LTFRB, handa na sa transport strike

ni Eli San Miguel - Trainee @News | April 12, 2024

Inihayag ni Land Transportation Franchising and Regulatory Board (LTFRB) chair Teofilo Guadiz III na handa silang harapin ang dalawang-araw na transport strike sa susunod na linggo.

Sinabi ni Guadiz na itatalaga ng LTFRB at Metro Manila Development Authority (MMDA) ang kanilang mga tauhan at sasakyan sa mga lugar na maaaring maapektuhan ng kilos-protesta ng Manibela at Piston.

Inilarawan niya rin na hindi na bago sa kanila ang ginagawa ng Manibela at Piston.

Noong Huwebes, inanunsiyo ng dalawang transport groups na magdaraos sila ng welga sa loob ng dalawang araw simula Abril 15 upang iprotesta ang papalapit na deadline ng franchise consolidation sa ilalim ng Public Utility Vehicle (PUV) Modernization Program.

Matatandaang nagsagawa ang Manibela at Piston ng ilang mga welga laban sa deadline ng franchise consolidation mula noong nakaraang taon.

Bahay ni LTFRB chair Guadiz, pinasok ng mga armado

ni Eli San Miguel - Trainee @News | December 14, 2023

Pumasok nang sapilitan ang higit sa sampung armadong tao sa bahay ni Teofilo Guadiz III, chairman ng Land Transportation Franchising and Regulatory Board (LTFRB), sa Dagupan City, ayon sa transport official ngayong Huwebes.

"While this incident has shaken our family, I remain committed to my responsibilities at the LTFRB, and I am confident that justice will be served. Updates on the investigation will be provided as they become available," pahayag ni Guadiz.

Dagdag ng LTFRB chief, "It seems personal, and the motive remains unclear."

Iniulat ni Guadiz na tatlong sasakyan at higit sa 10 armadong indibidwal ang sangkot sa pangyayari.

Ayon sa ulat ng pulisya sa Dagupan, dalawang sasakyan: isang puting van at isang itim na sports utility vehicle (SUV) ang dumating.

Nasa loob ng bahay ang 91-anyos na babae at ang kanyang kasambahay nang dumating ang mga salarin, na nagsabing magbibigay ng mga grocery bilang regalo. Sa pagbukas ng gate, mabilis na pumasok ang mga suspek sa bahay.

Nakumpirma na ligtas ang mga biktima.

Nangyari ang insidente bago ang pagsiklab ng two-day nationwide strike ng transport group na PISTON bilang protesta sa Disyembre 31 na deadline para sa consolidation ng mga public utility vehicles (PUV).

LTFRB, maaaring magbigay ng 5-taong prangkisa sa mga jeepney

ni Eli San Miguel - Trainee @News | November 20, 2023

Bukas ang Land Transportation Franchising and Regulatory Board (LTFRB) sa pagbibigay ng limang taong prangkisa sa mga operator ng jeepney bilang bahagi ng kanilang negosasyon sa transport group na nagsasagawa ng tigil-pasada, ayon sa kanilang pahayag ngayong Lunes.

Sa kasalukuyan, nag-aalok ang LTFRB ng isang-taong provisional authority para sa mga jeepney alinsunod sa programang modernisasyon.

Sa Disyembre 31, 2023 ang takdang petsa para sa proseso ng pagpapatibay ng modernisasyon sa mga Public Utility Vehicles (PUV).

“But the moment na sumama na sila modernization program, pupuwede naman po naming ibigay iyong five years na hinihingi nila,” pahayag ni LTFRB chairperson Teofilo Guadiz III.

Sinabi ni Guadiz na nagtakda ang PISTON ng pulong kasama ang LTFRB sa ganap na alas-tres ng hapon ngayong Lunes.