum Circular No. 2023-019 na inilabas ng LTFRB Board upang amyendahan at baguhin ang Memorandum Circular No. 2020-016 na unang inisyu noong ika-19 ng Abril 2020.

Sa unang inilabas na memorandum, kinakailangan na isagawa online ang paghahain ng request para sa ilang transaksyon tulad ng Request for Special Permit, Request for Confirmation of Units, Request for Franchise Verification, Correction of Typographical Error, at Request for Issuance of Extension of Provisional Authority. Ito ay sa gitna ng pagpapatupad ng general community quarantine sa mga lugar na itinuturing na "low" o

"moderate risk areas" dahil sa COVID-19.

Gayunman, sa bagong inilabas na memorandum, pinahihintulutan na ngayon ang personal na paghahain ng request para sa mga nabanggit na transaksyon.

Sa kabila nito, inihayag ng LTFRB Board na kinakailangan pa ring bayaran ang filing fees para sa mga nasabing transaksyon, personal man o online ito isinagawa.

Nakasaad din sa bagong memorandum na bagama't umiiral pa rin ang COVID-19, lubos namang nababawasan ang epekto nito sa iba't ibang aspeto, partikular na sa kakayahang kumilos ng mga tao.

PUV, puwedeng mamili ng insurance provider — LTFRB

ni Jeff Tumbado | June 3, 2023

Ipinauubaya ng Land Transportation Franchising and Regulatory Board (LTFRB) sa mga magpaparehistro ng pampublikong sasakyan kung anong insurance provider ang nais nitong tangkilikin.

Ayon kay LTFRB Chairman Teofilo Guadiz III, mahigpit na susundin ng ahensya ang mga alituntunin ng Department of Transportation (DOTr) Department Order (DO) 2018-020, o ang "Revised Guidelines on Mandatory Insurance Policies for Motor Vehicles and

Personal Passenger Accident Insurance (PPAI) for Public Utility Vehicles".

Tinukoy ni Guadiz ang nasasaad sa Section 3 ng DO 2018-020 na ang mga aplikante ay malayang makapipili at kumuha ng Insurance Policies mula sa ano mang kuwalipikadong insurer at ang lahat ng insurance premium ay istriktong babayaran sa mga opisina o authorized collection sites ng qualified insurers.

“The instruction is to only accept PPAI policy from insurance providers duly accredited by the Insurance Commission. As regards Third-Party Liability (TPL) insurance policy, operators are free to choose and secure the same from any insurance company accredited by the Insurance Commission,” paliwanag ni Guadiz.

Pinabulaanan din ni Guadiz ang napaulat na umano'y plano ng LTFRB na magdagdag ng insurance provider na pagpipilian ng mga aplikante ng pampublikong sasakyan.

Tanging ang Insurance Commission lamang at hindi ang LTFRB ang may hurisdiksyon na mag-accredit ng mga bagong kumpanya ng insurance na maaaring pagpilian ng mga aplikante