Fuel subsidy, sinuspinde muna dahil sa election spending ban – LTFRB

ni Lolet Abania | April 4, 2022

Sinuspinde pansamantala ng Land Transportation Franchising and Regulatory Board (LTFRB) ang alokasyon ng fuel subsidy para sa mga public utility vehicle (PUV) drivers at operators dahil ito sa election public spending ban.

Sa isang interview ngayong Lunes, sinabi ni LTFRB executive director Maria Kristina Cassion na tinatayang 110,200 ng kanilang PUV beneficiaries ang nakatanggap na ng subsidies hanggang nitong Marso 29.

Ayon kay Cassion, mayroon namang tinatayang 22,000 taxi at UV Express na mga benepisyaryo ang sumasailalim sa document validification, habang ang Department of Trade and Industry (DTI) ay nakatakdang magbigay ng subsidy sa tinatayang 27,000 delivery services.

Para sa mga tricycle drivers, sinabi ng LTFRB na hinihintay pa nila ang listahan ng mga benepisyaryo mula sa Department of the Interior and Local Government (DILG).

Subalit, ang disbursement o pagbibigay ng fuel subsidy para sa mga PUV drivers at operators ay pansamantalang itinigil dahil sa election public spending ban na ipinatutupad ng Commission on Elections (Comelec) mula Marso 25 hanggang Mayo 8, 2022.

Sa ilalim ng Comelec’s Resolution No. 10747, kailangan ng isang certificate of exemption para maisagawa ang mga aktibidad at mga programa kaugnay sa social welfare projects at mga serbisyo sa gitna ng naturang ban.

“Before the ban, nagkaroon tayo ng application sa Comelec for exemption at nagkaro’n na po tayo ng hearing. Right now, we are just waiting for the result of our application for exemption sa ban so we can continue distribution,” paliwanag ni Cassion.

Gayunman, habang naghihintay sa desisyon ng Comelec, ayon kay Cassion, ipagpapatuloy nila ang produksyon ng ilang 86,000 Pantawid Pasada Program (PPP) cards para sa ibang mga benepisyaryo.

Una nang sinimulan ng LTFRB nitong Marso ang distribusyon ng P6,500 fuel subsidies sa mahigit 377,000 kuwalipikadong PUV drivers at operators upang makatulong na maibsan ang kanilang kalagayan sanhi ng sunud-sunod na pagtaas sa presyo ng langis na dulot ng nagaganap na sigalot sa pagitan ng Ukraine at Russia.

Ang mga subsidy ay kanilang makukuha sa pamamagitan ng cash cards na inisyu ng Landbank of the Philippines na maaari naman nilang gamitin sa mga accredited fuel stations.

P703M fuel subsidy, naipamahagi na sa mga benepisyaryo – LTFRB

ni Lolet Abania | March 22, 2022

Inianunsiyo ng Land Transportation Franchising and Regulatory Board (LTFRB) ngayong Martes na nasa P703 milyon halaga ng fuel subsidies ang nai-release na sa gitna ng sunud-sunod na pagtaas sa presyo ng mga produktong petrolyo.

Ayon kay LTFRB Executive Director Tina Cassion, sakop ng fuel subsidies ang kabuuang 108,164 benepisyaryo na nakatanggap ng P6,500 per unit kaugnay sa Pantawid Pasada Program ng gobyerno.

Ang pamahalaan ay naglaan ng inisyal na P2.5 bilyon para makapagbigay ng mga fuel vouchers sa 377,000 kuwalipikadong mga public utility vehicle (PUV) drivers sa buong bansa sa gitna ng magkakasunod na pagtaas ng pump prices.

“Pinapaalalahanan ang mga operators /drivers, na ang halaga na kanilang matatanggap na fuel subsidy sa ilalim ng programang ito ay maaari lamang gamitin para sa pagbili ng kailangan nilang krudo,” giit ni Cassion sa isang statement na inilabas sa mga reporters.

Sa ilalim ng Pantawid Pasada Program, ang mga drayber ng PUVs ay mabibigyan ng financial aid na magiging pantakip sa mas mataas na presyo ng mga prduktong petrolyo, kung saan umabot na ito sa 11 na magkakasunod na pagtaas mula sa nakalipas na 12 linggo.

Bagaman ang mga kumpanya ng langis ay nagpatupad ng rollback ngayong Martes, hindi pa rin ito sapat para makabawi sa 11 linggong sunud-sunod na pagtaas ng presyo ng krudo noong mga nakaraang linggo.

“Patuloy ang LTFRB sa pagproseso ng fuel subsidy sa iba pang mga benepisyo. Nakikipag-ugnayan ang ahensya sa Land Bank of the Philippines para mapabilis ang implementasyon ng buong programa,” sabi pa ni Cassion.

Noong nakaraang linggo sinabi ng Department of Transportation (DOTr) na ang mga jeepney drivers ang unang mga benepisyaryo ng naturang programa, subalit ang ibang uri ng transportasyon ay maghihintay naman hanggang sa ikalawang quarter dahil sa tinatawag na logistical issues.

LTFRB muling binuksan ang interregional provincial bus routes

ni Jasmin Joy Evangelista | March 9, 2022

Balik-operasyon na ang Provincial Public Utility Buses (PUBs) sa Inter-regional Routes, ayon sa Land Transportation Franchising and Regulatory Board (LTFRB) nitong Martes.

Sa inilabas na Memorandum Circular No. 2022-023, sinabi ng LTFRB na lahat ng PUB operators na may valid Certificate of Public Convenience (CPC), Provisional Authority (PA), at Special Permits ay papayagan nang magbalik-operasyon at gumamit ng designated end-point terminals papunta at palabas ng Metro Manila.

Ang mga expired na ang CPC pero nakapag-file ng Application for Extension of Validity bago ang expiration nito, ay papayagan na ring magbalik-operasyon sa mga nasabing ruta base sa Memorandum Circular No. 2022-023.

Sa pamamagitan nito, ang mga inter-regional routes kabilang ang provincial commuter routes na manggagaling sa Calabarzon ay papayagan nang magbalik sa orihinal nitong terminal — Araneta Bus Terminal, Cubao — via C5.

Gayunman, ang mga provincial commuter routes na may pre-COVID endpoints sa Buendia, Makati, Pasay, at Manila ay patuloy na magiging end-point ang Parañaque Integrated Terminal Exchange (PITX) kabilang ang mga manggagaling sa remote parts ng South Luzon tulad ng Quezon, Mimaropa, at Bicol.

Puwede na ring magsakay at magbaba ng pasahero ang mga provincial buses mula Visayas at Mindanao na patungong Metro Manila sa Santa Rosa Integrated Terminal (SRIT).

Pinaalalahanan naman ng LTFRB ang mga PUB operators na siguruhing may QR Code ang bawat awtorisadong unit bago pa man ito ibiyahe. Ang QR code ay puwedeng i-download sa website ng LTFRB at i-print sa short bond paper (size 8.5 “× 11”) at ipaskil sa front windshield ng bus.

“Sa mga nais naman bumiyahe, paalala pong muli na kailangang sundin ang ating mga health and safety protocols para sa ligtas na byahe,” ayon pa sa LTFRB.