Taas-pasahe sa jeep, pinag-aaralan pa ng LTFRB

ni Lolet Abania | February 26, 2022

Pinag-aaralan pa ng Land Transportation Franchising and Regulatory Board (LTFRB) ang inihihirit na taas-pasahe sa mga jeepneys habang patuloy din ang pagtataas ng presyo ng mga produktong petrolyo.

Una nang sinabi ni Political Science and International Relations (PSIR) Professor Anna Malindog-Uy na ang presyo ng gasoline ay walong sunud-sunod na linggo nang tumataas, at asahan pa aniyang tataas habang ang Russia ay nahaharap sa economic sanctions.

“Patuloy nating inaaral, may petition na natanggap natin . . . At ito ay naka-set for hearing ngayong March 8,” ani LTFRB Executive Director Maria Kristina Cassion sa isang televised briefing sa PTV ngayong Sabado.

Umapela na ang mga jeepney drivers at operators sa mga awtoridad na gawin ang minimum fare sa P10 dahil na rin sa patuloy na pagtaas ng presyo ng gas.

Sinabi naman ni Department of Trade and Industry (DTI) Undersecretary Ruth Castelo na ang ginawang invasion ng Russia sa Ukraine ay posibleng magdulot ng pagtataas ng oil prices.

Subalit ayon kay Castelo, maaaring ipantapat dito ang TRAIN Law mechanism na posibleng magsuspinde sa mga excise taxes kung ang fuel ay lumampas sa $80.

Base sa TRAIN Law, ang pagpapaliban ng mga excise taxes ay makababawas ng P6 sa presyo ng diesel at P10 bawas naman sa gasoline.

“Ang government naman, ready na harapin kung sakaling tataas pa para ma-cushion din ang effect nito sa ordinaryong tao tulad natin,” sabi pa ni Castelo.

Commuter na partially vaccinated naiyak matapos hindi pasakayin sa PUV

ni Jasmin Joy Evangelista | January 18, 2022

Hindi napigilang maiyak ng isang partially vaccinated worker matapos itong hindi payagang makasakay sa PUV sa unang araw ng full implementation ng no “vaccine, no ride” policy.

Ayon sa report ni Oscar Oida sa “24 oras”, sinabi ng commuter na si Dianne na maaga siyang gumising para dumalo sa kanyang medical exam sa trabaho pero hindi siya pinayagangmakasakay sa mga pampasaherong sasakyan.

Giit niya ay hindi naman niya kasalanang sa Pebrero pa naka-schedule ang second dose ng kanyang AstraZeneca vaccine.

"Nakakapagod 'yung ginagawa nila. Partially vaccinated naman kami. Bakit 'di kami pinayagan?" tanong niya.

Ilang unvaccinated construction workers din ang hindi pinasakay sa PUV kung kaya’t umuwi na lang.

Samantala, ang mga PUV driver naman na hindi pa kumpleto ang bakuna ay binigyan muna ng warning. Gayunman, ire-report ito sa Land Transportation Franchising and Regulatory Board (LTFRB).

Sinabi rin ni Police Lieutenant Colonel Joel Mendoza, officer-in-charge ng Regional Highway Patrol Group sa Metro Manila, na gagawa ng aksiyon ang LTFRB sa mga PUV drivers na magba-violate sa polisiya.

Sa kabila ng mga kritisismo, itinuloy ng DOTr ang polisiya nito na i-ban sa mga PUV sa Metro Manila ang mga hindi pa bakunado habang ito ay nasa ilalim ng Alert Level 3 o mas mataas na Alert Level hanggang sa katapusan ng Enero.

Magpiprisinta ng pekeng vaccine cards, med certificates, posibleng makasuhan — LTFRB

ni Lolet Abania | January 16, 2022

Ipinahayag ng Land Transportation Franchising and Regulatory Board (LTFRB) ngayong Linggo na ang mga commuters na magpiprisinta ng pekeng vaccine cards o medical certificates sa panahon ng pagpapatupad ng “no vaccination, no ride” policy ay posibleng maharap sa criminal offense.

Sa isang radio interview kay LTFRB-National Capital Region (NCR) Director Zona Tamayo, sinabi nitong kinokonsidera na nila ang isang local government unit-issued vaccine card o isang duly-signed medical certificate bilang mga public documents, kaya ang ipalsipika ito ay maaaring magresulta sa kasong kriminal.

“Criminal offense po ‘yan — merong imprisonment, meron pang penalties ‘yan. Medyo mabigat ‘pag sinabi nating criminal offense,” sabi ni Tamayo.

Una nang ipinagbawal ng Department of Transportation (DOTr), ang mga unvaccinated na indibidwal na gumamit ng mga pampublikong transportasyon sa NCR habang ang lugar ay nasa ilalim ng Alert Level 3.

Mapapatunayan naman ang full vaccination status ng indibidwal, sa pamamagitan ng pagprisinta nito ng alinman sa tinatawag na physical o digital copy ng LGU-issued vaccine card, ng Department of Health (DOH)-issued vaccine certification, o anumang Inter-Agency Task Force-prescribed document na mayroong valid government-issued ID na may larawan at address.

Exempted naman mula sa “no vaccination, no ride” policy ang mga indibidwal na may medical conditions na hindi pa pinayagang mabakunahan kontra-COVID-19, subalit kailangan nilang magprisinta ng duly-signed medical certificate na may pangalan at contact details ng kanilang doktor.

Gayundin, ang mga indibidwal na bibili ng essential goods at services ay exempted, basta mayroong silang duly-issued barangay health pass o iba pang patunay ng kanilang lehitimong pagbibiyahe.

Ang nasabing polisiya ay mahigpit na ipapatupad simula sa Lunes, Enero 17.

Matatandaang inihayag ng DOTr na ang mga pasahero o commuting public ay maaaring pagmultahin dahil sa paglabag sa kani-kanilang LGU ordinances, gaya ng paghihigpit sa galaw ng mga hindi pa bakunado.

“Ang range po niyan nasa P500 up to P5,000. ‘Yung iba naman po may kasamang imprisonment ranging from five days to six months,” paliwanag ni DOTr Undersecretary for Legal Affairs and Procurement Reinier Paul Yebra.

“Siyempre kung may makitang paglabag din sa existing na mga health protocols o ordinansa ng ating mga LGUs ay puwede silang patawan ng karagdagang penalties para doon,” sabi pa ni Tamayo.

Gayunman, ayon sa Philippine National Police-Highway Patrol Group ng NCR, na sa unang linggo ng pagpapatupad ng polisya, ang mga commuters na hindi pa bakunado kontra-COVID-19 ay bibigyan lamang ng warning.

“Ang nais naman natin kasi para sa pagpapatupad ng programang ito ay mabigyan ng impormasyon ang ating mga pasahero nang sa gayon ay hindi naman tayo magkaroon ng problema on the ground,” giit ni Tamayo.

Hinimok naman ni Tamayo ang publiko, gayundin ang mga government officials at PUV drivers at operators, na mag-comply sa naturang polisiya at huwag magprisinta ng mga pekeng dokumento para na rin sa kaligtasan ng lahat at pag-iwas sa panganib ng COVID-19.