Test kit sa pag-detect ng ASF, mabibili na

ni Lolet Abania | July 14, 2022

Isang test kit na mura, magaang dalhin, at ‘sensitive’ sa pagtukoy ng African Swine Fever (ASF) virus ang na-develop at mabibili na sa bansa.

Ito ay ang GenAmplify ASF PCR Detection Kit, isang molecular-based testing platform na gawa ng GenAmplify Technologies, Inc. (GTI), isang subsidiary ng Manila Healthtek (MTek), ang nangungunang biotech company sa larangan ng diagnostics.

Sa Calabarzon, ang kit ay idini-distribute ng Diamed Enterprise, isang provider ng Life Science and Diagnostics products sa Pilipinas.

Ayon kay Lorenzo Arellano, isang doktor ng Veterinary Medicine ng Diamed, masusi ang naging pananaliksik at testing na isinagawa bago pa inilunsad ito sa bansa.

“The GenAmplify ASF PCR Detection Kit delivers the same quality of performance as international brands. It is user-friendly, and is very convenient since it allows the use of different types of samples,” sabi ni Arellano.

Noong nakaraang taon, ang breakthrough kits ay inaprubahan ng Food and Drug Administration.

Nakakuha rin ito ng seal of validation sa Veterinary Laboratory Division ng Bureau of the Animal Industry (BAI) na sinertipikahang 100% sensitive at 100% specific.

Ginawa ito sa koordinasyon ng iba’t ibang animal diseases diagnostic laboratories bago ang actual roll-out nito sa merkdado.

Ang mismong laboratoryo ng Diamed Enterprise sa Los Baños ay isa sa mga nakilahok sa proseso ng field validation.

“We are open also for other distributors to cover other areas, most especially those areas with reported outbreaks. A wider distribution network will eventually help us further lower the cost of testing to make it more accessible for hog farmers,” pahayag ni Maricar Ocampo, vice president for Sales and Marketing ng GTI.

Maliban sa murang presyo, may kakaibang bentahe rin ito ayon kay Dr. Ernesto Balolong, Jr., director ng Research and Development ng Animal Health Division ng MTek.

“Since the product is locally-developed, the manufacturers can readily provide technical assistance to laboratories should there be problems, versus imported test kits,” saad ni Balolong.

Admin aide, nahulog mula sa 4th floor ng Mabini Hall ng Malacañang, patay

ni Lolet Abania | July 14, 2022

Isang kawani na nagtatrabaho sa Malacañang compound ang nasawi matapos na mahulog mula sa ikaapat na palapag ng Mabini Hall, ayon kay Press Secretary Trixie Cruz-Angeles ngayong Huwebes.

Sa isang press briefing, kinilala ni Angeles ang biktima na si Mario Castro, isang administrative aide na naka-assign sa Information Communications Technology Office sa ilalim ng Deputy Executive Secretary for Finance and Accounting.

Ayon kay Angeles, sa ngayon ay iniimbestigahan na ang pagkamatay ni Castro. Habang nagpahayag din ng pakikiramay ang opisyal sa pamilya ng biktima.

“Kasalukuyang iniimbestigahan ang kanyang pagkamatay at nagko-coordinate ang Presidential Security Group at ang PNP Security Force Unit. May naiwang asawa at mga anak si Mr. Castro. Kami po ay nakikiramay sa kanyang pamilya,” sabi ni Angeles.

Usec. Vergeire, bilang DOH OIC – P-BBM

ni Lolet Abania | July 14, 2022

Itinalaga ni Pangulong Ferdinand “Bongbong” Marcos Jr. si Department of Health (DOH) Undersecretary Maria Rosario Vergeire bilang officer-in-charge ng naturang ahensiya.

Ito ang inanunsiyo ni Press Secretary Trixie Cruz-Angeles sa isang interview sa state-run na PTV-4.

Gayundin, sinabi ni Angeles na si dating LRT administrator Mel Robles ang na-nominate bilang general manager ng Philippine Charity Sweepstakes Office (PCSO).

Sa isang press conference sa Malacañang, ayon kay Angeles ang termino ni Vergeire bilang OIC ay maaaring ma-extend kung ang administrasyon ay wala pang napiling DOH secretary matapos ang isang buwan, alinsunod ito sa Memorandum Circular No. 1.

“Tama po kayo na ang MC 1 nagtatalaga lang po ng OIC hanggang sa katapusan ng buwan. Ini-expect po natin na kung wala pang natatalagang pinuno ang DOH before that time ay ie-extend ang pagka-OIC. But titingnan po natin ang mangyayari during that time,” pahayag ni Angeles.

Sa MC 1, inaatasan ng Malacañang ang mga next-in-rank at pinaka-senior officials na mamuno o mag-take over bilang officers-in-charge sa mga departamento, opisina, ahensiya, at bureau habang wala pang napipiling kapalit na mga top executives.

Ang OIC ang gaganap ng tungkulin ng opisina hanggang Hulyo 31, 2022, o hanggang ang kapalit o replacement ay maitalaga para sa posisyon.

Kaugnay naman sa task ng Inter-Agency Task Force (IATF) for the Management of Emerging Infectious Diseases, sinabi ni Angeles na ang kanilang functions ay magpapatuloy sa bagong administrasyon.

Nagpasalamat naman ang DOH kay Pangulong Marcos sa pagpili kay Vergeire, na kasalukuyang undersecretary for Public Health Services Team at Office of the Chief of Staff ng ahensiya, gayundin, kanilang spokesperson, na maging kanilang OIC.

“[The] DOH appreciates the President's confidence in one of its career executives, including the immense responsibility such trust brings,” ani DOH sa isang statement sa desisyon ng Pangulo.

“Each and every member of the DOH family shall work together to continue the gains instituted by previous administrations. We look forward to continuing our recovery from the pandemic, and working towards universal health care for all Filipinos,” pahayag pa ng ahensiya.

Una nang inilagay ni dating DOH Secretary Francisco Duque III si Vergeire bilang succeeding incident manager ng National Vaccination Operations Center (NVOC), kapalit ni Myrna Cabotaje.

Bilang DOH’s officer-in-charge, inaasahan na si Vergeire ang mangangasiwa at magma-manage ng pangkalahatang health situation ng bansa sa gitna ng mga banta ng pagtaas ng mga kaso ng COVID-19 at dengue cases sa mga nakalipas na linggo.