Davao de Oro, nasa state of calamity dahil sa LPA

ni Lolet Abania | April 8, 2022

Idineklara ng Sangguniang Panlalawigan ng Davao de Oro, ang probinsiya sa state of calamity ngayong Biyernes dahil sa idinulot na pinsala sa agrikultura at ari-arian sanhi ng low pressure area (LPA).

Sa inilabas na Resolution No. 1813-2022, ang Sangguniang Panlalawigan ay nagdeklara ng state of calamity para mapabilis ang paghahatid ng mga serbisyo sa mga apektadong komunidad.

Base sa initial assessment ng Provincial Disaster Risk Reduction and Management Council’s Rapid Damage Assessment and Needs Analysis (PDRRMC-RDANA) ay nakasaad, “the LPA ‘severely damaged’ houses, infrastructure, livelihoods, crops, agricultural products, and power lines within the province.”

Wala namang ibinigay ang resolusyon na pagtaya sa halaga ng pinsala na idinulot ng weather disturbance. Ayon sa 24-oras na weather forecast ng PAGASA ngayong Biyernes, magdudulot ang LPA at intertropical convergence zone (ITCZ) ng maulap na papawirin, kalat-kalat na mga pag-ulan at thunderstorms sa buong bahagi ng bansa.

Bandang alas-3:00 ng hapon, namataan ang LPA na nasa layong 185 kilometers east northeast ng Surigao City. Sinabi ng PAGASA na mino-monitor na rin nila ang isa pang tropical storm sa labas ng Philippine Area of Responsibility (PAR), kung saan huling namataan sa layong 2,215 kilometers east ng Mindanao.

LPA, namataan sa Caraga at Eastern Visayas — PAGASA

ni Lolet Abania | January 22, 2022

Magdudulot ang namataang isang low pressure area (LPA) ng maulap na papawirin na may kalat-kalat na pag-ulan at thunderstorms sa buong Caraga at Eastern Visayas, habang ang Northeast Monsoon (Amihan) ay makaaapekto sa Northern at Central Luzon, batay sa ulat ng PAGASA ngayong Sabado.

Ayon sa 4PM weather forecast ng PAGASA, ang Cagayan Valley, Cordillera Administrative Region (CAR), Aurora, at Quezon ay makararanas ng maulap na papawirin na may mga pag-ulan dulot ng Amihan.

Makararanas naman ang Metro Manila, Ilocos Region, at ang natitirang bahagi ng Central Luzon ng bahagyang maulap hanggang sa maulap na papawirin na may pabugso-bugsong mahinang pag-ulan.

Habang ang natitirang bahagi ng bansa ay makararanas ng bahagyang maulap hanggang sa maulap na papawirin na may kasamang pabugso-bugsong pagbuhos ng ulan o thunderstorms na posibleng magdulot ng mga pagbaha o landslides sa panahon ng severe thunderstorms.

Sa wind speed forecast ng PAGASA sa natitirang bahagi ng bansa, katamtaman hanggang sa malakas na pagbugso habang ang coastal waters ay magiging katamtaman hanggang sa mabigat na pag-alon nito.

Ang araw ay sisikat ng alas-6:25 ng umaga ng Linggo.

LPA, namataan sa Davao City — PAGASA

ni Lolet Abania | December 6, 2021

Namataan ang isang low pressure area (LPA) na malapit sa Davao City ngayong Lunes, ayon sa PAGASA.

Sa daily weather bulletin ng PAGASA, ang LPA ay natagpuan sa layong 735 kilometro silangan ng Davao City bandang alas-3:00 ng hapon ngayong Lunes.

Magdudulot ang LPA at ang tinatawag na shear line ng maulap na papawirin na may kalat-kalat na pag-ulan at thunderstorms sa buong Eastern Visayas, Northern Mindanao, Caraga, Davao Region, at Bohol.

Pinayuhan naman ng PAGASA ang mga apektadong residente na maghanda sa posibleng mga pagbaha o landslides mula sa katamtaman, at minsang malakas na pagbuhos ng ulan.

Samantala, ang Cagayan Valley, Cordillera Administrative Region, Aurora, at ang northern portion ng Quezon kabilang na ang Polillo Islands ay makararanas ng maulap na papawirin na may mahinang pag-ulan dahil sa Northeast Monsoon.

Ang Northeast Monsoon ay magdudulot naman ng bahagyang maulap hanggang sa maulap na papawirin na may kasamang isolated light rains sa buong Metro Manila, natitirang bahagi ng Luzon, at natitirang bahagi ng Visayas.

Makararanas naman ang natitirang bahagi ng Mindanao ng bahagyang maulap hanggang sa maulap na papawirin na may kasamang isolated rain showers dahil sa localized thunderstorms.

Posible ring magkaroon ng flash floods o landslides na idudulot ang matinding thunderstorms.

Gayundin, makararanas ng katamtaman hanggang sa malakas na bugso ng hangin at katamtaman hanggang sa maalon ang kondisyon ng coastal water sa buong Luzon, Visayas, at ang eastern section ng Mindanao.

Habang ang natitirang bahagi ng Mindanao ay makararanas ng mahina hanggang sa katamtamang bugso ng hangin at bahagya hanggang sa katamtamang kondisyon ng katubigan.