Malaysia, isinailalim sa national lockdown

ni Ronalyn Seminiano Reonico | May 29, 2021

Isinailalim sa national lockdown sa kauna-unahang pagkakataon ang Malaysia dahil sa paglobo ng kaso ng COVID-19.

Noong Biyernes, nakapagtala ang Malaysia ng 8,290 bagong kaso ng COVID-19 kaya inianunsiyo ni Prime Minister Muhyiddin Yassin ang total lockdown sa bansa simula sa Martes na inaasahang magtatagal hanggang sa June 14.

Sa naturang lockdown, tanging ang mga essential businesses lamang ang maaaring magsagawa ng operasyon.

Pahayag pa ni Yassin, “The existence of new aggressive variants with a higher and faster infection rate has influenced this decision.

“With the increase in daily cases… capacity in hospitals across the country to treat COVID-19 patients has become more limited.”

Samantala, sa kabuuang bilang ay nakapagtala ang Malaysia ng 549,514 kaso ng COVID-19 at 2,552 bilang ng mga pumanaw.

1 kawani positive sa Covid, Silago, Southern Leyte City Hall, ini-lockdown

ni Lolet Abania | May 26, 2021

Isinailalim sa lockdown ang mga opisina ng munisipyo sa bayan ng Silago, Southern Leyte matapos na isang kawani nito ang nagpositibo sa COVID-19.

Sa inilabas na Executive Order No. 41 ni Mayor Pacita Almine, simula Mayo 25-28 ay isasara ang mga opisina ng munisipyo para sa disinfection habang nagsasagawa na ng contact tracing sa mga nakasalamuha ng nasabing kawani.

Bukod sa Mayor’s Office, naka-lockdown din ang mga opisina ng Sangguniang Bayan, Treasurer, Civil Registrar, Assessor, Budget, Engineering, Accounting, Planning and Development, Social Welfare and Development, Agriculture, Environment and Natural Resources, Tourism Investment and Promotion, Human Resource and Management, Public Employment Service, Local Government Operations/DILG, Local COMELEC.

Pinayuhan din ang mga empleyado na manatili na lamang sa kanilang bahay at iwasan ang lumabas upang hindi mahawahan ng nakamamatay na sakit.

Gayunman, ayon kay Almine, mananatiling bukas ang mga opisina ng Rural Health Unit (RHU), Disaster Risk Reduction and Management Office (DRRMO) at Municipal Task Force (MTF).

15 pasyente, 1 staff sa Mental hospital, COVID positive

ni Ronalyn Seminiano Reonico | May 24, 2021

Isinailalim sa total lockdown ang Bicol Medical Center’s (BMC) Department of Psychiatry o mas kilala bilang Don Susano Rodriguez Memorial Mental Hospital sa Barangay Cadlan sa bayan ng Pili, Camarines Sur noong Linggo matapos magpositibo sa COVID-19 ang 15 pasyente at isang healthcare worker.

Ayon sa spokesperson ng BMC na si Mylce Mella, epektibo ang naturang lockdown noong Linggo at magsasagawa ng disinfection sa ospital.

Ayon pa kay Mella, isinailalim na rin sa isolation ang staff at mga pasyente.

Samantala, nag-abiso rin ang pamunuan sa mga pasyente at pamilya ng mga ito na nangangailangan ng psychiatric help na makipag-ugnayan sa Municipal Health Officer o tumawag sa BMC Department of Psychiatry’s hotline +639610376820.

Noong May 21, mayroon nang 3,036 kabuuang bilang ng kaso ng COVID-19 sa Camarines Sur. Nakapagtala rin ng 2,186 bilang ng mga gumaling na sa naturang lugar at 108 mga pumanaw.