Mga ulat sa nawawalang pangalan ng kandidato sa balota, ‘fake news’ — Comelec

ni Lolet Abania | April 25, 2022

Mariing pinabulaanan ni Comelec Commissioner George Garcia ang mga reports na ang pangalan ni Vice President Leni Robredo ay na-omit mula sa isang balota sa New Zealand, kung saan tinawag niya ang insidente na “fake news".

Sa isang interview ngayong Lunes, sinabi ni Garcia na ang mga balota ay iniimprenta by batch, kaya aniya, marami dapat na mga reklamo silang matatanggap kung ang naturang alegasyon ay totoo.

Ayon kay Garcia, isang dating miyembro ng New Zealand’s parliament na si Paulo Reyes Garcia, ang nagkumpirma ng receipt ng isang ballot na lahat ng mga pangalan ng mga kandidato ay present sa balota.

“Maniwala po kayo. Sa ating mga kababayan, hindi po totoo ‘yan, fake news po. Nagdeklara na po ang ating embahada diyan po sa New Zealand. Wala po silang natanggap kahit isa man na reklamo mula sa mga kababayan sa New Zealand,” giit ni Garcia.

“’Pag nagpi-print po kasi ng balota… hindi po kasi pwedeng isang piraso lang ang print. Batch po ‘yun. Kung isang halimbawa po, ‘yung number ng New Zealand ay isang buong batch ng isang libong balota, eh ‘di sana po kahapon pa lamang ay may isang libo na po tayong mga kababayan na nagreklamo na wala ang pangalan ng isang kandidato,” diin ni Garcia.

Samantala, nanawagan naman ang Philippine Embassy in New Zealand sa mga Pilipino na nagke-claim na nakatanggap ng balota na walang pangalan ng isang presidential candidate na agad itong ibalik sa diplomatic post para sa beripikasyon.

Ito ay matapos na isang larawan ng balota, kung saan nag-circulate sa social media nitong weekend, na na-omit umano ang pangalan ni Robredo sa listahan ng mga kandidato.

“Anyone who claims they have received a ballot with an erasure/non-appearance of any of the entries is requested to return the entire ballot package to the embassy so that we can verify the claim. The embassy is coordinating with the COMELEC accordingly,” batay sa statement ng embassy.

Ayon sa Philippine Embassy in Wellington, “it is committed to upholding the integrity of the national elections as we stand by our oath as career civil servants to uphold the values of patriotism, integrity, professionalism, excellence.”

Sinabi pa ni Garcia, na siyang head ng Comelec’s task force against fake news, patuloy nilang iimbestigahan ang insidente.

13 lugar nakapagtala ng pagtaas ng COVID cases — DOH

ni Lolet Abania | April 25, 2022

Tinututukan ng Department of Health (DOH) ngayon ang 13 lugar sa bansa na nakapag-record ng pagtaas ng bilang ng COVID-19 cases.

Gayunman, ayon kay DOH Undersecretary Maria Rosario Vergeire, ang pagtaas ng mga kaso ng COVID-19 ay hindi nakababahala.

“We are not seeing significant increases as of this time. And most specifically, mas importante po, doon po sa mga pagtaas ng kaso na nakikita natin na bahagya, ay hindi po natin nakikitang napupuno ang mga ospital,” saad ni Vergeire sa isang interview ngayong Lunes.

Binanggit naman ni Vergeire na kabilang sa binabantayang lugar ang Pateros, Malabon at Navotas sa Metro Manila dahil sa naitatalang bilang ng kanilang mga kaso at hospital occupancy.

“May positive growth rate po ang Pateros. Meron din po sa ibang area na napupuno po ang kanilang (intensive care unit) katulad sa Malabon. Pero nu’ng pinag-aralan naman po natin, tatatlo lang po ang ICU beds nila. And ngayon po, puno na ang kanilang 3 ICU beds,” sabi ng opisyal.

“Sa Navotas naman po, meron lang ho tayo diyan 46 beds for COVID ward. At ngayon po, medyo may pagtaas. Pero it’s still less than 60 percent. Pero kakaunti po kasi kaya madaling mapuno,” dagdag niya, subalit hindi na siya nagbanggit pa ng ibang lugar.

Ayon kay Vergeire, ang bahagyang pagtaas ng mga COVID-19 cases ay maiuugnay sa pagpapabaya ng marami sa pagsunod sa minimum public health standards, isinasagawang mga gatherings sa mga campaign sorties, at mga indibidwal na nagsipagbakasyon noong Semana Santa.

Paalala ni Vergeire sa publiko na patuloy na sumunod sa mga health protocols para maiwasan ang pagtaas ulit ng mga kaso ng COVID-19.

Una nang nagbabala ang DOH na ang pagpapabaya sa pagsunod sa mga ipinatutupad na pandemic guidelines ay posibleng magdulot ng active coronavirus infections ng tinatayang kalahating milyon sa kalagitnaan ng Mayo.

Nissan GTR Sports car, nag-dive sa dagat!

ni Lolet Abania | April 25, 2022

Nagkagulo ang mga nagsidalo sa isang racing event matapos na mag-dive ang isang sports car sa dagat sa Cebu City.

Sa salaysay ng isang uploader ng video, nangyari ang insidente sa unang araw ng Burning Rubber Cebu Invitational Drag Race 2022 na ginanap sa South Road Properties, isang reclaimed area malapit sa baybayin ng southern district ng Cebu City. Subalit, hindi kasama ang Nissan GT-R sports car sa racing event.

Ayon sa mga awtoridad, posibleng nakalimutan ng may-ari ng sports car na i-hand brake ito nang kanyang iwan habang naka-park sa tabing-dagat.

Umatras ang sports car at dire-diretso ito sa dagat.

Batay pa sa ulat, inabot ng 30 minuto bago naiahon ang sports car sa tubig.

Wala namang nasaktan sa insidente.