6 prov’l bus operators, inisyuhan ng show-cause orders ng LTFRB

ni Lolet Abania | April 23, 2022

Nag-isyu na ang Land Transportation Franchising and Regulatory Board (LTFRB) ng show-cause orders sa anim na provincial bus operators para ipaliwanag nito kung bakit libu-libong mga pasahero ang na-stranded sa Pampanga bus stations ngayong linggo.

Una nang isinisi ng LTFRB at Metropolitan Manila Development Authority (MMDA) ang nangyaring pagkalito o confusion hinggil sa ipinatutupad ngayong window hour scheme mula sa ilang bus companies anila, “they were ‘sabotaging’ the policy”.

Ayon sa LTFRB, ang mga provincial bus operators na umano’y lumabag sa kanilang Certificate of Public Convenience ay ang mga sumusunod:

• Victory Liner Inc.

• Genesis Transport Service Inc.

• Bataan Transit Bus Co. Inc.

• Five Star Bus Inc.

• First North Luzon Transit Inc.

• Maria De Leon

Nabatid ng mga awtoridad na batay sa LTFRB, ang mga naturang bus operators ay hindi umano nagkaroon ng anumang biyahe o trips patungong Manila, na naging dahilan kaya libu-libong pasahero ang na-stranded mula sa mga sumusunod na terminals sa Pampanga:

• Dau Terminal, Mabalacat, Pampanga

• Robinsons Mall Terminal, San Fernando City, Pampanga

• Victory Liner Terminal, San Fernando City, Pampanga

• Bataan Transit Terminal, San Fernando City, Pampanga

• Genesis Terminal, San Fernando City, Pampanga

• Bus Stop in Mexico, Pampanga

Samantala, itinakda ang hearing kaugnay dito sa Mayo 10 via teleconference.

“Ang mga [public utility bus] operators ay natukoy ng LTFRB Region III na hindi nag-operate sa mga terminal sa Pampanga na nagdulot ng mahahabang pila ng libo-libong pasaherong hindi makabiyahe papunta ng Metro Manila noong ika-20 ng Abril... dahil sa kawalan ng pampublikong bus,” batay sa notice.

“Kasunod niyan ay inaatasang magbigay ng paliwanag ang anim na PUB operators dahil sa nangyaring insidente at kung bakit sila hindi nag-operate noong ika-20 ng Abril,” ayon pa sa notice.

Nitong Biyernes, sinabi ni MMDA Chairman Romando Artes na ang window hours policy ay mananatili alinsunod ito sa development plan ng gobyerno.

Maraming provincial bus operators ang naglimita ng kanilang operasyon sa gabi dahil sa bagong ipinatupad na window hour scheme, subalit nilinaw naman ng transport authorities na ang polisiya ay patungkol lamang sa paggamit ng mga private terminals sa loob ng Metro Manila.

Libreng sakay, aarangkada uli sa Abril 11 — LTFRB

ni Lolet Abania | April 9, 2022

Inianunsiyo ng Land Transportation Franchising and Regulatory Board (LTFRB) na ang service contracting program, kung saan kabilang dito ang libreng sakay sa mga pasahero, ay sisimulan na ulit sa Lunes, Abril 11, 2022.

“We are preparing for Monday implementation nationwide for the service contracting program pero hindi pa siguro lahat ng ruta, gradual pa lang, kasi nagko-complete pa naman ang ibang operators ng kanilang requirements din,” pahayag ni LTFRB Executive Director Maria Kristina Cassion sa isang interview ngayong Sabado.

Sa ilalim ng service contracting program ng LTFRB, ang mga public utility vehicle (PUV) operators at drivers na makikiisa sa free ridership program ng gobyerno ay makatatanggap ng isang one-time payout at weekly payments base sa bilang ng kilometro na ibiniyahe nila bawat linggo, may pasahero man sila o wala.

Ayon kay Cassion, ang ruta ng EDSA Bus Carousel ay kabilang sa mauunang ruta na may libreng biyahe sa Lunes.

Gayundin aniya, sa susunod na mga araw ay bubuksan ng LTFRB ang NLEX hanggang sa Metro Manila service route para sa free ridership program. Binanggit naman ng opisyal na ang service contracting program ay mayroong budget na P7 bilyon sa ilalim ng 2022 General Appropriations Act.

Sakop ng programa aniya, ang 1,000 ruta sa buong bansa na lalahukan ng 13,000 hanggang 15,000 units ng PUVs gaya ng modern at traditional jeepneys, bus at UV Express. Ayon pa kay Cassion, ang service contracting program ay tatagal ng 45 hanggang 60 araw depende ito sa rehiyon.

Gayunman, ang Metro Manila aniya ay tatagal ng 60 araw. Sinabi naman ng opisyal na ang service contracting program, katulad ng fuel subsidy program, ay nag-secure ng exemption mula sa Comelec sa gitna ng election public spending ban.

Para sa Semana Santa… LTFRB naka-heightened alert na mula April 8

ni Jasmin Joy Evangelista | April 7, 2022

Inanunsiyo ng Land Transportation Franchising and Regulatory Board (LTFRB) nitong Miyerkules na naka- “heightened alert” na sila mula April 8, para sa Semana Santa at summer season.

Ayon sa LTFRB, naka-“heightened alert” sila hanggang April 18, 2022, bilang pagtalima sa direktiba ng Department of Transportation: “Oplan Biyaheng Ayos: Summer Vacation 2022.”

Kaugnay nito, ipinag-utos ni LTFRB Chairman Martin Delgra III sa lahat ng agency leaders na siguruhin ang safety at security ng lahat ng pasahero at pagsunod ng mga Bus Terminals sa guidelines ng LTFRB, kung saan inaasahan ang mabigat na daloy ng trapiko dahil sa Semana Santa.

Magsasagawa rin ng random inspections ang LTFRB sa mga bus upang matiyak ang “road worthiness” at kaligtasan ng mga commuter.

Sinabi rin ng LTFRB na maaaring pumunta ang mga pasaherong pauwi ng probinsiya sa mga sumusunod na terminal sa Metro Manila: Parañaque Integrated Terminal Exchange (PITX), Santa Rosa Integrated Terminal (SRIT), North Luzon Expressway Terminal (NLET), at Araneta Center Terminal.

Ang mga pribadong terminal naman sa Metro Manila ay maaaring ma-access ng bus operators mula 10 p.m. hanggang 5 a.m. base sa “window scheme” na ipinatutupad ng Metropolitan Manila Development Authority.

“Maglalagay din ng mga Malasakit Help Desk na maaaring pagtanungan o pagsumbungan ng mga mananakay,” ani LTFRB.

“Ipoposte ang mga Malasakit Help Desk sa mga naitalagang Integrated Terminal Exchange na nauna nang nabanggit at sa mga lugar malapit sa mga pribadong terminals,” dagdag pa nito.