Optional na pagsusuot ng face mask sa klasrum, aprub ng DepEd

ni Lolet Abania | November 1, 2022

Ipinahayag ng Department of Education (DepEd) ngayong Martes na susundin nila ang ibinabang order ng Malacañang hinggil sa boluntaryong paggamit ng face masks sa mga indoor spaces, kung saan tuluyang papayagan ang mga estudyante na magtanggal ng kanilang masks na nasa in-person classes.

“We will follow [Executive Order No.] 7 and issue an amendatory [department order],” saad ni DepEd Spokesman Michael Poa bilang tugon patungkol sa face masking sa mga classrooms.

“Schools may immediately implement optional masking indoors,” dagdag ni Poa.

Noong nakaraang linggo, inaprubahan ni Pangulong Ferdinand “Bongbong” Marcos Jr. ang voluntary na pagsusuot ng face masks sa parehong indoor at outdoor areas sa kabila ng patuloy na banta ng COVID-19.

Sa ilalim ng nasabing order, ang paggamit ng face masks ay mananatiling mandatory sa mga health care facilities, medical transport vehicles at lahat ng uri ng public transportation.

Hinihikayat naman ang pagsusuot ng face mask sa mga senior citizens, mga indibidwal na may comorbidities, mga immunocompromised persons, buntis, unvaccinated, at iyong mga nakararanas ng COVID-19 symptoms.

Una nang iniutos ng DepEd, ang pagbabalik ng lahat ng mga pampublikong paaralan sa full face-to-face classes mula sa Miyerkules, Nobyembre 2, matapos ang mahigit 2 taon ng distance at blended learning dahil sa pandemya.

Gayunman, papayagan naman ng ahensiya ang ilang exemptions, kabilang dito ang mga paaralan na naapektuhan ng katatapos lamang na sakuna.

“Exemptions are [also] within the authority of the regional directors,” pahayag ni Poa sa mga reporters.

Tumanggi naman ang DepEd na mag-release ng datos ng mga COVID-19 cases sa mga paaralan, habang ipinauubaya nila anila ito sa mga lokal na gobyerno para ilabas ang mga bilang ng kaso.

Kahit dagsa ng tao… Undas 2022, mapayapa – PNP

ni Lolet Abania | November 1, 2022

Mapayapa ang pagsisimula ng All Saints’ Day o Undas ngayong Martes, habang dumadagsa ang mga taong maaga pang nagtutungo sa mga sementeryo, ayon kay Philippine National Police (PNP) spokesperson Police Colonel Jean Fajardo.

Sa isang interview ng GMA News, sinabi ni Fajardo na wala namang nai-report na masamang insidente naganap simula pa lang ng long holiday weekend.

“So far, for the last two to three days, generally peaceful naman 'yung mga nakita nating sitwasyon sa ating mga sementeryo particularly dito sa Manila,” pahayag ni Fajardo.

Ayon kay Fajardo, inasahan na nila na maraming bibisita sa mga puntod ng kanilang mga mahal sa buhay ngayong Martes dahil sa maganda na rin ang kondisyon ng panahon.

Aniya pa, kabilang sa mga ipinagbabawal sa mga sementeryo ay matatalas at matutulis na bagay, flammable materials, speakers, at gamit na pangsugal.

Samantala, sa Manila North Cemetery, ayon sa kanilang director na si Roselle Castañeda, ang bilang mga bumisita sa cemetery nitong Lunes ay mas mababa sa inasahan nila dahil sa masamang panahon.

“Kahapon po doon sa ine-expect namin na at least makaka-300,000 or 400,00 po sana ang mga makakapunta rito ay napakababa po dahil 42,844 lang ang pumasok sa Manila North Cemetery,” sabi ni Castañeda sa isang interview ng GMA News.

Subalit aniya, pasado alas-9:00 ng umaga, dumagsa ang mga tao sa entrance ng naturang sementeryo, kung saan tila nabalewala na ang social distancing sa pila papasok dito.

Sa haba ng pila, umabot umano ito hanggang Blumentritt Road at nahirapan ang mga awtoridad na ipatupad ng physical distancing. Gayunman, marami pa rin sa kanila ang nakasuot ng face mask bilang proteksyon laban sa COVID-19.

Batay sa report ng Manila Police District, bandang alas-11:00 ng umaga, nasa mahigit 55,000 na ang pumasok sa sementeryo habang inasahan rin nilang patuloy pang tataas ang bilang nito.

Paulit-ulit naman ang paalala ng pamunuan ng Manila North Cemetery sa ipapatupad nilang cut-off na alas-4:30 ng hapon at hindi na sila magpapapasok pa, habang alas-5:00 ng hapon naman ay isasara nila ang sementeryo.

Sa Manila South Cemetery, naging mahaba rin ang pila sa entrance ng sementeryo sa rami ng mga bibisita sa puntod ng kanilang mga loved ones.

Ayon sa kanilang director na si Jonathan Garzo, umabot umano hanggang 400 metro ang pila papasok bandang alas-2:00 ng hapon.

Sa report ng pulisya, hanggang alas-2:00 din ng hapon ay umabot na sa 44,000 katao ang nagtungo sa Manila South Cemetery.

Angelica Panganiban, nagsilang ng baby girl

ni Lolet Abania | September 23, 2022

Nanganak na si Angelica Panganiban ng isang baby girl!

Sa kanyang Instagram ngayong Biyernes, inanunsiyo ng bagong mom na si Angelica ang magandang balita habang nag-post ang aktres ng closeup photo ng mga mata ng kanyang newborn baby.

Sinabi rin ni Angelica ang name ng kanyang daughter at talagang birthday nito. Si Amila Sabine Homan ay isinilang noong Setyembre 20.

“Bean waiting for you all my life,” saad ni Angelica.

Nagpahayag naman sa comments section ng mga pagbati at well-wishes ang mga celebrities at followers para kay Angelica at sa kanyang first born child.

“Sis congratulations! She’s got your eyes,” sabi sa kanya ng close friend na Camille Prats.

Baby Amila, welcome to the world!