2 bagyo, mino-monitor ng PAGASA

ni Mai Ancheta | June 5, 2023

Matapos mag-exit ang Bagyong Betty, may nakaamba na namang dalawang namumuong bagyo sa labas ng Pilipinas.

Ayon sa pagtaya ng Philippine Atmospheric, Geophysical and Astronomical Services Administration (PAGASA), ang namumuong low pressure area sa labas ng Pilipinas ay maaaring magpalakas sa habagat na nararanasan sa bansa.

Posibleng magpatuloy ang nararanasang habagat sa kanlurang bahagi ng Southern Luzon hanggang sa Biyernes dahil sa dalawang LPA.

Ang unang namataang LPA ay sa bahagi ng Visayas na maaaring mabuo bilang tropical cyclone sa kalagitnaan ng susunod na linggo.

Pero sinabi ng PAGASA na hindi ito inaasahang mag-landfall kapag nakapasok sa bansa.

Ang ikalawang LPA ay namataan naman sa West Philippine Sea na inaasahang tatahak sa Southern China sa kalagitnaan ng susunod na linggo.

Makararanas ang Metro Manila ng mainit na temperatura sa umaga hanggang hapon at mga pagkulog sa hapon hanggang gabi mula Lunes hanggang Biyernes at inaasahang mga pag-ulan sa weekend.

Makararanas din ng mga pag-ulan ang Palawan sa buong linggo dahil sa epekto ng habagat, at ang ibang bahagi ng bansa ay makararanas ng malalakas na pagkulog sa hapon hanggang gabi sa Lunes at Martes.

Namataan sa Eastern Samar.. LPA, magdudulot ng pag-ulan sa Bicol Region, Visayas at Mindanao

ni Lolet Abania | June 22, 2022

Isang low pressure area (LPA) ang magdudulot ng maulap na papawirin na may kalat-kalat na mga pag-ulan at thunderstorms sa buong Bicol Region, Eastern at Central Visayas, Caraga, Northern Mindanao, at Palawan, ayon sa PAGASA ngayong Miyerkules.

Batay sa 4PM weather forecast ng PAGASA, ang LPA ay namataan sa layong 170 kilometro east ng Borongan City, Eastern Samar ng alas-3:00 ng hapon.

Nagbabala rin ang PAGASA sa posibleng flash floods o landslides sanhi ng katamtaman hanggang sa paminsang malakas na mga pag-ulan sa mga lugar na apektado ng LPA.

Ang Metro Manila at ang natitirang bahagi ng bansa ay makararanas ng bahagyang maulap hanggang sa maulap na papawirin na may pulo-pulong mga pagbuhos ng ulan o thunderstorms.

Paalala rin sa mga residente na mag-ingat sa posibleng flash floods o landslides na mararanasan sa severe thunderstorms.

Ayon pa sa PAGASA, “The whole archipelago will experience light to moderate wind speeds moving in east to southeast direction, while coastal water conditions will be slight to moderate, ranging from 0.6 to 2.1 meters.

Namataan sa Northern Samar.. LPA, magdudulot ng mga pag-ulan sa Sorsogon, 7 pang lugar — PAGASA

ni Lolet Abania | June 5, 2022

Namataan ang isang low pressure-area (LPA) na magdudulot ng maulap na papawirin na may kalat-kalat na pagbuhos ng ulan at thunderstorms sa buong Sorsogon, Masbate, Romblon, Palawan, Zamboanga Peninsula, Northern Mindanao, BARMM, at Visayas, ayon sa PAGASA ngayong Linggo.

Batay sa 4PM weather report ng PAGASA, ngayong alas-3:00 ng hapon ang LPA ay matatagpuan sa layong 30 km west-northwest ng Catarman, Northern Samar.

Nagbabala naman ang PAGASA sa posibleng flash floods o landslides, mula sa katamtaman hanggang sa paminsang malakas na pag-ulan sa mga lugar na apektado ng LPA.

Ang Metro Manila at natitirang bahagi ng bansa ay makararanas ng bahagyang maulap hanggang sa maulap na papawirin na may pulo-pulong pagbuhos ng ulan o thunderstorms.

Pinayuhan din ang mga residente na mag-ingat sa posibleng flash floods o landslides na maaaring maranasan sa severe thunderstorms.

Ayon pa sa PAGASA, “wind speed forecast for the western section of the country is light to moderate moving southwest to south, while coastal waters will be slight to moderate, with waves ranging from 0.8 to 2.1 meters high.”

Habang ang natitirang bahagi ng bansa ay makararanas ng mahina hanggang sa katamtamang bugso ng hangin na kumikilos southeast patungong southwest, habang ang mga coastal waters ay magiging mahina na may pag-alon na papalo mula 0.8 hanggang 2.1 metro ang taas.